Ba-Loma 2
2
Etenelo eʼakambo ea Nzakomba elʼafaya la Ba-Yuda
1Ngoso wʼofa lʼesengamelo, we bonto nko loswele ondelezʼonkina baoyi, ele nda joi lindoeleza we, oyaumba we mongo, ndʼewela wete we mongo okela nkʼaoyiʼako baki wumbakʼende. 2Ko tea wae umbelo ea Nzakomba, endezama la nsosolo, eyalʼelʼiyʼakela baoyi bako. 3La we, bontʼondelezʼanto ndʼaoyi bʼelengʼeko, ko wʼokela nkʼako we mongo, okanela wete wifoloteya umbelo ea Nzakomba nde? 4La otengwela nde, liaci ja liota likae, lʼikelo eʼotema ekae, lʼisei ikae ya loncinji, ko olofela wete liota ja Nzakomba likieza we ndʼeututaelo eʼobe? 5Lolo ndʼocilingano wʼotema boke, ko ndʼosamba wʼeututaelo eʼobe, ofongela we mongo nkele nda mbile ea nkele ko lʼenyelo ea umbelo ea liongi ea Nzakomba. 6Elʼende ifolakola wengiʼonto ndako nkʼelengʼele beketo bekae. 7Ele bane nkʼelengʼekiʼyʼocinianaka ndʼolemo wʼolotsi, la ndʼaselo eʼimemya, la lokumo, ko lʼosamba wʼiwa, ifalakola la loiko ja seko. 8Lolonde elʼako bandikya bikoli, ko batendola nsosolo eko, lolo bakimana lʼaoyi bʼobe, ifalakola la bolemo la nkele ea tsa, 9wete elo ea bameko ele wengiʼolimo wʼonto oyokelʼobe, Bo-Yuda nda joso, ko Bo-Elene o ngoko. 10Lolonde imemya la lokumo ja kuci ele wengiʼonto okelʼolotsi, ele Bo-Yuda nda joso, ko lʼele Bo-Elene ngoko. 11Ele Nzakomba ntakalanyakʼanto likali nye.
12Iyʼakelaki bobe afʼiyo lʼEsekyelo, bifofitana lako Esekyelo; ko baso bakelakʼobe akʼiyo la Esekyelo, bifumbama lʼEsekyelo. 13Afʼiyʼandoka Esekyelo, njooka bandelama ele Nzakomba, lolo bakeji bʼEsekyelo bifoyengwa. 14Wenaka Bafaya, bafa lʼEsekyelo, bakela belemo biʼEsekyelo limʼelenge ekiyo mongo, nkako mpeka la bafa lʼEsekyelo, bayoyalema esekyelo elʼiyo mongo. 15Iyo beneya wete bolemo wʼEsekyelo bosilʼokotama ndʼetema bekiyo: ko juge ekiyo eʼotema eyosange ndʼeloko ekiyo, nkina eyoakʼiyo bakambo, nkina eyoyengolʼiyo 16nda mbilʼeko endeza Nzakomba biisisa biʼanto o la Yesu Masiya, elengʼele nsango ekami eʼolotsi.
Baoyi ba Ba-Yuda
17Ele we, nkina otangema Bo-Yuda, ko osizʼotema ndʼEsekyelo, ko oyakumya la lina ja Nzakomba, 18wae olea wango bokande, ko osima baoyi baleki bolotsi, elakema we limʼEsekyelo, 19ko olimeza wete we ole bolonji owa mboka ele bawei baiso, itswa ele bako bale nda wilima, 20wekeji owa basamba nkoto, ko bolaki owa tonkune, eata we efoya ea njea ko lʼea nsosolo ndʼEsekyelo: 21we bontʼoyolakʼonkina, ofoyalake we mongo nde? We ondoekya boeki wae bafiye, wiya nde? 22We oyosange wae bafokele jibi, okela jibi nde? We ondina baidola, oliya nde lima nkinda ya baidola? 23We onjakumya we mongo nda joi jʼEsekyelo, la osotsa Nzakomba la nsekola eʼEsekyelo? 24Ele lina ja Nzakomba josaolama isaola lʼinyo ele Bafaya, nkʼelenge ekotama.
25Ele etenelo ea nsonge ekoatela nkito nkina ole bofongi owʼEsekyelo; lolo nga osekola Esekyelo, etenelo ea nsonge eoyalema bosamba wʼetenelo ea nsonge. 26Ele ngʼonto otatename nsonge afongʼEsekyelo, bosamba bokande wʼetenelo ea nsonge bofaoandemʼelʼende ngʼetenelo ea nsonge nde? 27Ngoso endʼofa lʼetenelo ea nsonge nda jonge, lolo akokya baoyi bʼEsekyelo, ifokumba we, bontʼole la bikotelo ko la etenelo ea nsonge, lolo osekola Esekyelo. 28Ele Bo-Yuda afʼoso ondenya Bo-Yuda nda jonge, ko etenelo ea nsonge efʼeko ele nda jonge: 29lolo Bo-Yuda mongo wete endʼole Bo-Yuda ndʼaoyi bafenya, ko etenelo ea nsonge ele ndʼotema la ndʼolimo, efa ndʼonkanda. Imemya yʼontʼoko ifa limʼelʼanto, lolo limʼele Nzakomba.
Currently Selected:
Ba-Loma 2: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987