Bisekyelo bia Ba-Lewi 18
18
Bisekyelo bia mariage
1Ko Yawe aotefefa la Mose, aokela, 2“Sangela bana ba Yisalaele, Emi nde Yawe Nzakomba ekinyo. 3Lofaokela elenge ekelʼanto ndʼese eʼEjipeto ekʼinyʼoyalaka, ko lofaokela elenge ekelʼanto bʼese ea Kanana eʼemʼoyelʼinyo. Lofaokima bisekyelo bikiyo. 4Lifofonga bisekyelo bikami, ko lifesanya besise bekami, ko lokenda nda beko. Emi nde Yawe Nzakomba ekinyo. 5Lifofonga bisekyelo bikami ko la besise bekami; nga bonto afonga baoyiʼako, ifoika lʼako; emi nde Yawe.
6“Bonto okinyo atatutamake elʼomoto osangi lʼende wete akukole botaka bokae. Emi nde Yawe. 7Tokukolakebotaka wʼise eke, bole wete botaka wa nyango eke; ende ale nyango eke; tokukolake botakaʼokande. 8Tokukolake botaka wa waji owʼise eke; boko bole botaka wʼise eke mongo. 9Tokukolake botaka wa nkana eke, wete bona owʼise eke, nkina bona owa nyango eke, la aotswaki ndʼola la aotswaki wiji bonkina. 10Tokukolake botaka wʼona owʼona oke owa jende, nkina bona owʼonʼoke owʼomoto, ele botaka bokiyo bole bokawe mongo. 11Tokukolake botaka wa bonʼowa waji owʼise, oki ise eke mongo ilaka, elʼende nkana eke. 12Tokukolake botaka wa nkana ea ise eke; endʼale eoto otutsi lʼise eke tute mongo. 13Tokukolake botaka wʼotomolo nkina bokune owa nyango eke; elʼende eoto otutsi tute la nyango ekawe. 14Tokukolake botaka wʼotomolo nkina bokune owʼise eke, wete totutamake la waji okae; elʼende wae bokilo oke. 15Tokukolake botaka wa bokilo, wae waji owa bona oke; endʼale waji owa bonʼoke owa jende; tokukolake botakaʼokande. 16Tokukolake botaka wa waji owa botomolo nkina wa bokune oke; botaka bokande bole wete botaka wʼotomolo nkina wʼokune oke. 17Tokukolake botaka wʼomoto ko la wʼona okande. Tokolake bona owʼona okande owa jende, nkina bona owʼona okande owʼomoto, wae okukole botakaʼokande; iyo bale bioto bitutsi la we tute mongo; ngoso bosesengano wʼobe. 18Tokolake waji, bomoto ole botomolo nkina bokune owa waji ole la we, wae aswele lʼende nda likale, wae okukole botakaʼokande atafa waji oko oki joso owa.
19“Ko ofaotutama lʼomoto, wae okukole botaka bokande, ayalʼende nda linyamo ja nsanza. 20Toalanake la waji owʼonto osingitana la we, ko oyaatela we mongo linyamo lʼende. 21Tokaake bona oke wae bolekya nda tsa ele Moleke. Tosaolake lina ja Nzakomba ekawe; emi nde Yawe. 22Tetamake la jende ngole lʼomoto; joi liko lile linyamo mongo. 23Ko tetamake la nyama nko loswele, wae okelʼobe lʼeko; ko bomoto afotutamela nyama wae etame lʼeko; ngoso joi ja wungusano.
24“Inyo talofitakʼinyo mongo la joilimoko ja baoyiʼane; ele banto baʼemʼoza nda joso likinyo baatelakʼiyo mongo linyamo lʼaoyiʼane bauma; 25ko bokili boyalema la linyamo, ko nsisozaki boko ndʼewelʼea bobe wʼoko, ko bokili bojweki banto bafetsaki ndʼoko. 26Ndʼewelʼeko inyo lofonga bisekyelo bikami la besise bekami, ko talokelake baoyiʼane ba linyamo lileki nye, la bomongʼola, ko la bofaya oyala ndʼetei ekinyo: 27(ele banto baki ndʼese nda joso likinyo bakelaki baoyiʼane bauma ba linyamo, ko bokili mongo boyalema la linyamo): 28nyango, aʼinyʼoatela bokili linyamo, boko bofolojwʼinyo ngoki boko ojweka banto baki ndʼoko nda joso likinyo. 29Ele banto bakela baoyiʼamo ba baoyiʼane, bantʼako bakelʼaoyiʼako, bifobulama limʼele bantʼakiyo. 30Ndʼewelʼeko lofonga besise bekami, wete lofokele joi limo ja baoyi ba bilenge bine bia linyamo, bikelamaki nda joso likinyo, wae lofoyafit’ inyo mongo la linyamo ndʼaoyiʼako. Emi nde Yawe Nzakomba ekinyo.”
Currently Selected:
Bisekyelo bia Ba-Lewi 18: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
