Bisekyelo bia Ba-Lewi 13
13
Esekyelo ea nkangi ea baeka
1Ko Yawe aotefela la Mose la Alona, aokela, 2“Ae bontʼoata nda lofoso ja wunyu bokae etutsa, nkina ekoku ea mpota, nkina liande ja fe, ko eko enya nda lofoso nga mpota eʼaeka, mpanga bayele bontʼoko ele Alona nkanga, nkina ele bonʼomo okae ole nkanga; 3ko nkanga engele mpota ele nda lofoso ja wunyu bokae; ko wenaka biosa bele nda mpota beoyala fe, ko ena nga mpota eolindela ndʼase ba lofoso ja wunyu bokae, eko ele nkangi ea baeka; ko nkanga ondoengela otangʼende linyamo. 4Nga lianda lile nda lofoso ja wunyu likae lile fe, lolo lifenya nga jolindela ndʼase ba lofoso, ko biosa bele ndʼeko betafofaningwa fe, kela nkanga abuzʼende ole la nkangi eko bembile nsambo. 5Ko nda mbile ea nsambo, nkanga oengele, ko nga atanga wae nkangi eosukama, ko mpota etafule lʼonene nda lofoso lokae, nkanga ifouza lenkina bembile nsambo. 6Ko nkanga oengele lenkina nda mbile ea nsambo, ko nga mpota eoyala londende, ko etafule nda lofoso, nkanga asange wae ale feto, eko ele nkʼekoku ea mpota; ko bontʼoko ifosola benkoto, ko ayale feto. 7Lolo nga ekoku utʼofula nda lofoso ndʼafeka bʼeneyelo ekiʼnde oyaeneyaka ele nkanga ndʼewelʼea efetswelo ekae, kela ayaeneya ele nkanga lenkina. 8Ko nkanga oengelʼende, ko ngʼekoku eyofule euke nda lofoso, nkanga otangʼende linyamo; ele wete baeka.
9“Akonʼonto nkangi ea baeka, boyelʼende ele nkanga; 10ko nkanga oengele, ko ngʼetutsa ea fe ele nda lofoso, ko eko efaningola biosa fe, ko lififa litunjwa ndʼetutsa eko, 11eko ele baeka ba kalakala nda lofoso ja jonge likae, ko nkanga otangʼende linyamo; afaobuzʼende, elʼende linyamo. 12Ko nga baeka baolola nda lofoso, ko baokuka lofoso louma jʼontʼoko owa nkangi lima botsa elaka nko bakakʼakande, wae wengi itenela itomba nkanga baiso bakae, 13mpanga nkanga oengele o njengela, ko nga baeka baokuka jonge likae liuma, nkanga otangʼende okona nkangi eko feto; jonge liuma jofaningwa fe; endʼale feto. 14Lolonde nga wunyu wa mpota wenya ngʼasi bʼalongo, ayale linyamo. 15Andena nkanga mpota endozʼasi nsangana lʼalongo, otangʼende linyamo; wunyu boko bole linyamo; nkangi eko ele baeka. 16Lolo nga wunyuʼoko boleola fe, bontʼoko acwʼele nkanga, 17ko nkanga oengelʼende, ko nga mpota eofaningwa fe, nkanga otangʼende ole la nkangi eko feto; endʼale feto.
18“Nga bontʼomo aki la jina nda lofoso ja jonge likae, ko jina liko joya, 19ko etutsa ea fe enya wiji boki jina, nkina lianda ja fe nsangana la ngola, kela beneya nkanga lianda liko; 20ko nkanga alende lianda liko. Nga lianda liyocime ndʼase ba lofoso, ko biosa bele nda lianda befaningwa fe, nkanga otangʼende linyamo; eko ele nkangi ea baeka endola lima jina. 21Lolo nga nkanga engela lianda liko, ko afotane biosa bia fe eko, ko lianda lifocime ndʼase ba lofoso, lolonde loleola fe, mpanga nkanga abuzʼende bembile nsambo: 22ko nga lianda likongofula nda lofoso, nkanga otangʼende linyamo, lile wete baeka. 23Lolo nga lianda liyala o ngoki liko, ko lifofule, lile nkʼefoya eki jina; nkanga otangʼende feto.
24“Nga lofoso jʼonto lole la itenela ilika la tsa, ko wunyu wʼitenela ilongolaki bole la lianda ja fe, nkina fe nsangana la ngola, 25kela nkanga engele lianda liko, ko nga biosa bele nda lianda beofaningwa fe, ko etutsa enya nga eyocime ndʼase ba lofoso; ele baeka bandola lima elikelo ea tsa, ko nkanga ifotangʼende linyamo; eko ele nkangi ea baeka. 26Lolonde nga nkanga engela lianda, ko afotane biosa bia fe eko, ko etutsa efocime ndʼase ba lofoso, ko lianda joleola, kela nkanga obuzʼende bembile nsambo. 27Nda mbile ea nsambo, nkanga oengele, ko nga lianda jofula nda lofoso, nkanga otangʼende linyamo; ele nkangi ea baeka. 28Lolo nga lianda liko lisekwa ngoki liko, ko lifofule nda lofoso, lolo joleola fele; lile nkʼetutsa ea tsa tokiʼndʼolikaka, ko nkanga otangʼende feto; lianda lile nkʼekoku es tsa.
29“Nga jende nkina bomoto, ale la mpota ndʼotsa, nkina nda loole: 30kela nkanga engele mpota eko, ko nga enya nga ecima ndʼase ba lofoso, ko biosa ndʼeko beyale fufu ko befouke, mpanga nkanga otangʼende linyamo; ele nkangi eʼimpaka, wete baeka ba botsa la loole. 31Andengela nkanga impaka iko, ngʼafene wae iyocime ndʼase ba lofoso, ko ifa la babwo ba yo ndʼiko, kela nkanga abuzʼontʼoko ole la impaka iko bembile nsambo; 32ko nda mbile ea nsambo nkanga engele nkangi eko, ko nga impaka itafule, ko babwo ba fufu bafeko, ko impaka ifenya nga yocima ndʼase ba lofoso; 33ende mpangʼakoole botsa, lolo afaokoola impaka iko; ko nkanga abuzʼonto ole la impaka bembile bemo nsambo. 34Ko nkanga engele impaka iko nda mbile ea nsambo; ko nga impaka itafule nda lofoso; ko nga yenya nga ifocime ndʼase ba lofoso, nkanga otangʼende feto; ko asole benkoto bekae, ko ayale feto. 35Lolonde nga impaka yofula nda lofoso ndʼafeka bʼefetswelo ekae, 36nkanga oengelʼende, ko nga impaka yofulʼouke nda lofoso, nkanga afauta jasa biosa bia fufu; ende ale linyamo. 37Lolonde nga impaka ikongoyala ngoki iko, ko biosa bia yo bemela ndʼiko, impaka yosila, endʼale feto; ko nkanga otangʼende feto.
38“Wenaka jende, nkina bomoto, ale la baanda, wete baanda ba fe nda lofoso ja jonge likande, 39nkanga oengele, ko nga baanda bako bale nda lofoso ja jonge likae bale fe, ko baf ouke; baanda bako bale nko mpote indola nda lofoso; ende ale feto.
40“Nga babwo bʼonto baokwa limʼotsaʼokande, ende ale la limenga, lolo ale feto. 41Ko nga babwo baokwa limʼaliko bʼelongi, ende ale la limenga jʼelongi, lolo ale feto. 42Lolonde nga akona nkangi nda limenga jʼotsa nkina nda limenga jʼelongi, wete mpota ea fe nsangana la ngola, eko ele baeka bandola nda limenga likae jʼotsa nkina jʼelongi. 43Nkanga olendʼende, ko nga etutsa ea mpotʼeko ele fe nsangana la ngola nda limenga jʼotsaʼokae, nkina nda limenga jʼelongi, elenge endenya baeka nda lofoso ja jonge, 44endʼale la baeka; ale linyamo: nkanga otangʼende linyamo nkʼekoji: nkangi eko ele ndʼotsaʼokande.
45“Ko bonto ole la nkangi eʼaeka alote bito bindatsa, ko afotonge babwo bakande, ko akuke loebu lokae jʼaliko, ko abeleza, Linyamo! Linyamo! 46Bembile beuma belʼende la nkangi eko ale linyamo; afetsa nkʼende kika; ende ale linyamo; afetsa nkʼende kika ndʼoyalo bole ndʼanza bʼetakanelo eʼanto.
47“Ko nga eto ea baeka ele ndʼonkoto, nkina bonkoto wa nkunza, nkina wa lin; 48nkina ele nda mpekwa ya nsasembya, nkina nda mpekwa ya mpafoma, la nda lin la nda nkunza, nkina ele ndʼekoto la yomba indemama lʼekoto. 49Nkina nkangi enya ndʼonkoto nga nkasa yʼanganju nkina nkasa ya ngola, nkina ndʼekoto, nkina nda mpekwa ya nsasembya nkina ya mpafoma, la nda yomba nko loswele ikelama lʼekoto; eko ele nkangi eʼaeka, ko beneya nkanga benkoto beko. 50Ko nkanga engele nkangi eko, ko abuza yomba ile la nkangi eko bembile nsambo. 51Ko nda mbile ea nsambo engele lenkina nkangi eko: nga nkangi eofula ndʼonkoto, nkina nda mpekwa ya nsasembya nkina ya mpafoma, nkina ndʼekoto, la yomba nko loswele ikelama lʼekoto, nkangi eko ele baeka bakaka o nkakaka. Yombʼiko ile linyamo. 52Ko atumbe bonkoto boko nda tsa, nkina mpekwa ya nsasembya nkina ya mpafoma, nkina nkunza, nkina lin, nkina yomba yʼekoto nko loswele iyale nkangi eko; ncina wete eko ele baeka boyokaka o nkakaka; ko botumbame nda tsa.
53“Lolo nkanga anyangʼengela, ko bala nkangi etafule ndʼonkoto, nkina nda mpekwa ya nsasembya nkina ya mpafoma, nkina nda yomba nko loswele ile yʼekoto; 54mpanga nkanga asise bosise wae basole yombʼiko iyala nkangi, ko abuzʼiko lenkina bembile nsambo; 55ko nkanga engele itenela iki nkangi ndʼafeka bʼesoelo ea yombʼiko, ko mpeka la nkangi efocikwane lʼelenge eki eko, ko etafule, yombʼiko ile linyamo; itumbame nda tsa; nkina nkangi eko ele ndʼetei ea yombʼiko nkina nda fole.
56“Lolo nga nkanga alenda, ko ena wae aki yombʼiko osolamaka, nkangi eko eoleola fe, atenʼeko limʼonkoto, nkina limʼekoto, nkina lima mpekwa ya nsasembya nkina ya mpafoma. 57Ko nga nkangi ekongʼenya ndʼonkoto, nkina nda mpekwa ya nsasembya nkina ya mpafoma, nkina nda yomba yʼekoto nko loswele, nkangi eyofule lenkina; otumba yomba ile la nkangi eko nda tsa. 58Lolo bonkoto, nkina mpekwa ya nsasembya nkina mpekwa ya mpafoma, nkina yomba yʼekoto, nga nkangi esila aki yombʼiko osolamaka, mpanga osolʼiko bosola wʼefe, ko iko yofetswa.” 59Ene wete esekyelo ea nkangi eʼaeka ndʼonkoto wa nkunza nkina wa lin, la nda mpekwa ya nsasembya la ya mpafoma, la nda yomba yʼekoto nko loswele, kela boko botangeme feto nkina linyamo.
Currently Selected:
Bisekyelo bia Ba-Lewi 13: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
