Bisekyelo bia Ba-Lewi 11
11
Esekyelo ea nyama ile feto la ifa feto
(B. biʼaf 14.3-21)
1Ko Yawe aotefela la Mose la Alona, aolakela, 2“Sangela bana ba Yisalaele wete, Ine wae nyama ikusʼinyo lola lima nyama iuma ile ndʼokili. 3Lima nyama iuma, iko ikafa losembe, iki likaka okafemaka, ko itooma linkio, inyo lambʼole iko. 4Lolonde taloleke iko itooma linkio kika, nkina ikafema losembe kika. Elengʼeko, taloleke ngamela, elʼeko etooma linkio, lolo efokafe losembe. Nyama eko eofekama elʼinyo. 5Ko la lapin, elʼeko etooma linkio, lolo efokafe losembe; eko eofekama elʼinyo. 6Ko la lièvre, elʼeko etooma toma lotoomo, lolo efokafe losembe, eko eofekama elʼinyo. 7Ko la ngulu, elʼeko ekafa losembe ko ele la bakaka bakafema, lolo efotooma toma lotoomo; eko eofekama elʼinyo. 8Taloleke wunyu wa nyama iko, ko talofomwake bituji biʼiko; biko bile la linyamo elʼinyo.
9“Lambʼole nyamʼine limʼelʼikʼiuma ile ndʼasi: iko iuma ile la bekongoci la mpese, nkinʼiko ile ndʼaeke, nkina nda ntando, lambʼole iko. 10Lolo ikʼiuma ifa la bekongoci la mpese, la ndʼaeke la nda ntando, limʼelʼiko iyokende ndʼasi ko lʼiko iyoike ndʼasi, iko ile linyamo elʼinyo; 11ko iko isekwa la linyamo elʼinyo: taloleke wunyu wʼiko, ko bituji biʼiko biyale la linyamo elʼinyo. 12Iko nko loswele ile ndʼasi, nga ifa la bekongoci la mpese, iko ile la linyamo elʼinyo.
13“Ko lima tofulu, lotanga tone ta linyamo, ko taloleke toko nye; mpongo, lʼengondo ko la eeke; 14la efufaele la ikete nda bilenge biʼiko; 15la bianganga nda bilenge bikiyo, 16lʼautruche, lʼikete yʼotso, la mouette, la nkombe nda bilenge bikiyo; 17lʼesukulu, la cormoran, la esukulu eʼenene; 18la esukulu ea beongo, la pelican, la vauture, 19la cigogne, la bolamba nda bilenge bikiyo, la vanneau ko la lolema.
20“Towawa touma tole la bafafu, ko toyokende ndʼekolo benei, tole linyamo elʼinyo. 21Lolo lima towawa tondakula, tole lʼafafu, ko toyokende ndʼekolo benei, ko tole lʼekolo ndʼaliko bʼakakʼakiyo bee toko otamba ndʼokili, lambʼole towawa toko. 22Bala towawa tondeji lʼinyo wae lole, sauterelle nda bilenge bikiyo, la solam, la lingenge nda bilenge bikiyo, ko basalankata nda bilenge bikiyo. 23Lolo, towawa tomo touma tole lʼafafu ko la bakaka banei, tole la linyamo elʼinyo.
24“Ko lifoyalema la linyamo lʼelemo bene: bonto nko loswele ofomwa etuji ea bene ifoyalema la linyamo elaka nkʼokolo; 25ko bonto nko loswele otomba ete i eʼetuji eʼeko, asolʼenkoto bekande, ko ayaleme la linyamo elaka nkʼokolo. 26Wengi nyama ekafa losembe, lolo likaka ufokafeme, ko efotoome toma lotoomo jʼefe, eko ele linyamo elʼinyo; osʼofomwa eko ayaleme la linyamo. 27Ko nyama iyokende ndʼakaka banei, iko ikenda ndʼakaka mongo, lako nsembe, iko ile linyamo elʼinyo; bontʼosʼofomwa etuji ea nyamʼiko ayaleme linyamo elaka nkʼokolo. 28Ko bontʼotomba etuji ea nyamʼiko, asole benkoto bekae, ko ayaleme linyamo elaka nkʼokolo. Nyamʼiko ile wete linyamo elʼinyo.
29“Ko ndʼoloi wa nyama indakula ndʼokili, ine iyale la linyamo elʼinyo: belette la mpo la boselenketa nda bnlenge bikiyo, 30la iko, la loambe, la ulu, la likolo, la longonyoli. 31Ine ile la linyamo elʼinyo ndʼoloi wa nyama indakula iuma; bonto ofomwʼiko aki iko owaka, ayaleme la linyamo elaka nkʼokolo. 32Ko bolemo nko loswele boe nyamʼiko iwei okwela, boko boyaleme la linyamo; nkina ijwa eʼotamba, nkina bonkoto, nkina ekoto, nkina sac, wete ijwa nko loswele ekambʼanto bolemo; eko iname ndʼasi, ko eyaleme la linyamo elaka nkʼokolo, ko efetswa ngoko. 33Ko nga emo ea nyama iko ekwa ndʼijwa ea iyomba, toma touma tole nda ijwʼeko toyaleme la linyamo, ko loola ijwa eko: 34ko toma ta ndala toki ndʼeko, toki basi ofomwaka, toyale la linyamo; ko wengi bomejwa boki eko bomelʼanto, boyaleme la linyamo. 35Ko yomba nko loswele ie ete i ea etuji ea nyama iko okwela, iyaleme la linyamo, nkina etumbelo ea toma, nkina ekatselo ea mpoke, toma toko toolame, ele toko tole la linyam ko toyaleme la linyamo elʼinyo. 36Lolonde ngʼetuji eokwa ndʼetoko eʼasi, nkina nda lifoku lile lʼasiʼauke, basi bako bale feto, lolo bolemo bofomwa etuji bole la linyamo. 37Ko nga etuji ea nyamʼiko ekwela biofo belangʼiyo jona, biofo beko becikale feto. 38Lolonde nga basi bilama nda biofo beko, ko etuji ekwela basiʼako, biofo beko bele la linyamo elʼinyo.
39“Ko nga nyama elʼinyo ndala eowa, bonto ofomwa etuji ea nyamʼeko ayale la linyamo elaka nkʼokolo. 40Ko bontʼosʼola etuji ea nyama eko, asole benkoto bekae, ko ayale la linyamo elaka nkʼokolo; ko bontʼotomba etuji eko, asolʼenkotoʼekae, ko ayale linyamo elaka nkʼokolo.
41“Ko wengi nyama endakula ndʼokili ele yomba ya linyamo, eko etaleamake. 42Nyama ikenda nda likunju, lʼiko ikenda ndʼakakʼanei njakula, nkina ndʼakaka bauke, wae nyama iuma indakula ndʼokili, taloleke iko nye; iko ile linyamo mongo. 43Talokelakʼinyo mongo banto ba linyamo la nyamʼine iuma indakula, taloatake mbindo lʼiko, ko talofitake baonge bakinyo lʼiko, wae lofotame linyamo lʼiko. 44Elʼemi nde Yawe, Nzakomba ekinyo; ndʼewelʼeko loyabuzʼinyo mongo ndʼoeko, ko loyalema boeko, elʼemi nde boeko. Ko lofaofitʼinyo mongo la nyama nko loswele indakula ndʼokili. 45Elʼemi nde Yawe oyelakʼinyo limʼese eʼEjipeto, wete njaleme Nzakomba ekinyo. Ndʼewelʼeko, inyo loyalema beoko, elʼemi nde boeko.”
46Elengʼeko wae esekyelo ea nyama, lʼea tofulu, lʼea wengi nyama iyokende ndʼasi, ko lʼea wengi nyama indakula ndʼokili; 47ndʼewela wae locikwanya ikʼile la linyamo limʼikʼile feto, ko ndatsa nyama eleamaka la nyama etaleamaka.
Currently Selected:
Bisekyelo bia Ba-Lewi 11: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
