Ruth 3
3
Ruth giku Boaz wi Lelacam
1Man Naomi ma wang’u mire wacu ire kumae, Nyara, abiyenyo yom iri ngo, kara ebed ber iri? 2Kawono Boaz en e wat mwa ngo, m’ibedo ku jutic ma nyir pare? Nen, ekworo nganu wi lelacam diewor maeni. 3Ka kumeno dong’ ijom, iwir mo de, man ikend kendi, e ilor piny wi lelacam; ento kud iketh ng’atuno ng’ei, ma fok edaru camu ku madhu de ngo. 4Man ebibedo, kinde m’evuto piny, nia ibineno ka m’evuto i ie, e ibimondo, man ibiyabu wi tiende, e ibivuto piny; e ebiyero iri gin m’ibitimo. 5E edwoko lembe ire kumae, Lembe ceke m’iwacu abitimo.
6Man eloro piny wi lelacam, man etimo ceke calu wang’u mire wacu ire. 7Man ka Boaz udaru camu ku madhu de, anyong’a de nego adundene, ecidho nivuto ng’et cam ma judhuro: e ebino yo yo, man eyabu wi tiende, e evuto piny. 8Etimbre diewor ma ling’, nia lworo nego ng’atuno, man elokre gire; man, nen, nyaku vuto the tiende. 9E ewacu kumae, In i ng’a? E eloko lembe kumae, An a Ruth ma jatic peri ma nyaku: ka kumeno pedh bongu peri wi jatic peri ma nyaku; kum in i wat ma ceng’ni. 10Man ewacu kumae, Mugisa m’uai ba Yehova ukwenyi, nyara: inyutho bero ma cen m’usagu ma kwong’a, kum ilubo tok awobi ngo, kadok jucan kadi julonyo. 11Kawono, nyara, lworo kud unegi; abitimo iri gin ceke m’iwacu; kum adhura ceke mi dhanu para ging’eyo nia in i nyaku ma piri ber. 12#Rut 2:20Man en e andha nia an a wat ma ceng’ni; ento wat ma ceng’ni ma sagu an nuti. 13Koikur i diewor ma tin, man ebibedo kugweno, nia tek ebitimo iri maka pa wat, dre; wek etim maka pa wat: ento tek ebitimo maka pa wat iri ngo abilund timo maka pa wat iri, calu Yehova bedo kwo: vut cil kugweno.
14Man evuto the tiende cil kugweno: man eai malu ka fodi piny ulero ngo ma junendri kudo. Kum ewacu kumae, Ku jung’ei nia nyakune bino wi lelacam. 15Man ewacu kumae, Kel bongu m’abola ma ni i kumi, imake de; e emake; man eporo nganu mukero abusiel, ekethe de i wie: e ecidho i adhura. 16E kan ewok ba wang’u mire, epenje kumae, In i ng’a, nyara? E eyero ire gin ceke ma ng’atuno timo ire. 17Man ewacu kumae, Mukero nganu abusiel maeni emio ira; kum ewacu kumae, Kud ici mananu ba wang’u. 18Elund ewacu kumae, Bed asu, nyara, cil m’ing’eyo maram lembene bicungo ko; kum ng’atuno biyom ungo, cil m’edaru ko lembe maeni tinuni.
The Holy Bible In Alur (Lur), Revised Orthography © United Bible Societies, 1970.