Jurumi 13
13
1Ku ba pidoic ceke dong’ gibed wor the tego ma ni i wigi: kum won tego moko mbe ma kuai ba Mungu ngo: man weg tego ma nuti Mungu kethogi en. 2Ka kumeno ng’atu m’ujai ni won tego, meca ejai kum lembang’ola pa Mungu: man ju m’ujai gibinwang’u lembapoka i wigi gigi. 3Kum jubim gin ung’oindiri ngo ni tic ma ber, endre ni tic ma rac. Man iyenyo nia ibed umbe lworo kum won tego? tim maeno m’e ber, e ibinwang’u pak ba maeno: 4kum en e jatim pa Mungu iri pi bero. Ento tek itimo maeno m’e rac, dong’ lworo negi; kum eyeyo palamularu ngo ma there mbe: kum en e jatim pa Mungu, en e jaculkwor pi kwinyo ni ng’atu m’utimo rac. 5Kum kumeno maku wubed wor, kum kwinyo kende ngo, ento kum pidocwiny bende. 6#Mt 22:21; Mk 12:17; Lk 20:25Kum en e kum lembe nini m’uketho wumio ajok bende; kum gin gi jutim mi tic pa Mungu, ma gibedo asu i lembe maeni nini. 7Wumi ni dhanu ceke gin m’umaku piny; ajok ni ng’atu ma maku jujok ire ajok; jambng’om ni ng’atu ma maku jumi ire jambng’om; lworo ni ng’atu ma maku julwore; yung ni ng’atu ma maku juyunge.
8Kud wubed ku banja mi gin pa ng’atu moko, ndhu mari: kum ng’atu m’umaru wadi nwang’u etimo cik kakare. 9#Ai 20:14; Poi 5:18; Ai 20:13; Poi 5:17; Ai 20:15; Poi 5:19; Ai 20:17; Poi 5:21; Law 19:18Kum lembe nini, Kud igier gier, Kud ineg nek, Kud ikwal kwo, Kud iketh cwinyi hai kum piny, man tek lembang’ola moko mange nuti, ecokre i lembe maeni, e eni, Ibimaru wedu calu imeri giri. 10Mer timo rac ungo kum wadi: ka kumeno mer en e timbre kakare mi cik.
11Man Maeni, ma wung’eyo ko nindo ya kawwono en e kaceu ma wuceu ko ku wang’ nindo: kum kawono both ni ceng’ni wa ma sagu kinde ma wayio. 12Diewor uvoc, man rupiny udhingo: ka kumeno dong’ wawenyu tic mi mudho cen, man dong’ waronyu jamtho mi der. 13Dong’ wawothu calu ma maku wawothu, calu i dieceng’; i cok ma jucokri ko ku vul ungo ku mer ma jumer ko ku kong’o de ngo, i gier ma jugieri ko swa ku sasa de ngo, i dhau ku ngiri de ngo. 14Ento dong’ wurony Rwoth Yesu Kristu, man kud wuyik kaka ni kum, ni awanyane ma rac.
The Holy Bible In Alur (Lur), Revised Orthography © United Bible Societies, 1970.