Mika 3

Jukwero Jutelwic mi Israel

1Man awacu kumae, Wuwinji, akwayuwu, wu juwic pa Yakobo, man jubim mi ot mir Israel: en e iwu ngo nia wung’ei pokolembe? 2wun ma wudagu gin ma ber, man wumaru gin ma rac; wun ma wukabu dendkumgi kud i kumgi man ring’kumgi ku kum cogogi; 3ma wucamu ring’kum dhanu para bende, man wuyang’u dendkumgi kud i kumgi, man wuturo cogogi de, wutong’ogi de nziki nziki, calu mir agulu, man calu ring’kum i agulu. 4Gibilund ywak ba Yehova, ento ebiloko igi lembe ngo; eyo, ebipanu wang’e igi i nindo maeca, calu ma gitimo rac i giratima migi.

5Yehova wacu kumeni pi jubila m’uketho dhanu para kier; m’ukayu ku lakgi, m’uwacu de kumae, Kwiocwiny; man ng’atu ma tek uketho i dhoge ngo, giyiko ali i kume: 6Ka kumeno ebibedo diewor iwu, kara kud wubed ku ginmawokiwang’; e ebibedo mudho i iwu, kara kud wueu lembe; e ceng’ bimwony wi jubila, man ceng’ bibedo col i wigi. 7Man jubinyayu lewic wi jueulembe, man cwiny ajoga bing’abre; eyo, kagi ceke gibiumo dendhoggi, kum dwokolembe pa Mungu mbe. 8Ento an, apong’ ku tego ku Tipo pa Yehova, man ku pokolembe, man ku tego, kara ayer ni Yakobo pi gondri pare, man ni Israel pi dubo pare.

9Wuwinj maeni, akwayuwu, wu juwic mi ot pa Yakobo, man jubim mi ot mir Israel, ma wudagu pokolembe, man ma wuroco lem m’atira ceke. 10Gigomo Sayuni ku rimo, man Yerusalem ku kier. 11Juwicne poko lembe kum jamng’om, man julamne ponjo mi sukulia, jubilane de ewo lembe mi sente: ento gijengri kum Yehova, man giwacu kumae, Yehova ni i kindwa ngo? gin ma rac moko mbe ma bibino i kumwa. 12#Yer 26:18Ka kumeno jubifuro Sayuni calu podho, man Yerusalem bidoko ni uvuru, got mi ot de calu ka ma malu mi luli.

Currently Selected:

Mika 3: AB1970

Highlight

Copy

Compare