Luka 7
7
Yesu Keyo Kum Jamiru pa Jego
(Mt 8:5-13)
1Kan edaru lembe ceke i ith dhanu, emondo i Kapernaum. 2Jamiru pa jego moko, en e ng’atu ma kaewinye, kume lith man eyenyo tho. 3Kan ewinjo pi Yesu, eoro judong Juyahudi i bang’e, m’upenje nia ebin elar jamiru pare. 4Gin de, ka gibino ba Yesu, gikwaye ma tek, giwacu kumae, Ng’atuno romo nia itim maeni ire; 5kum emaru thek mwa, man egomo iwa kacokri mwa en. 6E Yesu gicidho gikugi. Man kan ewok ceng’ni ot, jego oro jurimbe i bang’e, ma giwacu ire kumae, Rwoth, kud isendri giri; kum an aromo ngo nia imond i ot para: 7kum kumeno ia pido nia aromo ngo m’abin ko i beng’i: ento yer lembe ci, e kum jamiru para bikei. 8Kum an a ng’atu ma juketho the ng’ol, m’abedo kud asikari i tienda: awacu ba ng’atu maeni, Cidhi, e ecidho; ni mange de, Bin, e ebino; ni jamiru para de, Tim mae, e etime. 9Ka Yesu winjo gin maeni, ie wang’ lii i kume, man elokre ewacu ni udul dhanu m’ulube kumae, Awacu iwu kumae, Fodi anwang’u yioyic ma dit ma kumeni ngo, ungo, i Israel de ngo. 10E ju ma juorogi de, ka gidwogo ba ot, ginwang’u kum jamiru kei.
Yesu Ting’o Wod Dhaku ma Cware Tho
11Man etimbre yo ku ng’ei maeni nyanok, nia ecidho bang’ adhura ma julwong’o Nain; julubne gicidho gikugi, kud udul dhanu ma dit. 12Nie kan ewok ceng’ni dhugang’ mir adhura, nen, juyeyo avu dhanu, en e wod min kulong’, en de e dhaku ma cware tho: man dhanu dupa mir adhura ginuti gikugi. 13Ka Rwoth unene, ngisi nege i kume, man ewacu ire kumae, Kud iywaki. 14Man ecoro ceng’ni emulo kika de: e ju m’uyeye gicungo gr. Man ewacu kumae, Jalawobi, awacu iri, Ai malu. 15E ng’atu m’utho uai malu, ebedo wi there, emaku weco. Man emie ni min. 16E lworo makugi kagi ceke: man giyungo Mungu, giwacu kumae, Jabila ma dit uwok i kindwa: man, Mungu liewo dhanu pare. 17Rwonglembe maeni yik pire i Yahudi ngung’, man i ng’om ceke ma ceng’ni.
Jukwenda M’uai ba Yohana ma Jabaputisi
(Mt 11:2-19)
18Man julub Yohana giyero ire pi gin maeni ceke. 19Man Yohana lwong’o kind julubne ario i bang’e eorogi de ba Rwoth, ewacu kumae, In i ng’atu m’ubebino, kadi wakur mange? 20E ka dhanu wok i bang’e, giwacu kumae, Yohana ma Jabaputisi orowa i beng’i, epenjo kumae, In i ng’atu m’ubebino, kadi wakur mange? 21I saa maeno ekeyo tho dupa m’unyang’ i kum, ku thong’om man tipo ma rac; ju ma abinga dupa de eketho gineno piny. 22#Isa 35:5, 6; Isa 61:1Edwoko lembe ewacu igi kumae, Wuciyer ni Yohana pi gin ma wuneno ma wuwinjo de; abinga neno piny, weg abala mi tielo de giwotho, weg joi kumgi doko leng’, ju ma ithgi dhing’ de giwinjo, ju m’utho ndhu de gicer, lembanyong’a ma juboth ko de y ere ni jucan. 23Mugisa ni ng’atu m’unwang’u lembe moko ngo m’ekier i wie ni kuma.
24Ka jukwenda pa Yohana ai, emaku yero lembe pi Yohana ni udul dhanu kumae, Wucidho woko i yamba nineno ang’o? undodi m’uyengre ku yamu? 25Ento wucidho woko nineno ang’o? ng’atu m’uronjre ku kendi ma yomi? Nen, ju m’ukendo kendi m’urieny, m’ubedo ku lonyo de, gini i udi mir ubimo. 26Ento wucidho woko nineno ang’o? jabila? Eyo, awacu iwu, ma sagu jabila dit. 27#Mal 3:1Maeni ng’atu ma jugoro pire kumae,
Nen, aoro jakwenda para i weng’i,
Ma biyiko yo peri i weng’i.
28Ayero iwu kumae, I kind ju ma mon unyolo, ng’atu moko mbe ma sagu Yohana: ento ng’atu ma en e nok i ker pa Mungu re e m’usage. 29#Mt 21:32; Lk 3:12Dhanu ceke de ka giwinjo, ku weg ajok de, gimio bedopwe ni Mungu, gi ju m’umaku baputisi ba Yohana. 30Ento Jufarisayo ku jueuthecik gikwero lembapora pa Mungu igi gigi, gi ju ma gimaku baputisi ngo i bang’e. 31Abilund poro dhanum’utuk maeni kud ang’o, man gi calu ang’o? 32Gi calu nyithindho m’ubedo i katali, m’ulwongri i kindgi; m’uwacu kumae, Wakudho usegu iwu, man wumiel ungo; wawero wejawu, wuywak de ngo. 33Kum Yohana ma Jabaputisi bino ku camu kwen ungo kadok ku madhu pigulok de ngo; wuwacu de kumae, E won pajogi. 34Wod dhanu bino ku camu ku madhu de: man wuwacu kumae, Nen, ng’atu ma jambo, man andre pigulok, jarimb weg ajok ku judubo de! 35E rieko nwang’u bedopwe ni kum nyithindhe ceke.
Yesu i Ot pa Simon ma Jafarisayo
36Kind Jufarisayo acel uyenyo ya gicam gikude. Man emondo i ot pa Jafarisayo, ebedo dhu cam de. 37#Mt 26:7; Mk 14:3; Yoh 12:3Nen, dhaku nuti i adhurane ma won dubo; man kan eng’eyo nia ebedo dhu cam i ot pa Jafarisayo, ekelo cupa mi kidi ma ber ma ie ju mo, 38ecungo ko yor i ng’eye ba tiende, ku ywak, man emaku cwiro piwang’e wi tiende, eyweyogi de ku yukwie, man ecwio tiende, ewirogi de ku mo. 39Nie ka Jafarisayo m’ulwong’e neno maeni, eyero kud i ie, ewacu kumae, Ng’atu maeni, tek en e jabila, kuno di eng’eyo nia dhaku maeni en e ng’a en e ng’atu manedi m’umulo kume, nia en e jadubo. 40Yesu dwoko lembe ewacu ire kumae, Simon, abedo ku gin moko m’ayer iri. Eloko lembe kumae, Japonji, yer. 41Ng’atu moko m’umio jupiny ni banja ebedo ku jubanja ario: acel banja pare denarii dak abic, mange ke pier abic. 42Ka gimbe ku gin ma gicul ka wang’e, eweko igi gin ario. Ka kumeno makani ma kind juario maeni ma bimare ma sagu? 43Simon uloko lembe ewacu kumae, Awacu nyo ng’atu m’eweko lem pare dit ma sagu. E ewacu ire kumae, Ipoko lembe pwe. 44Elokre ba dhaku, man ewacu ni Simon kumae, Ineno dhaku maeni? Amondo i ot peri, imio pi ira ngo mi tienda: ento ecwiro piwang’e wi tienda, eyweyogi de ku yukwie. 45Icwio limba ngo: ento en, ugambre i kinde m’amondo, eweko cwio tienda ngo. 46Iwiro mo i wia ngo: ento ewiro tienda ku mo. 47Kum kumeno awacu iri kumae, Dubo pare, m’ubedo dupa, uwekre woko; kum emaru dit: ento ng’atu ma juweko ire nyanok, ng’atuno maru nyanok. 48Ewacu ire kumae, Dubo peri wekre woko. 49Ju ma gibedo kugi dhu cam de gimaku wacu i igi gigi kumae, Ng’atu mae ma weko dubo woko en e ng’a? 50Ewacu ni i dhaku kumae, Yioyic peri e m’ubodhi; cidh ma cwinyi kwio.
Currently Selected:
Luka 7: AB1970
Highlight
Share
Copy
Want to have your highlights saved across all your devices? Sign up or sign in
The Holy Bible In Alur (Lur), Revised Orthography © United Bible Societies, 1970.