Hoseya 10

1Israel en e ulok m’uvugni, m’ucego nyinge: calku sagri mi nyinge emedo pemblam pare; calku bero mi ng’om migi gitimo mbegi ma ber. 2Adundegi pokre; kawono jubinwang’u lembe i wigi: ebigoyo pemblam migi, ebinyotho mbegi migi. 3Andha kawono gibiwacu kumae, Ubimo mwa mbe; kum walworo Yehova ngo; man ubimo, ecopo timo ang’o piwa?

4Giweco lembe mananu, ma gibekwong’o kwong’ mi ndra i timo lembariba: ka kumeno lembapoka wodhre calu yen ma kec i thuthu mi podho. 5Ju m’ubedo Samaria ndiri binegogi pi nyithi dhiang’ mi Beth-aven; kum dhanune biywage, man julamne ma anyong’a negogi pire, kum dwong’ne, kum eweke. 6Jubitere Ascur bende pi giramia ni ubimo Yareb: Efraim binwang’u lewic, man lewic binego Israel kum lembapora pare gire. 7Pi Samaria, jukabu ubimo pare woko, calu voi ma wi pi. 8#Lk 23:30; Nyu 6:16Ka ma malu bende mir Aven, ma dubo mir Israel, jubinyotho: ukudho kud ucok bitwi wi pemblam migi; e gibiwacu ni gudi kumae, Umwa; man ni ungulu gudi kumae, Podh i wiwa.

9 # Pok 19:1-30 E Israel, idubo ugambre i ceng’ mi Gibeya: gicungo kuca; lwiny kum nyithindho mi dubo rubogi ngo i Gibeya. 10Kinde m’ayenyo, abiponjogi; man kodhidhanu bicokri i wigi, kinde ma gibedo atwia kum gondri migi ario. 11Man Efraim en e rwaya ma juponjo, m’umaru yoko cam ku tiende; ento akadhu ku wi ng’ute ma ber: abiketho jaidh wi Efraim; Yuda bifuro, Yakobo bing’enyo thunglune.

12 # Yer 4:3 Wucoi iwu giwu i bedopwe, wukai calku kisa; wufur ng’om mu ma wuweko; kum en e nindo ma juyenyo ie Yehova, maram ebino ko ekonjo bedopwe de i wiwu. 13Wufuro dubo, wukayu kier; wucamu nying’ ndra; kum igeno yo peri, man udul dhanu peri ma jukero. 14Ka kumeno yakni biwok i kind dhanu peri, man ka ma tek peri ceke binyothre, calu Caiman unyotho Beth-arbel i nindo mi lwiny: jurwadu mego nziki nziki ku nyithindho pare. 15Beth-el bitimo kumeca i kumwu kum dubo mu ma dit: ka piny uru jubikabu ubimo mir Israel pet.

Currently Selected:

Hoseya 10: AB1970

Highlight

Copy

Compare