Hagai 2

Dwong’ mi Hekalu ma Nyen

1I dwi mir abirone, i ceng’ pier ario wi acende mi dwije, lembe pa Yehova bino ku dhu Hagai ma jabila, m’uwacu kumae, 2Kawono yer ni Zerubabel ma wod Cealtiel, ma jabim mi Yuda, man ni Yocuwa ma wod Yehozadak, ma jalam ma dit, man ni dong’ dhanu, wac kumae, 3#Ezr 3:12Ng’a m’udong’ i kindwu m’uneno ot maeni i dwong’ pare ma kwong’a? man wunene kawono nenedi? ebedo i weng’wu ngo calu gin moko ngo? 4Ento kawono wubed tek, E Zerubabel, Yehova wacu; man bed tek, E Yocuwa, ma wod Yehozadak, ma jalam ma dit; man wubed tek, wu dhanu ceke mi ng’om, Yehova wacu, man wutim tic: kum wanuti wakudu, Yehova mir udul uwacu, 5#Ai 29:45, 46calku lembe ma waribo wakudu ka wuai kud i Misiri, man Tipona bedo i kindwu: kud wulwor. 6#Ebr 12:26Kum Yehova mir udul uwacu kumae: Wang’ acel kendo, en e fodi nyanok, e abiyengo polo, ku ng’om, man nam, ku ng’om m’uthwo: 7man abiyengo thek ceke; man gin ma juketho cwiny i kume mi thek ceke bibino; e abipong’o ot maeni ku dwong’ Yehova mir udul uwacu. 8Mola ma tar en e para, mola ma kwar de en e para, Yehova mir udul uwacu. 9Dwong’ ma cen mi ot maeni bisagu ma kwong’a, Yehova mir udul uwacu; man i ka maeni abimio kwiocwiny, Yehova mir udul uwacu.

Cim ni Dhanu kum Bedo Mandha Ngo Migi

10I ceng’ pier ario wi ang’wende mi dwi abung’wende, i rundi mir arionde pa Dario, lembe pa Yehova bino ku dhu Hagai ma jabila, m’uwacu kumae, 11Yehova mir udul uwacu kumae: Kawono penj julam pi cik, wac kumae, 12Tek ng’atu moko yeyo ring’kum ma leng’ dhu kendi pare, man tek dhu kendi pare mulo kum kwen, kadi dek, kadi pigulok, kadi mo, kadi cemo moko, ebidoko leng’i? Man julam uloko lembe e giwacu kumae, Ungo. 13#Wel 19:11-22Hagai lund uwacu kumae, Tek ng’atu moko m’ucido ni kum avu mulo gin maeni moko, ebicido? E julam giloko lembe giwacu kumae, Ebicido. 14Hagai lund uloko lembe man ewacu kumae, Dhanu maeni bedo kumeni, man thek maeni bedo kumeni i wang’a, Yehova wacu; man tic mi cing’gi kubang’e kubang’e bedo kumeni; man gin ma githiero keca ecido. 15E kawono, akwayuwu, iwu pid ugambre i ceng’ maeni ku ma kwong’a, ma fodi jukuketho kidi wi kidi wagi ngo i hekalu pa Yehova. 16I nindo maeca ceke, ka ng’atu acel ubino bang’ udhuru mi mukero pier ario, en e apar kende; ka ng’atu moko bino ba pany ma bio pigulok kara ewodh pigulok mir agulu pier abic, ebedo pier ario kende. 17Agoyowu ku motho man laimo ku pei i tic ceke mi cingwu; ento wulokru i bang’a ngo, Yehova wacu. 18Akwayuwu, iwu pidi; ugambre i ceng’ maeni man m’ukadhu, ugambre i ceng’ pier ario wi ang’wende mi dwi abung’wende, ugambre i ceng’ ma juguro ie the hekalu pa Yehova, wupid pire. 19Kodhi fodi ni i dero? eyo, ulok, man yendubolo, kud ulemo, man yendulam gicego gin moko ngo; ugambre i ceng’ maeni abimio mugisa iwu.

Lembang’ola pa Yehova ni Zerubabel

20Man lembe pa Yehova bino wang’ arionde ba Hagai i ceng’ pier ario wi ang’wende mi dwi; m’uwacu kumae, 21Yer ni Zerubabel ma jabim mi Yuda, wac kumae, Abiyengo polo ku ng’om; 22man abiredho komker mi ker; man abinyotho tego mi ker mi thek; man abiredho magali, ku ju m’uringo i igi; man riuni ku ju m’ubedo i wigi gibipodho piny, ng’atuman ku palamularu pa wadi. 23I ceng’ maeca, Yehova mir udul uwacu, abigemi, E Zerubabel, ma jatic para, ma wod Cealtiel, Yehova wacu, man abiketho ibedo calu lagith mir ayi; kum agoyo wii, Yehova mir udul uwacu.

Currently Selected:

Hagai 2: AB1970

Highlight

Copy

Compare