Ester 4
4
Ester Ung’olo nia Ebikwayu pi Jupagi
1Nie ka Mordekai ng’eyo gin ceke m’utimbre, Mordekai yeco kendi pare, man eronyo usuba ku vuru, e ecidho woko i dier adhura, man eywak ku ywak ma dit man mi can; 2e ewok cil wang’ dhugang’ p’ubimo: kum ng’atu moko mbe ma copo mondo dhugang’ p’ubimo tek eronyo usuba. 3Man i ng’etker ceke kubang’e kubang’e, ma tek lembang’ola p’ubimo ku cik pare wok, ywak ma dit bedo nuti i kind Juyahudi, ku kwero cam, man ywak, ku goyo nduru: e dupa vuto i usuba ku vuru.
4Man jutic ma nyir pa Ester ku jutic pare gibino giyero maeni ire; e can umaku ci ubimo apila: man eoro kendi kara Mordekai kendi, man kara ekab usuba kud i kume; ento ejole ngo. 5Ester ulund ulwong’o Hatak, ma ng’atu acel ma kind jutic p’ubimo, m’eketho kara etim ire, man eng’olo ire ya eci ba Mordekai, kara eng’ei thelembene, man there nedi. 6Kum kumeno Hatak ucidho woko ba Mordekai ba ka ma lac mir adhura, ma en e nyim dhugang’ p’ubimo. 7Man Mordekai yero ire pi gin ceke m’utimbre ire, ku wel ma cu mi mola ma tar ma Haman ung’olo y a ebiketho i kakanpiny p’ubimo pi Juyahudi, kara junyothgi. 8Emio ire waraga mi lembagora mi cik de ma jumio i Cucan kara junyothgi, ya enyuth ni Ester, man kara eyere ire, man ning’olo ire nia maku ecidh bang’ ubimo, kara ekwaye, man epenje, pi juthugi. 9E Hatak ubino man eyero ni Ester lembe pa Mordekai. 10Ester ulund uyero ni Hatak, man emio ire lembe ni Mordekai, ewacu kumae: 11Jutic p’ubimo ceke, man dhanu mi ng’etker p’ubimo, ging’eyo, nia ng’atu moko, kadok en e nico kadi dhaku, ma tek ebimondo bang’ ubimo i lelagang’ ma yor i ie, ma jukulwong’e alwong’a ngo, cik acel nuti ire, nia junege, tek ubimo kuting’o uluth mi ker mi mola ma kwar ungo, kara ebed kwo: ento an julwong’a ngo ya amond bang’ ubimo ceng’ pier adek maeni. 12Man giyero lembe pa Ester ni Mordekai.
13Mordekai lund uwacu igi ya gidwok lembe ni Ester kumae, Ii kud upid i kumi giri nia ibiboth i ot p’ubimo, ma sagu Juyahudi wedu mange ceke. 14Kum tek ibedo ling’ asu i nindo maeni, kony ku both bilund wok ni Juyahudi ku yo ku mange, ento in ku ot pa wuru binyothre: man ng’a m’ung’eyo tek iwok i ker pi wagi nindo ma kumeni? 15E Ester ulund uwacu igi ya gidwok lembe ni Mordekai kumae, 16Cidhi, icok Juyahudi ceke ma ginuti i Cucan, man wuwek cam pira, man kud wucam kadok amadha de i nindo mi ceng’ adek, diewor kadi dieceng’: an bende ku jutic para ma nyir wabiweko cam kumeno; e kumeno abimondo bang’ ubimo, ma en e calku cik ungo: man tek arwinyo, de arwiny. 17Ka kumeno Mordekai cidho, man etimo calku gin ceke ma Ester ung’olo.
The Holy Bible In Alur (Lur), Revised Orthography © United Bible Societies, 1970.