Ester 2
2
Juketho Ester ni Ci Ubimo
1Yo ng’ei gin maeni, ka kwinyo p’ubimo ma Ahasuerus ukwio, epoi kum Vacti, man kum gin m’etimo, man kum gin ma jung’olo i wie. 2Jutic p’ubimo ma gitimo ire gilund giwacu kumae, Dong’ juyeny nyir ma wang’gi leng’ ni ubimo: 3man wek ubimo keth jego i ng’etker ceke mi ker pare, kara gicok nyir ma wang’gi leng’ ceke karacelo gici Cucan ma odker, ba odmon, the cing’ Hegai ma jatic p’ubimo, ma jagwok mon; man dong’ jumi igi gin mi dwokrileng’; 4man wek nyaku m’ubimo maru ubed ci ubimo i ka Vacti. E lembene maku i ubimo; e etimo kumeni.
5Jayahudi moko nuti i Cucan ma odker, ma nyinge Mordekai, ma wod Yair, ma wod Cimei, ma wod Kic, e ng’atu ma Jabenyamini, 6#2 Ub 24:10-16; 2 Kei 36:10ma juyakugi kud i Yerusalem karacelo ku ju ma giyaku karacelo ku Yekonia m’ubimo mi Yuda, ma Nebukadnezar m’ubimo mi Babeli yaku. 7Man etungo Hadasa, ma en e Ester ma nya neru mire: kum won kadok min de mbe, man nyakune wang’e leng’ man ber mir anena; e ka won ku min githo, Mordekai game ni nyare ma dhe. 8Ka kumeno etimbre, ka lembang’ola p’ubimo man cik pare winjre, man ka jucoko nyir dupa karacelo i Cucan ma odker, the cing’ Hegai, nia jutero Ester i ot p’ubimo, the cing’ Hegai, ma jagwok mon. 9E nyakune bedo ber i wang’e, man enwang’u bero i bang’e; man emio ire gin mi dwokrileng’ pare pio pio, ku ng’et piny pare, ku jutic ma nyir abiro m’ubedo ber ya jumi ire kud i ot p’ubimo: man ekethe ku jutic pare ma nyir i ka m’usagu i ot mi mon. 10Fodi Ester uketho jung’eyo juthugi ngo kadok wat pare de; kum Mordekai ng’olo ire nia kud eketh jung’ei. 11Man Mordekai wotho ceng’ ceke i wang’ lelagang’ mi odmon, kara eng’ei maram Ester ubedo ko, man gin ma bitimbre i kume.
12Nie ka nindo mi nyir kubang’gi kubang’gi wok ma gimondo ko bang’ ubimo ma Ahasuerus, yo ng’ei ma jutimo i kume calku cik mi mon dwi apar wi ario (kum kumeno ceng’ mi dwokrileng’ migi thum, lembene kumae, dwi abusiel ku mo ma ng’wice ng’ar, man dwi abusiel ku ng’wic gin ma ng’ar ku gin mi dwokrileng’ mi mon), 13nyaku lund bino kumae i wang’ ubimo: Gin ma tek eyenyo jumio ire e ecidho kudo kud i odmon i ot p’ubimo. 14Ecidho uthieno, man edwogo urwone i ot mir arionde mi mon the cing’ Cacgaz, ma jatic p’ubimo, ma gwoko mon m’araga; emondo bang’ ubimo kendo ngo, tek ubimo kumare en ungo, man tek julwong’e ku nyinge ngo. 15Nie ka nindo pa Ester, ma nyar Abihail ma neru Mordekai, m’ugame ni nyare, ubino m’ecidho ko bang’ ubimo, elwong’o gin moko ngo ento gin ma Hegai ma jatic p’ubimo ma jagwok mon uketho. E Ester unwaug’u bero i wang’ dhanu ceke m’unene.
16Ka kumeno jutero Ester bang’ ubimo ma Ahasuerus i ot pare mi ker i dwi mir apaje, ma en e dwi Tebeth, i rundi mir abirone mi camuker pare. 17Man ubimo maru Ester ma sagu mon ceke, man enwang’u bero ku ngisi i wang’e ma sagu nyir ceke; ketho nia eketho jamkermiwic i wie, man edwoke ni ci ubimo kaka Vacti. 18Ubimo lund uketho agba ni judongomawijo ku jutic pare ceke, en e agba pa Ester; man eketho yom ni ng’etker, emio giramia de, calku laccing’ p’ubimo.
Mordekai Utuco Lembapora mi Judegi p’Ubimo
19E ka jucoko nyir karacelo wang’ arionde, Mordekai lund ubedo dhugang’ p’ubimo. 20Fodi Ester kuketho wat pare kadi juthugi de ng’eire ngo; calu Mordekai ng’olo ire; kum Ester utimo lembang’ola pa Mordekai, calu kan ebetunge. 21I ceng’ maeca, kinde ma Mordekai bedo dhugang’ p’ubimo, jutic ario p’ubimo, Bigthan ku Terec, mi ju ma kuro dhugola, kwinyo makugi, e giyenyo giketh cing’gi kum ubimo ma Ahasuerus. 22E gin maeno ng’eire ni Mordekai, e enyuthe ni Ester ma ci ubimo; man Ester uyero lembene ni ubimo ku nying’ Mordekai. 23E ka jukoro i lembene, junwang’u ebedo kumeno de, juliero gin ario kum yen: e jugore i kitabu mi kei i wang’ ubimo.
The Holy Bible In Alur (Lur), Revised Orthography © United Bible Societies, 1970.