Tic Mi Jukwenda 7
7
Wec pa Stefano i Wang’ Dilo
1Man jalam ma dit uwacu kumae, Gin maeni kumeno? 2#Tha 12:1Man eloko kumae, Umego ku wego de, wukowuwinji: Mungu mi dwong’ unyuthre ni wegwa ma Ibrahim, kan eni i Mesopotamia, ka fodi ebedo i Haran ungo, 3man ewacu ire kumae, Dong’ iai woko kud i ng’om ma thu, kud i kind jupeu de, man ibin i ng’om m’abinyutho iri. 4#Tha 11:31; Tha 12:4E elund eai kud i ng’om mi Jukaldayo, man ebedo i Haran: ku kuca, ka won utho, Mungu dake i ng’ombuni, ma wubedo i ie kawono: 5#Tha 12:7; 13:15; 15:18; 17:8man emio ire aba i ie ngo, ungo, ma romo tiende de ngo: man eng’olo ya ebimie ire ni jupiny pare, ni nyikwaye de yo ku ng’eye, ma fodi nyathin pare de mbe. 6#Tha 15:13, 14E Mungu wacu calu mae, nia nyikwaye bibedo i ng’om ma nyo ci, nia jubidwokogi de ni ng’eca, man jubitimogi rac rundi dak ang’wen. 7#Ai 3:12E Mungu wacu kumae, Abipoko lembe mi thek ma gibedo ng’eca igi: e yo ng’eye gibiai woko, man gibitimo ira kakeni. 8#Tha 17:10-14; Tha 21:2-4; Tha 25:26; Tha 29:31-35:18Man emio ire lembariba mi yaa: ka kumeno Ibrahim unyolo Isak, man i ceng’ mir aborane etimo yaa i kume; Isak de nyolo Yakobo, Yakobo ke nyolo kwaru apar wi ario. 9#Tha 37:11; Tha 37:28; Tha 39:2, 21Man kwaru, ma nyeko timogi kum Yusuf, ging’iewe i Misiri; e Mungu de ni i bang’e, 10#Tha 41:39-41elare de kud i can pare ceke, man emio ire bero ku rieko i wang’ Farao m’ubimo mi Misiri; man edwoke ni jabim wi Misiri ku wi ot pare de ceke. 11#Tha 42:1, 2Nie ndru podho i Misiri ku Kanan ngung’, ku can ma dit. Giracama de kwaruwa nwang’u ngo. 12Ento ka Yakobo winjo ya cam nuti i Misiri, elar eoro kwaruwa wang’ acel. 13#Tha 45:1; Tha 45:16Mir arionde Yusuf ung’eire ni utumin; man thek pa Yusuf ung’eire ni Farao. 14#Tha 45:9, 10, 17, 18; Tha 46:27E Yusuf uoro, man elwong’o Yakobo ma won mire ubin i bang’e, ku jupagi ceke, dhanu pier abiro wi abic. 15#Tha 46:1-7; Tha 49:33E Yakobo loro piny i Misiri; e egam etho, giku kwaruwa de; 16#Tha 23:3-16; 33:19; 50:7-13; Yoc 24:32man juyeyogi juterogi kuca i Cekem, e jukethogi i odliel ma Ibrahim ung’iewo ku jupiny mi mola ma tar ba wot Emor ma i Cekem. 17#Ai 1:7, 8Ento ka nindo ma lembang’ola ma yang’ Mungu ng’olo ni Ibrahim udhingo timbre, dhanune ginyai gimedri i Misiri, 18rama ubimo mange camu ko ker i Misiri, m’ung’eyo Yusuf ungo. 19#Ai 1:10, 11; Ai 1:22Ng’atuca bombo thek mwa, man etimo rac kum kwaruwa, ya gibai mukere migi woko kara ku gibed kwo. 20#Ai 2:2I nindo nica junyolo Musa, man kite leng’ mumbe; e jugwoke i ot pa won dwi adek: 21#Ai 2:3-10e ka jubaye, nya Farao uting’e, man etunge ka wode ma dhe. 22Man juponjo Musa ku rieko ceke mi Jumisiri; ebedo dwong’ de i lembe pare i tic pare de. 23#Ai 2:11-15Ento kinde ma rundi pare maku doko pier ang’wen, lembe wok i adundene ya elieu jupagi ma gi nyithi Israel. 24Man kan eneno ng’atu acel ma jutime rac, egam elare, man eculo kwor pi ng’atu ma jubesendo, egam enego Jamisiri: 25e ie wacu ya jupagi ging’eyo nia Mungu bemio igi both ku cinge en e Musa; karaman ging’eyo ngo. 26Urwone ewok i bang’gi kinde ma gibenyego, man eyenyo etheggi, ewacu kumae, Paco, wun umego; wutimo rac ba juwedu nedi ma ng’atuman utimo ba wadi man ba wadi e? 27Ento ng’atu acel m’utimo rac kum wadi ucwale mire cen, ewacu kumae, Ng’a m’uketho idok jabim i wiwa ku japoklembe de? 28Iyenyo inega, pami nyaworo inego Jamisiri? 29#Ai 18:3, 4E Musa piei kum lembe nini, man edoko jabedo i ng’om Midiani, ka m’enyolo ie wote ario. 30#Ai 3:1-10E ka rundi pier ang’wen uthum malaika wok i bang’e i yamba mi got Sinai, i lebmac ma i yen m’udinyo. 31E kinde ma Musa nene, ie wang’ lii kum giranena maeno: e kan ecoro ceng’ni nineno, dwand Rwoth ubino kumae, 32An a Mungu pa kwaru, Mungu pa Ibrahim, man pa Isak, man pa Yakobo. E kum Musa miel, man ebedo ku tegocwiny ungo m’enen ko. 33Man Rwoth uwacu ire kumae, Gony wara woko kud i tiendi: kum ka m’icungo i ie en e ng’om ma leng’. 34Aneno can mi dhanu para andha ma gini i Misiri, man awinjo ba cur migi, e aloro piny nigonyogi: kawono koibin, abiori i Misiri. 35#Ai 2:14Musa maeni ma gikwere, giwacu kumae, Ng’a m’uketho idok jabim ku japoklembe de? e en nini e ma Mungu ore nibedo jabim ku jalar bende ku cing’ malaika m’uwok i bang’e i yen m’udinyo. 36#Ai 7:3; Ai 14:21; Wel 14:33Ng’atuni e m’utelo wigi woko, ku yo ng’ei musana ku giranyutha de m’etimo i Misiri, man i nam Makwar, kud i yamba de rundi pier ang’wen. 37#Poi 18:15, 18En e Musa maeno m’ewacu ni nyithindho pa Israel kumae, Mungu biting’o iwu jabila kud i kind juwedu, ma calu an. 38#Ai 19:1-20:17; Poi 5:1-33Maeni en ma yang’ eni i kanisa i yamba giku malaika m’uweco i bang’e i got Sinai, man ku kwaruwa bende: m’egamu wec mi kwo ya emi iwa: 39kwaruwa giyio ngo ya gibed wor ire, ento gicore cen, e gilokri ku i adundegi ni Misiri, 40#Ai 32:1giwacu ni Harun kumae, Thiedh iwa’mungu ma bitelo wiwa: kum Musa maeni, ma naka telo wiwa m’uwodhowa kud i ng’om Misiri, wang’eyo gin m’utimbre i kume ngo. 41#Ai 32:2-6Man i ceng’ maeca githiedho nyathi dhiang’, e gikelo lam ni ayi gin m’acwia nica, man gifoiri kum tic mi cing’gi. 42#Amo 5:25-27Ento Mungu lokre, man ekunogi ya gitim ni udul mi polo; calu jugoro i kitabu mi jubila kumae,
Wumio ira lim m’anega ku lam de
I yamba nindo pier ang’wen, E juot pa Israeli?
43Man wuting’o hema pa Molok,
Ku cero mi mungu ma Refan bende,
Ayi gin ma wutimo ya wurwo i bang’gi:
E abiterowu cen ng’ei Babeli.
44 #
Ai 25:9, 40 Kwaruwa gibedo ku hema mi lembatuca i yamba, cil calu eng’olo m’ewacu ni Musa, ya etime calu ayi m’eneno. 45#Yoc 3:14-17Ma kwaruwa bende, i nindo migi, gikelo i ie giku Yocuwagi ka gimwonyo ng’om mi thek, ma Mungu riemo woko kud i wang’ kwaruwa, cil i ceng’ pa Daudi; 46#2 Sam 7:1-16; 1 Kei 17:1-14m’unwang’u bero i wang’ Mungu, man epenjo ya enwang’ kabedo ni Mungu pa Yakobo. 47#1 Ub 6:1-38; 2 Kei 3:1-17Ento Suleman e m’udong’ ugomo ot ire. 48Ento Ng’atu ma Malu Ngbir bedo i udi ma jugomo ku cing’ ungo; calu yang’ jabila wacu kumae,
49 #
Isa 66:1, 2 Polo en e komker para,
Ng’om ke kom mi tienda:
Ot manedi ma wubigomo ira? Rwoth uwacu:
Kadi kani ma kayom para?
50Cinga cwio gin maeni ceke en ungo?
51 #
Isa 63:10
Wun ma ng’utwu cikre ma wukutimo yaa ngo kum adundewu kum ithwu de, wucero Tipo Maleng’ thiri thiri: calu ma yang’ kwaruwu gibegitimo, e wun bende wutimo kumeca. 52Jubila makani ma yang’ kwaruwu gikunyayu ragedo i kumgi ngo? man ginego ju ma gilar ginyutho kabino pa Ng’atu ma Pwe; ng’atu ma kawono wudoko jucibne ku junekne; 53wun ma wujolo cik calu malaika ng’olo, ere wuwore ngo.
Jucanyu Stefano ku Kidi
54E ka giwinjo gin maeni ethumo adundegi, man ging’enjo lakgi i kume. 55Ento en, ma Tipo Maleng’ urome, eneno i polo tel, man eneno dwong’ pa Mungu, ku Yesu de m’ucungo yo ku cing’ Mungu ma yor acwic, 56man ewacu kumae, Nen, aneno polo yabre, ku Wod dhanu m’ucungo acunga yo ku cing’ Mungu ma yor acwic. 57Ento gin gikok ku dwandgi ma tek, giculo ithgi de, e gikonjri i kume vur; 58e gibaye woko kud i adhura, man gicanye ku kidi: jumulembe de giketho kendi migi the tiend jalawobi ma nyinge Saul. 59E gicanyu Stefano ku kidi, m’ebelwong’o Rwoth, ewacu kumae, Rwoth Yesu, joi tipona. 60E erum piny, man ekok ku dwande ma tek kumae, Rwoth, kud iketh dubo maeni i kumgi. E kinde m’eyero maeni, enindo.
The Holy Bible In Alur (Lur), Revised Orthography © United Bible Societies, 1970.