Tic Mi Jukwenda 28
28
Paolo wi Cula Melita
1E ka waboth, walund wang’eyo nia cula nino julwong’o Melita. 2Dhanu ma saine gi juwat dit i kumwa: kum gikudho mac, man gijolo wa ceke, kum koth m’ubecwi, man kum koyo. 3Ento ka Paolo coko with yen eketho gi de i mac, thwol uai i ie ni lietho mi mac, edhokre de ng’ut cinge. 4Ka dhanu ma saine gineno yedi m’uliere kum cinge, giwacu gigi kumae, Kuno nyo ng’atuni en e janek, ma, kadok eboth kud i nam, ento Pokolembe ma pwe weke ngo ebed kwo. 5Ento ekiro yedine i mac, gin moko ma rac de mbe m’udong’ utime. 6Ento giwacu nyo ebikwode, kadi ebipodho bir m’etho: ere ka gikuro hai gineno gin moko ma rac umbe m’utime, giloko pidoigi, man giwacu nia en e mungu.
7Nwang’u kakeca bedo ceng’ni ku podho pa rwoth mi cula nino, ma nyinge Publie; m’ejolowa, egwokowa ber ceng’ adek. 8E ebedo kumeno, nia won Publio vuto ku kume m’ucek ku thorimo: e Paolo mondo i bang’e, erwo de, eketho cinge de i kume ekeyo ko kume. 9Ka maeni timbre, ju m’udong’ de ma gi weg tho i cula nino gibino, gin de kumgi kei: 10joni bende giyungowa ku yung dupa; e kinde ma wacidho ku yo mi pi, gikelo gin ma cande negowa giketho i combo.
Paolo Tundo i Rumi
11Man ka dwi adek ukadhu watugo woth ku yo mi pi i combo ma Iskanderia m’ucungo i cula i nindo mi koyo, giranyuthane Umego ma Rut#Umego ma Rut = mungu m’araga ma girwo igi. 12E waeomo Surakusa, man wario keca ceng’ adek. 13Ku kuca wagondra, wawok Regio: e ka ceng’ acel ukadhu sasi tuk, e i ceng’ mir arionde watundo Puteoli; 14ka ma wanwang’u ie umego, man gikwayu y a wari kugi ceng’ abiro: e kumeno wabino Rumi. 15E kan umego ma kuca, giwinjo piwa, gibino ning’olowa agbele i Apiforo ku Trestabeme: ka Paolo neno joni, efoyo Mungu, man cwinye doko tek.
16E ka wamondo i Rumi, juyio ya Paolo bed gire kende gikud asikari m’ukure.
Paolo Uponjo i Rumi
17Man etimbre, nia ka ceng’ adek ukadhu Paolo lwong’o judongo mi Juyahudi karacelo: e ka gicoko dhoggi, ewacu igi kumae, An, umego, kadok atimo gin moko ngo kum dhanu, kadi kum kura pa wegwa de, ento ku Yerusalem re jumia ni jakol i cing’ Jurumi: 18ma, ka giluro i lembe para, giyenyo gigonya, kum lembe moko mbe i ia ma mi nek. 19#Tic 25:11Ento ka Juyahudi gijai kum lembene, ketho ayenyo ba Kaisari: en e nia abedo ku lembe moko m’adot ko thek mwa re ngo. 20Ka kumeno pi lembe nini alwong’owu wubin wanendra wawec kudu de: kum abedo atwia ku nyoro maeni kum genogen mir Israel. 21E giwacu ire kumae, Wagamu waraga moko ngo piri m’uai i Yahudi, umego moko mbe de m’ubino kuni m’ukelo lembe kadi m’uyero piri ma rac de. 22Ento wayenyo wawinj i beng’i gin ma ii bepido: kum pi pokri maeni, wang’eyo i kaka ceke juyero nia e rac.
23E ka gituro ire ceng’, gibino dupa i bang’e ka m’ebedo i ie; man ekoro igi lembene, etuco pi ker pa Mungu, man ethokogi pi Yesu, kud i cik pa Musa ku jubila bende, ugambre kugweno cil uthieno. 24Jumoko yio lembe m’eyero, jumoko ke yio ngo. 25E ka cwinygi ripo ngo i kindgi gigi, giai yo ng’ei lembe acel ma Paolo yero kumae, Tipo Maleng’ yang’ uyero dre ni wegwu ku dhu Isaya ma jabila, 26#Isa 6:9, 10ewacu kumae,
Ci ba dhanu maeni, man iwac kumae,
Awinja wubiwinjo, man wubing’eyo ki ngo;
Anena de wubineno, ere wubing’eyo ki ngo:
27Kum adunde dhanu maeni doko nwang’,
Ithgi de dhing’,
Wang’gi de gimio;
Kara ku ginen ku wang’gi,
Ku giwinj ku ithgi,
Ku ging’ei kud adundegi,
Ku gilokri kendo,
Ketho acanggi.
28Ka kumeno dong’ wung’ei, ya both maeni pa Mungu juoro ni Thekdhanumange: gibiwinjo bende. 29E kan eyero lembe maeni, Juyahudi giai, ku poro lembe dit i kindgi. 30Man ebedo oro ario yul i ot pare m’emio ko pinje, man ejolo ceke m’ucidho i bang’e, 31m’eyero ko pi ker pa Mungu, m’eponjo ko gin pi Rwoth Yesu Kristu ku tegocwinye ceke, ma ng’atu moko mbe de m’ucere.
The Holy Bible In Alur (Lur), Revised Orthography © United Bible Societies, 1970.