Tic Mi Jukwenda 13
13
1Nwang’u i kanisa ma Antiokia, jubila pa Mungu ku juponji de ginuti, Barnaba, man Simeon ma julwong’o Niger, man Lukio ma Kurene, ku Manaen m’umin m’apidha pa Herode ma jabim, man Saul. 2E kinde ma gibetimo ni Rwoth, ma giweko ko cam de, Tipo Maleng’ uwacu kumae, Koi ira Barnaba ku Saul kum tic m’alwong’ogi-i kume. 3E ka giweko cam girwo de giketho cing’gi i wigi, e giorogi.
Julub Uponjo i Kupro
4Kum kumeno joca, ma Tipo Maleng’ uorogi, giloro piny Selukia; e giai keca gicidho Kupro ku yo mi pi. 5Ka gini i Salamini, giyero lem pa Mungu i kacokri mi Juyahudi: gibedo ku Yohana bende ma jatim igi. 6Ka gikadhu kud i cula ceke cil Pafo, ginwang’u ajoga moko, m’e jabila mi ndra, ma Jayahudi, ma nyinge Bar-Yesu; 7ma gibedo karacelo giku jabim, ma Sergio Paolo, e ng’atu m’ung’eyo girang’eya. Ng’atuno lwong’o Barnaba giku Saul i bang’e, man eyenyo ewinj lem pa Mungu. 8Ento Eluma ma ajoga (kum nyinge kumeno ka juloke) ejai igi, m’eyenyo ewing jabim woko kum yioyic. 9Ento Saul, ma julwong’o Paolo bende, ma Tipo Maleng’ urome, etono wang’e i bang’e, 10ewacu kumae, In ma thwo ndra ku tic ma rac ceke pong’ ii, i wod wonabali, i jakwoj bedopwe ceke, ibiweko loko wang’ayo ma pwe pa Rwoth ungo? 11Kawono, nen, cing’ Rwoth ni i kumi, in de ibibedo abinga, ma nindo moko ibineno ko ceng’ ungo. E ndhu ndhu nica utor ku mudho podho i wie; e emaku yenyo ka ng’atu m’upeye ku cinge. 12E jabim, kan eneno gin m’utimbre, elund eyio, ma ie wang’ lii kum ponji pa Rwoth.
Paolo ku Barnaba i Antiokia mi Pisidia
13Nie, Paolo giku juwagi gitugo woth kud i Pafo ku yo mi pi, giwok Perga i Pamfulia: e Yohana wekogi edok Yerusalem. 14Ento gin, ma giai Perga, giwok Antiokia m’i Pisidia; e ceng’ sabatu gimondo i kacokri, man gibedo piny. 15E yo ng’ei somo cik ku jubila judongo mi kacokri gioro lembe i bang’gi, giwacu kumae, Umego, tek wubedo ku lembe moko mi juk ni dhanu, wuwaci. 16E Paolo ai malu, eting’o cinge man ewacu kumae:
Wu dhanu pa Israel, ku wun ma wulworo Mungu de, wuwinji. 17#Ai 1:7; Ai 12:51Mungu mi dhanu pa Israel maeni ugoyo wi kwaruwa, eyungo dhanu de ka gibedo ni umondo i ng’om Misiri, man etelo wigi ewodho kogi woko kud i ie ku bote ma tek. 18#Wel 14:34; Poi 1:31E i nindo ma yenyo romo pier ang’wen etwio cwinye kum tic migi ma i yamba. 19#Poi 7:1; Yoc 14:1E kan enyotho thek abiro m’i ng’om Kanan, emio igi ng’ombe ni aba, mi rundi ma yenyo romo dak ang’wen ku pier abic: 20#Pok 2:16; 1 Sam 3:20yo ng’ei gin maeni emio igi jupoklembe cil kum Samwil ma jabila. 21#1 Sam 8:5; 1 Sam 10:21Ku yo ng’eye gikwayu ubimo: e Mungu mio igi Saul ma wod Kic, en e dhanu mi suru pa Benyamin, mi nindo mi rundi pier ang’wen. 22#1 Sam 13:14; 1 Sam 16:12; Zab 89:20E kinde m’ekabe, eting’o Daudi ni ubimo migi; m’enyutho lembe pire bende ewacu kumae, Anwang’u Daudi ma wod Yese, e ng’atu ma ka cwinya, m’ebitimo ceke ma ia yenyo. 23Nie Mungu kelo Jalar, Yesu, ni Israel ku kodhi ng’atuni calu eng’olo; 24#Mk 1:4; Lk 3:3ka Yohana lar uyero pi baputisi mi lokocwiny ni dhanu pa Israel ceke ma fokewok ungo. 25#Yoh 1:20; Mt 3:11; Mk 1:7; Lk 3:16; Yoh 1:27Man ka Yohana betimo tic maka pare, ewacu kumae, Iwu wacu nyo an a ng’a? An a en ungo. Ento nen, ng’atu acel ubebino i ng’eya ma wara pare gonjre ira ngo kum aromo ngo. 26Umego, nyikwai kodhi Ibrahim, ku ju m’i kindwu ma lworo Mungu bende, lembe mi both maeni juoro iwa. 27Kum ju ma gibedo Yerusalem, ku jubim migi de, kum ging’eye ngo, kadok dwand jubila ma jusomo ku ba ceng’ sabatu, giketho etimbre kakare ku gonje. 28#Mt 27:22, 23; Mk 15:13, 14; Lk 23:21-23; Yoh 19:15E kadok ginwang’u the nek ungo i ie, ento gikwayu Pilato ya junege. 29#Mt 27:57-61; Mk 15:42-47; Lk 23:50-56; Yoh 19:38-42E ka gidaru timo gin ceke ma jugoro pire kakare, e gifudhe piny ku kor yen, man gikethe i bel m’aroka i cana. 30Ento Mungu ketho ecer ku kind ju m’utho: 31#Tic 1:3ju ma giai kugi Galilaya ma giidho gikugi Yerusalem de ginene wang’ udul, ma kawono gi jumulembe pare ni dhanu. 32#Zab 2:7E wakelo iwu rwonglembe ma ber mi lembang’ola ma jumio ni kwaru, 33nia Mungu ketho lembene timbre kakare ni nyithindho mwa, kum eketho Yesu cer; calu egore i zaburi mir arionde kumae, In i Woda, tin anyoli. 34#Isa 55:3Man pi lembe m’eketho ecer ko ku kind ju m’utho, ma kawono dong’ edwogo kendo ngo ba top, eyero kumae, Abimio iri mugisa pa Daudi ma leng’ mandha de. 35#Zab 16:10Kum ewacu i zaburi mange bende kumae, Ibimio Ng’atu Maleng’ peri ngo nineno top. 36Kum ka Daudi daru timo porolembe pa Mungu i kind dhanu m’i kume, enindo, jukethe ba kwaru mire de, man eneno top: 37ento ng’atu ma Mungu ketho ecer re k’eneno top ungo. 38Ka kumeno dong’ wung’ei, umego, nia ni kum ng’atuni jubeyero iwu pi ruc mi dubo: 39man ku ba dhanu ceke ma giyio, lembe m’i wigi gonjre ni gin ceke, ma jucopo gonyo kowu ngo ku cik pa Musa. 40Ka kumeno, wubed ku weng’wu, kara maeni m’uyere i kitabu mi jubila kud uwok i kumwu ma kumae:
41 #
Hab 1:5
Nen, wu jucac, iwu wang’ lii de, man wurwiny;
Kum atimo tic i nindo mu,
Tijuno ma wubiyio ki ngo, tek ng’atu moko yero iwu.
42Man ka giwok woko, gikwayu ya juyer igi lembe maeni i ceng’ sabatu ma cen. 43Nie ka cokri lal, Juyahudi dupa ku ju ma juloko wang’gi ma lworo Mungu gilubo ng’ei Paolo giku Barnaba; gin, ma giweco gikugi, gipiko lembe i igi de ya gibed asu i bero pa Mungu.
44Ceng’ sabatu ma cen adhura ceke coko dhoge kpr kpr ni winjo lem pa Mungu. 45Ento ka Juyahudi neno udul dhanu, ngiri negogi dwanya, e gipiemo lembe ma Paolo yero, giyanyu ayany de. 46Man Paolo giku Barnaba giyero ku fcegocwinygi, giwacu kumae, Maku wakowalar wayer iwu lembe pa Mungu be. Kum wucwale cen kud i kumwu, wupoko giwu ya wuromo ku kwo ma rondo ku rondo ngo, nen, walokra ba Thekdhanumange. 47#Isa 42:6; 49:6Kum Rwoth ung’olo iwa kumeno, ewacu kumae,
Aketho in ni der mi Thekdhanumange,
Kara ibed ni both cil i tung’ ng’om.
48Ka Thekdhanumange giwinjo maeni, anyong’a negogi, e giyungo lembe pa Mungu: e dhanu ceke ma yang’ jukethogi mi kwo ma rondo ku rondo giyio. 49E lembe pa Rwoth uyik tir i ng’ombuno ceke. 50Ento Juyahudi gipiko lembe i mon ma dongo ma lworo Mungu, ku judongo mir adhurane de, e ginyayu ragedo kum Paolo giku Barnaba, man giriemogi woko kud i kieu migi. 51#Mt 10:14; Mk 6:11; Lk 9:5; 10:11Ento gikiro utur m’i tiendgi woko i kumgi, man gibino Ikonio. 52E mutoro ku Tipo Maleng’ de pong’o julub.
The Holy Bible In Alur (Lur), Revised Orthography © United Bible Societies, 1970.