Romefo NHƐNMU
NHƐNMU
Paul dze ne krataa a ɔkyerɛwee kɛmaa Romefo yi siesiee kwan mu wɔ nsera a ɔbɔɔ ne tsirmu pɔw dɛ ɔbɔkɔ akɛsera Rome asɔr no. Nna ne nhyehyɛɛ nye dɛ ɔnye Kristianfo a wɔwɔ hɔ no bɔbɔ mu ayɛ edwuma mber kakra, na ɔno ekyir no, wɔaboa no ma ɔaakɔ Spain. Ɔkyerɛwee dze kyerɛkyerɛɛ ne ntseasee wɔ Kristian gyedzi no ho na mbrɛ ɔwɔ dɛ ɔda edzi wɔ Kristianfo hɔn abrabɔ mu. Nwoma no kitsa Paul ne nsɛm tsitsir a ɔwɔ ne nsɛmpaka mu no nyina.
Okyiaa asɔrmba a wɔwɔ Rome no wiei na ɔkaa kyerɛɛ hɔn dɛ ɔbɔ mpaa ma hɔn no ekyir no, ɔdze no botae a ɔdze kyerɛɛw dɛm krataa no too gua. “Asɛmpa no da mbrɛ Nyankopɔn si siesie ɔnye nyimpa ntamu no edzi: ɔhyɛ ase gyedzi mu dze kowie gyedzi mu.” (1.17).
Afei Paul kyerɛw dze kyerɛkyerɛ no botae no mu. Wiadze mu nyimpa nyina, Jewfo na hɔn a wɔnnyɛ Jewfo nyina hia dɛ wosiesie hɔn na Nyankopɔn ntamu, osiandɛ hɔn nyinara hyɛ bɔn no tum ase. Ɔnam Jesus mu gyedzi do na wosiesie nyimpa na Nyankopɔn ntamu. Afei Paul kyerɛkyerɛ abrabɔ fofor a Kraest wɔ mu a dɛm nkitahodzi pa wɔ Nyankopɔn mu no dze ba. Gyedzinyi no nye Nyankopɔn ntamu ba asomdwee na Nyankopɔn no sunsum ma no fahodzi fi bɔn na owu tum ase. Etsir 5-8 no mu no, Paul pɛnsapɛnsa dza Nyankopɔn ne mbra no kyerɛ na Nyankopɔn no sunsum no tum wɔ gyedzinyi no n’abrabɔ mu. Afei ɔsomafo yi kasa fa mbrɛ Jewfo na hɔn a wɔnnyɛ Jewfo nyina wɔ kyɛfa wɔ Nyankopɔn ne nhyehyɛɛ a wɔayɛ ama nyimpa nyina no mu. Ɔdze wie dɛ Jewfo no pow a wɔpoow Jesus no yɛ Nyakopɔn ne nhyehyɛɛ a ɔdze rema wiadze nyina aba Nyankopɔn n’adom a ɔwɔ Jesus mu no mu, na ɔgye dzi dɛ Jewfo no nnkɔkɔ do daa apow Jesus. Ewiei no, Paul kyerɛw fa mbrɛ ɔsɛ dɛ Kristian abrabɔ yɛ ho, ne tsitsir no nye ɔdɔ a ɔwɔ dɛ ɔba ankorankor ntamu no. Ɔkasa fa nsɛm bi tse dɛ ɔsom ma Nyankopɔn, Kristianfo hɔn asɛdze ma ɔman no na hɔnho hɔnho, na nsɛmbisa a ɔfa tsibua ho. Ɔdze ankor ankor nkrato na nsɛm a ɔtonton Nyankopɔn wie ne krataa no.
Dza Ɔwɔ Mu
Mbueienyi na botae 1.1-17
Nkwagye ho hia a ohia 1.18—3.20
Nyankopɔn ne Nkwagye kwan 3.21—4.25
Abrabɔ fofor wɔ Kraest mu 5.1—8.39
Israel wɔ Nyankopɔn ne nhyehyɛɛ mu 9.1—11.36
Kristian Abrabɔ 12.1—15.13
Ewiei na ankor ankor nkyia 15.14—16.27
Currently Selected:
Romefo NHƐNMU: MFANBRP
Highlight
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.