Romefo 8
8
Sunsum no mu Nkwa
1Dɛm ntsi afei afɔbu biara nnyi hɔ ma hɔn a wɔwɔ Kraest Jesus mu no#8.1 Tsetse akyerɛwfo no bi dze ka ho dɛ hɔn a wɔnnantsew honam mu na mbom wɔnantsew sunsum mu no.. 2Na Kraest Jesus mu nkwa Sunsum mbra no agye me efi bɔn nye owu mbra no mu. 3Na dza mbra no enntum annyɛ, dɛ ɔnam honam no do yɛ mberɛw ntsi no, Nyankopɔn somaa nankasa ne Ba wɔ bɔn honam suban no mu, wɔ bɔn ntsi, dze buu bɔn fɔ wɔ honam mu, 4ama mbra no n’ahyɛdze no aahyɛ ma wɔ hɛn a yɛnnantsew honam afamu, na mbom yɛnantsew sunsum afamu no mu. 5Na hɔn a wɔtɔ kɔ honam do no dwen honam dze, na hɔn a wɔtɔ kɔ sunsum do no dwen sunsum dze. 6Na honam adwen yɛ owu, na sunsum adwen dze, ɔyɛ nkwa nye asomdwee. 7Osiandɛ honam adwen yɛ Nyankopɔn do mansotwe na ɔmmfa noho nnhyɛ Nyankopɔn mbra no ase, ampa so orunntum; 8na hɔn a wɔwɔ honam mu no runntum nnsɔ Nyankopɔn enyi.
9Na hom dze, hom nnyi honam mu, na mbom hom wɔ sunsum mu, ber a Nyankopɔn no Sunsum tse hom mu no. Na obiara a onnyi Kraest no Sunsum no, ɔnnyɛ nedze. 10Na sɛ Kraest wɔ hom mu a, ɔnam bɔn ntsi nyimpadua no ewu, naaso tsenenee ntsi sunsum no ma nkwa. 11#1 Kor 3.16 Na sɛ nyia onyaan Jesus fii ewufo mu no no Sunsum tse hom mu a, nyia onyaan Kraest Jesus fii ewufo mu no, nam no Sunsum a ɔtse hom mu no do bɛma hom nyimpadua a owu yi so enya nkwa.
12Dɛm ntsi afei, enuanom, yɛyɛ akafo, mbom nnyɛ honam afamu na yɛdze kaw bi, dɛ yɛbɛtsena ase wɔ honam mu: 13na sɛ hom tsena ase honam afamu a, hom bowu, na sɛ hom nam sunsum mu ku nyimpadua ne ndzeyɛe dze a, hom bɛtsena ase. 14Na dodow a Nyankopɔn no Sunsum no gye hɔn taataa no, hɔn na wɔyɛ Nyankopɔn mba. 15#Gal 4.5-7 #Mar 14.36; Gal 4.6 Na hom ennya nkowaayɛ sunsum a hom dze bosuro bio, na mbom hom enya abayɛ sunsum a yɛnam do tsea mu dɛ, Abba, Egya! 16Na Sunsum nankasa nye hɛn sunsum dzi dase dɛ yɛyɛ Nyankopɔn mba; 17na sɛ yɛyɛ mba a, yɛyɛ adzedzifo so, Nyankopɔn adzedzifo nye Kraest mu anyɛnkoyɛ adzedzifo, na sɛ yɛnye Kraest hu amandze dze a, yebenya kyɛfa so wɔ n’enyimnyam no mu.
Ndaamba Enyimnyam no
18Na mubu dɛ sesei ber yi mu amandzehu no nndu enyimnyam a wɔrebɛda no edzi akyerɛ hɛn no ho koraa. 19Na abɔdze no rotweɔn dzendzenndzen dɛ wɔbɛda Nyankopɔn ne mba edzi. 20#Gye 3.17-19 Na wɔdze abɔdze no hyɛɛ adze gyan ase, wɔ enyidado mu, nnyɛ nankasa ne pɛ a, na mbom nyia ɔdze hyɛɛ ase no ntsi a. 21Osiandɛ abɔdze nankasa so wobeyi no mpɔtɔwee nkowaasom no ase akɔ Nyankopɔn mba enyimnyam adehyedzi no mu. 22Na yenyim dɛ abɔdze no nyina si nkrum dɛ ɔbaa a ɔroko awoo bodu ndɛ. 23#2 Kor 5.2-4 Na nnyɛ abɔdze no nko, na hɛnankasa so a yɛwɔ Sunsum no aba a odzi kan no, hɛn so yesi nkrum wɔ hɛn mu rotweɔn abayɛ no a wɔdze bɔpon nyimpadua no. 24Na enyidado mu na wɔgyee hɛn nkwa: na enyidado a wohu no nnyɛ enyidado, na dza obi hu no, ɔbɛyɛ dɛn na n’enyi bɛda do? 25Na sɛ hɛn enyi da dza yennhu do a, nna yɛdze abotar tweɔn.
26Dɛmara so na Sunsum no suo hɛn mu wɔ hɛn mberɛwyɛ mu, osiandɛ yennyim mbrɛ yendua mbɔ mpaa a ɔsɛ; na Sunsum nankasa na ɔdze apensi a onnyi kabea dzi ma hɛn. 27Na nyia ɔpɛnsa akoma mu no nyim Sunsum no n’adwen mbrɛ ɔtse, osiandɛ odzi ma ahotseweefo no dɛ mbrɛ Nyankopɔn ne pɛ tse.
28Na yenyim dɛ hɔn a wɔdɔ Nyankopɔn no, ɔdze adze nyina bɔ mu yɛ edwuma ma hɔn yieyɛ, mekyerɛ hɔn a wɔnam ne tsirmpɔw do afrɛ hɔn no. 29Na hɔn a ohun hɔn siei no, hɔn so na oyii hɔn too hɔ dɛ wɔnye ne Ba no suban nsɛ, ama ɔno dze, ɔaayɛ enuanom pii mu abakan. 30Na hɔn a oyii hɔn too hɔ no, hɔn so na ɔfrɛɛ hɔn, na hɔn a ɔfrɛɛ hɔn no, hɔn so na obuu hɔn bem, na hɔn a obuu hɔn bem no, hɔn so na ɔhyɛɛ hɔn enyimnyam.
Nyankopɔn Dɔ Wɔ Kraest Jesus mu
31Nna afei yɛbɛka dɛn wɔ iyinom ho? Sɛ Nyankopɔn wɔ hɛn afa a, woana na obotum asoɛr etsia hɛn? 32Ɔno a ɔannkam nankasa ne Ba, na oyii no mae wɔ hɛn nyina ntsi no, ɔbɛyɛ dɛn na ɔnnkɛfa adze nyina aka no ho adom hɛn? 33Woana botum atoatoa hɔn a Nyankopɔn asan mu eyi hɔn no? Nyia obu bem nye Nyankopɔn. 34Woana nye nyia obu fɔ? Kraest Jesus a, ɔno a owui, nyew, na ɔsoɛree fii ewufo mu, nyia ɔtse Nyankopɔn nyimfa no a, na ɔnoara so na odzi ma hɛn no. 35Woana bɛtsew hɛn efi Kraest dɔ no ho? Ahohia, anaa ahomtsew a, ɔhaw anaa ɔkɔm, adagyaw, anaa amandzenya a, anaa afona a? 36#Dwom 44.22 Dɛ mbrɛ wɔakyerɛw no dɛ,
Ɔwo ntsi woku hɛn daa nyina;
Woebu hɛn dɛ nguan a woruboku hɔn.
37Naaso iyi nyina mu yɛnam nyia ɔdɔɔ hɛn no do dzi konyim bor do. 38Na megye dzi ampa dɛ, owu anaa nkwa, anaa abɔfo, anaa etumfo, anaa dza ɔwɔ hɔ sesei, anaa dza ɔrebɛba, anaa ahoɔdzenfo, 39anaa dza ɔkrɔn, anaa bun, anaa abɔdze biara nnkotum atsew hɛn efi Nyankopɔn dɔ no a ɔwɔ hɛn Ewuradze Kraest Jesus mu no ho.
Currently Selected:
Romefo 8: MFANBRP
Highlight
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.
Romefo 8
8
Sunsum no mu Nkwa
1Dɛm ntsi afei afɔbu biara nnyi hɔ ma hɔn a wɔwɔ Kraest Jesus mu no#8.1 Tsetse akyerɛwfo no bi dze ka ho dɛ hɔn a wɔnnantsew honam mu na mbom wɔnantsew sunsum mu no.. 2Na Kraest Jesus mu nkwa Sunsum mbra no agye me efi bɔn nye owu mbra no mu. 3Na dza mbra no enntum annyɛ, dɛ ɔnam honam no do yɛ mberɛw ntsi no, Nyankopɔn somaa nankasa ne Ba wɔ bɔn honam suban no mu, wɔ bɔn ntsi, dze buu bɔn fɔ wɔ honam mu, 4ama mbra no n’ahyɛdze no aahyɛ ma wɔ hɛn a yɛnnantsew honam afamu, na mbom yɛnantsew sunsum afamu no mu. 5Na hɔn a wɔtɔ kɔ honam do no dwen honam dze, na hɔn a wɔtɔ kɔ sunsum do no dwen sunsum dze. 6Na honam adwen yɛ owu, na sunsum adwen dze, ɔyɛ nkwa nye asomdwee. 7Osiandɛ honam adwen yɛ Nyankopɔn do mansotwe na ɔmmfa noho nnhyɛ Nyankopɔn mbra no ase, ampa so orunntum; 8na hɔn a wɔwɔ honam mu no runntum nnsɔ Nyankopɔn enyi.
9Na hom dze, hom nnyi honam mu, na mbom hom wɔ sunsum mu, ber a Nyankopɔn no Sunsum tse hom mu no. Na obiara a onnyi Kraest no Sunsum no, ɔnnyɛ nedze. 10Na sɛ Kraest wɔ hom mu a, ɔnam bɔn ntsi nyimpadua no ewu, naaso tsenenee ntsi sunsum no ma nkwa. 11#1 Kor 3.16 Na sɛ nyia onyaan Jesus fii ewufo mu no no Sunsum tse hom mu a, nyia onyaan Kraest Jesus fii ewufo mu no, nam no Sunsum a ɔtse hom mu no do bɛma hom nyimpadua a owu yi so enya nkwa.
12Dɛm ntsi afei, enuanom, yɛyɛ akafo, mbom nnyɛ honam afamu na yɛdze kaw bi, dɛ yɛbɛtsena ase wɔ honam mu: 13na sɛ hom tsena ase honam afamu a, hom bowu, na sɛ hom nam sunsum mu ku nyimpadua ne ndzeyɛe dze a, hom bɛtsena ase. 14Na dodow a Nyankopɔn no Sunsum no gye hɔn taataa no, hɔn na wɔyɛ Nyankopɔn mba. 15#Gal 4.5-7 #Mar 14.36; Gal 4.6 Na hom ennya nkowaayɛ sunsum a hom dze bosuro bio, na mbom hom enya abayɛ sunsum a yɛnam do tsea mu dɛ, Abba, Egya! 16Na Sunsum nankasa nye hɛn sunsum dzi dase dɛ yɛyɛ Nyankopɔn mba; 17na sɛ yɛyɛ mba a, yɛyɛ adzedzifo so, Nyankopɔn adzedzifo nye Kraest mu anyɛnkoyɛ adzedzifo, na sɛ yɛnye Kraest hu amandze dze a, yebenya kyɛfa so wɔ n’enyimnyam no mu.
Ndaamba Enyimnyam no
18Na mubu dɛ sesei ber yi mu amandzehu no nndu enyimnyam a wɔrebɛda no edzi akyerɛ hɛn no ho koraa. 19Na abɔdze no rotweɔn dzendzenndzen dɛ wɔbɛda Nyankopɔn ne mba edzi. 20#Gye 3.17-19 Na wɔdze abɔdze no hyɛɛ adze gyan ase, wɔ enyidado mu, nnyɛ nankasa ne pɛ a, na mbom nyia ɔdze hyɛɛ ase no ntsi a. 21Osiandɛ abɔdze nankasa so wobeyi no mpɔtɔwee nkowaasom no ase akɔ Nyankopɔn mba enyimnyam adehyedzi no mu. 22Na yenyim dɛ abɔdze no nyina si nkrum dɛ ɔbaa a ɔroko awoo bodu ndɛ. 23#2 Kor 5.2-4 Na nnyɛ abɔdze no nko, na hɛnankasa so a yɛwɔ Sunsum no aba a odzi kan no, hɛn so yesi nkrum wɔ hɛn mu rotweɔn abayɛ no a wɔdze bɔpon nyimpadua no. 24Na enyidado mu na wɔgyee hɛn nkwa: na enyidado a wohu no nnyɛ enyidado, na dza obi hu no, ɔbɛyɛ dɛn na n’enyi bɛda do? 25Na sɛ hɛn enyi da dza yennhu do a, nna yɛdze abotar tweɔn.
26Dɛmara so na Sunsum no suo hɛn mu wɔ hɛn mberɛwyɛ mu, osiandɛ yennyim mbrɛ yendua mbɔ mpaa a ɔsɛ; na Sunsum nankasa na ɔdze apensi a onnyi kabea dzi ma hɛn. 27Na nyia ɔpɛnsa akoma mu no nyim Sunsum no n’adwen mbrɛ ɔtse, osiandɛ odzi ma ahotseweefo no dɛ mbrɛ Nyankopɔn ne pɛ tse.
28Na yenyim dɛ hɔn a wɔdɔ Nyankopɔn no, ɔdze adze nyina bɔ mu yɛ edwuma ma hɔn yieyɛ, mekyerɛ hɔn a wɔnam ne tsirmpɔw do afrɛ hɔn no. 29Na hɔn a ohun hɔn siei no, hɔn so na oyii hɔn too hɔ dɛ wɔnye ne Ba no suban nsɛ, ama ɔno dze, ɔaayɛ enuanom pii mu abakan. 30Na hɔn a oyii hɔn too hɔ no, hɔn so na ɔfrɛɛ hɔn, na hɔn a ɔfrɛɛ hɔn no, hɔn so na obuu hɔn bem, na hɔn a obuu hɔn bem no, hɔn so na ɔhyɛɛ hɔn enyimnyam.
Nyankopɔn Dɔ Wɔ Kraest Jesus mu
31Nna afei yɛbɛka dɛn wɔ iyinom ho? Sɛ Nyankopɔn wɔ hɛn afa a, woana na obotum asoɛr etsia hɛn? 32Ɔno a ɔannkam nankasa ne Ba, na oyii no mae wɔ hɛn nyina ntsi no, ɔbɛyɛ dɛn na ɔnnkɛfa adze nyina aka no ho adom hɛn? 33Woana botum atoatoa hɔn a Nyankopɔn asan mu eyi hɔn no? Nyia obu bem nye Nyankopɔn. 34Woana nye nyia obu fɔ? Kraest Jesus a, ɔno a owui, nyew, na ɔsoɛree fii ewufo mu, nyia ɔtse Nyankopɔn nyimfa no a, na ɔnoara so na odzi ma hɛn no. 35Woana bɛtsew hɛn efi Kraest dɔ no ho? Ahohia, anaa ahomtsew a, ɔhaw anaa ɔkɔm, adagyaw, anaa amandzenya a, anaa afona a? 36#Dwom 44.22 Dɛ mbrɛ wɔakyerɛw no dɛ,
Ɔwo ntsi woku hɛn daa nyina;
Woebu hɛn dɛ nguan a woruboku hɔn.
37Naaso iyi nyina mu yɛnam nyia ɔdɔɔ hɛn no do dzi konyim bor do. 38Na megye dzi ampa dɛ, owu anaa nkwa, anaa abɔfo, anaa etumfo, anaa dza ɔwɔ hɔ sesei, anaa dza ɔrebɛba, anaa ahoɔdzenfo, 39anaa dza ɔkrɔn, anaa bun, anaa abɔdze biara nnkotum atsew hɛn efi Nyankopɔn dɔ no a ɔwɔ hɛn Ewuradze Kraest Jesus mu no ho.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.