Matthew 6

Adɔyɛ ho Nkyerɛkyerɛ

1 # Mat 23.5 Hom nhwɛ yie, mma hom aannyɛ hom tsenenee wɔ nyimpa enyim dɛ wonhu: ɔyɛ dɛm a, hom nnyi akatua wɔ hom Egya a ɔwɔ sor no nkyɛn.

2 Dɛm ntsi sɛ ereyɛ adɔyɛ a, mma nnhɛn totorobɛnto wɔ w’enyim dɛ mbrɛ ndabrabafo no yɛ wɔ nhyiamudan nye abrɔn mu no, ama woeenya nyimpa hɔ enyimnyam. Nokwar mese hom dɛ, Woenya hɔn akatua dada. 3Na sɛ ereyɛ adɔyɛ a, mma wo nsa bankum nnhu dza wo nsa nyimfa reyɛ; 4ama w’adɔyɛ aaka nsumaa mu, na w’Egya a ohu nsumaa mu no obotua wo kaw wɔ gua do.

Mpaabɔ ho Nkyerɛkyerɛ

(Luke 11.2-4)

5 # Luk 18.10-14 Na sɛ hom rosɔr a, mma hom nnyɛ dɛ ndabrabafo no; osiandɛ wɔpɛ dɛ wogyina nhyiamudan mu nye abɔntsen ntoaado sɔr, ama nyimpa eehu. Nokwar mese hom dɛ, Woenya hɔn akatua dada. 6Na ɔwo dze, sɛ erosɔr a, hɛn wo pia mu, na atow w’abow mu no, sɔr ma w’Egya a ɔwɔ nsumaa mu no, na w’Egya a ohu nsumaa mu no obotua wo kaw wɔ gua do.

7 Na hom rosɔr a, mma hom nnyɛ kasafow ara gyan, dɛ amanamamfo no: osiandɛ wɔdwen dɛ wobetsie hɔn wɔ hɔn kasa dodow ntsi. 8Dɛm ntsi mma hom nyɛ dɛ hɔn: osiandɛ hom Egya nyim ndzɛmba a ohia hom ansaana hom ribisa no. 9Dɛm ntsi hom nsɔr dɛm:

Hɛn Egya a ewɔ sor,

wo dzin ho ntsew,

10 w’ahendzi mbra,

wɔnyɛ wo pɛ wɔ asaase do

dɛ mbrɛ wɔyɛ no wɔ sor.

11 Ma hɛn, hɛn daa daa edziban ndɛ. #6.11 … hɛn daa daa edziban Anaadɛ, … hɛn ɔkyena edziban.

12 Na fa hɛn mfom kyɛ hɛn,

dɛ mbrɛ hɛn so yɛdze kyɛ hɔn a wɔfom hɛn no.

13 Na mma mmfa hɛn nnkɔ nsɔhwɛ mu,

na yi hɛn fi mbusu mu. # 6.13 Na yi hɛn fi mbusu mu: Ne nkyerɛasee pa ara nye: Na gye hɛn fi ɔbɔnfo no ne nsamu. [Na ɔwo na ahendzi, nye tum nye enyimnyam yɛ wodze daa. Amen]#6.13: Tsetse akyerɛwfo no binom mmfa iyi nnsɔw do.

14 # Mar 11.25, 26 Na sɛ hom dze nyimpa hɔn mfom kyɛ hɔn a,

hom sor Egya so dze bɛkyɛ hom.

15 Na sɛ hom ammfa nyimpa hɔn mfom annkyɛ hɔn a, hom Egya so remmfa hom mfom nnkyɛ hom.

Mbuadadzi ho Nkyerɛkyerɛ

16 Na eso sɛ hom ridzi mbuada a, mma hom nnyɛ dɛ ndabrabafo no mmunamuna hom enyim: na wɔsɛɛ hɔn enyim ma nyimpa eehu dɛ woridzi mbuada. Nokwar mese hom dɛ, Woenya hɔn akatua. 17Na ɔwo dze, sɛ idzi mbuada a, sera wo tsirmu na hohor w’enyim; 18amma eennyi woho annkyerɛ nyimpa dɛ iridzi mbuada, na mbom wɔ w’Egya a ɔwɔ nsumaa mu no enyim, na w’Egya a ohu nsumaa mu no ɔbɛma wo akatua.

Sor Akoradze

(Luke 12.33, 34)

19 # Jas 5.2, 3 Mma hom mmpɛ akoradze nngu asaase do, mbrɛ nkakraka nye nkandar sɛɛ no, na ewifo bubu mu kowia; 20na hom mpɛ akoradze ngu sor, mbrɛ nkakraka nye nkandar nnsɛɛ no, na ewifo mmbubu mu nnkowia: 21na mbrɛ w’akoradze wɔ no, hɔ na w’akoma so wɔ.

Nyimpadua ne Kan

(Luke 11.34-36)

22 Nyimpadua ne kandzea nye enyiwa: dɛm ntsi sɛ w’enyiwa yɛ kor a, wo nyimpadua nyina bɛyɛ kann. 23Na sɛ w’enyiwa muo a, wo nyimpadua nyina bɛyɛ kusuww. Na sɛ kan a ɔwɔ wo mu no yɛ sum a, sum no ne kɛse tse dɛn!

Nyankopɔn na Ahonyadze

(Luke 16.13; 12.22-31)

24 Obiara nntum nnsom ewuranom beenu; osiandɛ obekyir baako na ɔadɔ baako, anaadɛ obedzi baako nyi na oebu ɔbaako enyimtsia. Hom runntum nnsom Nyankopɔn nye ahonyadze. 25Dɛm ntsi mese hom dɛ, Mma hom nndwendwen hom nkwa ho, dɛ ebɛnadze na hom bedzi anaa ebɛnadze na hom bɔnom, anaaso hom nyimpadua ho, dɛ ebɛnadze na hom bofura. Ana nkwa nnkyɛn edziban, anaa nyimpadua nnkyɛn efuradze? 26Hom nhwɛ wimu nnoma dɛ wonndua na wommbu, eso wɔmmboaboa ano nnhyɛ san do; naaso hom sor Egya nyɛn hɔn. Ana hom nnsom bo pii nnkyɛn hɔn? 27Na hom mu woana na ɔdwendwen a, obotum dze basafa kor ato ne tsentsen do? 28Na ɔyɛ dɛn na hom dwendwen wɔ efuradze ho? Hom nhwɛ nsua haban mu nsukookoo mbrɛ wonyin: wɔnnyɛ edwuma, eso wɔnntow asaaba: 29#1 Ahe 10.4-7; 2 Mbe 9.3-6 naaso mese hom dɛ Solomon n’enyimnyam nyina mu mpo ɔannkeka noho dɛ yinom mu kor. 30Na sɛ Nyankopɔn ma haban mu efuw a ɔwɔ ha ndɛ na ɔkyena wɔdze gu fononoo mu efuradze dɛm a, ɔnnkɛyɛ dza ɔkyɛn yi pii ama hom, hom a hom gyedzi suar? 31Dɛm ntsi mma hom nndwendwen dɛ, ebɛnadze na yebedzi? Anaa, Ebɛnadze na yɛbɔnom, anaa, ebɛnadze na yebofura? 32Na dɛm ndzɛmba yi nyina na amanamamfo hwehwɛ; na hom sor Egya nyim dɛ yinom nyina hia hom. 33Na hom ndzi kan nhwehwɛ n’ahenman nye ne tsenenee, na wɔdze yinom nyina bɛka hom ho. 34Dɛm ntsi mma hom nndwendwen ɔkyena ho; na ɔkyena bɔdwendwen nankasa no ho. Da kor no mu bɔn dɔɔ so ma da no.

Currently Selected:

Matthew 6: MFANBRP

Highlight

Copy