Matthew 24

Jesus Ka Asɔrfi no ne Nsɛe ho Asɛm

(Mark 13.1, 2; Luke 21.5, 6)

1Na Jesus fiir edzi fii asɔrfi no mu kɔree, na n’esuafo no baa ne nkyɛn bɛkyerɛɛ no asɔrfi no aban no. 2Na obuae see hɔn dɛ, Ana hom nnhu yinom nyina? Nokwar mese hom dɛ, Wonnkegya ɔbo kor a ɔda kor do wɔ ha a wonnkodwuruw egu famu.

Ɔhaw nye Atseetsee

(Mark 13.3-13; Luke 21.7-19)

3Na ɔko Ngo Bepɔw no do no, n’esuafo baa ne nkyɛn nsumaa mu bɛsee no dɛ, Kyerɛ hɛn aber a yinom bɛyɛ hɔ, na wo mbae nye wiadze ewiei ho asɛnkyerɛdze bɛyɛ dɛn? 4Na Jesus buae see hɔn dɛ, Hom nhwɛ yie amma obi aanndaadaa hom. 5Na dodowara bɛba wɔ me dzin mu dɛ, Emi nye Kraest no, na wɔadaadaa pii. 6Na hom bɛtse ko nye akosɛm nka: hom nhwɛ, mma hom akoma nntu, na otwar dɛ yinom nyina ba, naaso ewiei no nnyae nndurii. 7Na ɔman bɔsoɛr ɔman do, na ahenman bɔsoɛr ahenman do; na ɔkɔm nye asaasewosow bɛba mbeambea. 8Na yinom nyina nye awoko ahyɛse. 9#Mat 10.22 Nna wobeyi hom ama ahohiahia na woeku hom, na amanaman nyina bɛtan hom wɔ me dzin ntsi. 10Ɔno na ɔbɔto dodowara fintsidua, na wobeyiyi hɔnho ama, na wɔatentan hɔnho. 11Na nkɔnhyɛfo atorfo pii bɔsoɛr na wɔadaadaa dodowara. 12Na osiandɛ emumuyɛ bɔdɔɔ so ntsi, dodowara hɔn dɔ bɛyɛ mberɛw. 13#Mat 10.22 Na nyia obetsim ekodu ewiei no, ɔno na wɔbɛgye no nkwa. 14Na ahenman ho asɛmpa yi, wɔbɛka wɔ wiadze nyina dze edzi amanaman nyina dase; na nkyii ewiei no bɛba.

Ahohiahia Kɛse no

(Mark 13.14-23; Luke 21.20-24)

15 # Dan 9.27; 11.31; 12 Dɛm ntsi sɛ hom hu amambɔe ekyiwadze a Daniel nkɔnhyɛnyi kaa ho asɛm no, dɛ ogyina krɔnkrɔnbea hɔ a (ma nyia ɔrekenkan no ntse ase) 16ɔno na hɔn a wɔwɔ Judea nguan nkɔ nkokwaa do: 17#Luk 17.31 mma nyimpa a ɔwɔ dan etsifi nnsian mmbɛfa biribi mmfi ne dan mu; 18na nyia ɔwɔ haban mu, mma ɔnnsan n’ekyir bio mmbɛfa ne nkatado. 19Na hɔn a wɔafa efur, nye hɔn a wɔma numfo wɔ nda no mu ndue! 20Na hom nsɔr ma hom eguanguanber no aammba awɔwber mu, anaa ahomgyeda; 21#Dan 12.1; Nyi 7.14 na aber no ahohiahia kɛse a ofitsi wiadze ahyɛse dze bodu aber no ɔmmba da, eso ɔremmba da, nna ɔbɛba. 22Na sɛ woenntwa nda no do tsia a, nkyɛ honam biara nnkenya nkwa; na mpamufo ntsi wobotwa nda no do tsia. 23Na aber no sɛ obiara se hom dɛ, Hwɛ, Kraest no wɔ ha, anaaso, Ɔwɔ ha a, mma hom nngye nndzi. 24Na Kraest atorfo nye nkɔnhyɛfo atorfo bɔsoɛr na wɔakyerɛ asɛnkyerɛdze akɛse nye anwanwadze, ma sɛ annhwɛ a mpamufo no mpo wɔbɛdaadaa hɔn. 25Hwɛ, maka akyerɛ hom ansaana edu. 26#Luk 17.23, 24 Dɛm ntsi, sɛ wɔse hom dɛ, Hwɛ, ɔwɔ sar no do a, mma hom mmpue nnkɔ, Hwɛ, ɔwɔ adankyir a, mma hom nngye nndzi. 27Na dɛ mbrɛ enyinam nyinam fi boka, na ɔhyerɛn kɔ anee no, mbrɛ nyimpa Ba no ne mbae so bɛyɛ ara nye no. 28#Luk 17.37 Na beebiara mbrɛ fun wɔ no, hɔ na mpɛtɛ bɔboaboa hɔn ano.

Nyimpa ba no ne Mbae

(Mark 13.24-27; Luke 21.25-28)

29 # Isa 13.10; Joel 2.10, 31; 3.15; Nyi 6.12; Isa 13.10; Eze 32.7; Joel 2.10; 3.15; Isa 34.4; Nyi 6.13 Na ntsɛmara, nda no mu ahohia no ekyir no, ewia bɛhyɛ sum, na bosoom nnkɛma ne kan, na nworaba fi sor bɔtotɔ, na sor etum bɔwosow: 30#Dan 7.13; Zek 12.10-14; Nyi 1.7 na ɔno na nyimpa Ba no n’asɛnkyerɛdze bopue wimu, na wiadze mbusuakuw nyina bɔkɔ ahohia kɛse mu, na wobohu nyimpa Ba no dɛ ɔreba wɔ sor nsuwusiw do, wɔ tumdzi nye enyimnyam kɛse mu. 31Na ɔdze totorobɛnto a ne ndze so bɔsoma n’abɔfoe, ma wɔaabɔboaboa hɔn a wɔapa mu eyi hɔn no ano efi mbrɛ mframa anan no fi ba no, efi sor ano kor akɛpem afa kor so.

Adɔmbadua ho Esuadze

(Mark 13.28-31; Luke 21.29-33)

32 Hom nsua adɔmbadua ho bɛ no: sɛ n’abaw yɛ momon, na oriyi ahaban a, nna hom nyim dɛ ɔhyewber abɛn; 33dɛmara na hom so sɛ hom hu dɛ yinom nyina yɛ hɔ a, hom nhu dɛ abɛn na edu abowano. 34Nokwar mese hom dɛ, Mbasantsen yi nnkotwa mu akɔ gyedɛ yinom nyina ayɛ hɔ ansaana. 35Ɔsor nye asaase botwa mu akɔ naaso me nsɛm dze, orunntwa mu da.

Obiara Nnyim Da no nye Dɔn no

(Mark 13.32-37; Luke 17.26-30, 34-36)

36 Na da no nye dɔn no obiara nnyim: nnyɛ abɔfo a wɔwɔ sor no, nnyɛ Ɔba no so, na Egya no nko a. 37#Gye 6.5-8 Na dɛ mbrɛ Noa nda no yɛe no, mbrɛ nyimpa Ba no ne mbae so bɛyɛ ara nye no. 38Na dɛ mbrɛ nda no a odzi nsuyirii no kan no, wodzidzii, na wɔnomee, wɔwaree, na wɔmaa awar dze kodur da a Noa kɛhyɛɛ hɛn adaka no mu no, 39#Gye 7.6-24 na woennhu araa dze kodur dɛ nsuyirii no bae bɛfaa hɔn nyinara kɔree no, mbrɛ nyimpa Ba no ne mbae so bɛyɛ ara nye no. 40Ɔno na nyimpa beenu wɔ haban mu a, wɔbɛfa baako na woegya kor no. 41Mbaa beenu bɛyam wɔ ewuyambo do, na wɔbɛfa baako na woegya kor no. 42Dɛm ntsi hom nweɔn, osiandɛ hom nnyim dɔn kor a hom wura bɛba. 43#Luk 12.39, 40 Na hom nhu yi dɛ, sɛ ofiwura no nyim dasu kor a owifo no bɛba a, nkyɛ ɔweɔnee, na ɔamma woemmbobubu ne dan mu annkɔ mu. 44Dɛm ntsi hom so hom nyɛ krado, osiandɛ dɔn a hom enyi nnda mu na nyimpa Ba no reba.

Akowaa Pa na Akowaa Bɔn

(Luke 12.41-48)

45 Afei woana nye akowaa nokwafo nye nyansafo a no wura dze no esi ne fikuw do, dɛ ɔmma hɔn edziban wɔ ber a ɔsɛ mu? 46Nhyira aka akowaa no a, sɛ no wura ba a, obohu no dɛ ɔreyɛ dɛm, 47Nokwar mese hom dɛ ɔdze no besi n’adze a ɔwɔ nyina do. 48Na sɛ akowaa bɔn se n’akoma mu dɛ, Mo wura rikyim ne ba; 49na sɛ ɔhyɛ ase bobɔ no nwurankowaa, na sɛ ɔnye asabokwafo dzidzi na ɔnom a, 50akowaa no wura bɛba da a ɔnnhwɛ no kwan, nye dɔn a onnyim mu, 51na oetwa no mu ebien, na ɔama ɔnye ndabrabafo edzi afora; hɔ na osu nye asetwɛr wɔ.

Currently Selected:

Matthew 24: MFANBRP

Highlight

Copy