Matthew 20

Wenyin Ture mu Edwumayɛfo

1 Ɔsor ahenman no tse dɛ nyimpa a ɔyɛ asaasewura a opuee anapaatu dɛ ɔrokɔbɔ edwumafo paa akɔ no wenyin ture mu. 2Na ɔnye edwumayɛfo no dzii ano da kor akatua no, ɔmaa wɔkɔr no wenyin ture mu. 3Na opuei bɛyɛ dɛ anapa ndɔnkron no, na okohun binom dɛ wogyinagyina gua do enyihaw mu; 4na ɔsee hɔn dɛ, Hom so hom nkɔ wenyin ture no mu, na dza ɔsɛ no mebɛma hom. Na wɔkɔree. 5Ɔkɔr bio bɛyɛ ewiaber duebien nye ndɔnebiasa no mu kɛyɛɛ dɛmara. 6Na bɛyɛ ewimbir ndɔnnum mu no, ofiir edzi kohun binom dɛ wogyinagyina hɔ, na ɔsee hɔn dɛ, Ɔyɛ dɛn na adzekyee yi nyina hom gyinagyina ha enyihaw mu yi? 7Wɔsee no dɛ, osiandɛ obiara mmbɔɔ hɛn paa. Ɔsee hɔn dɛ, Hom so hom nkɔ wenyin ture no mu. 8#Lev 19.13; Deut 24.15 Na odur ewimbir no, wenyin ture no wura see ɔhwɛdofo no dɛ, Frɛ edwumayɛfo no, na ma hɔn hɔn apaabɔdze, hyɛ ase fi hɔn a wodzii ekyir no do kesi hɔn a wodzii kan no do. 9Na hɔn a wɔfaa hɔn ewimbir ndɔnnum no bae no, hɔn nyina nyaa da kor akatua nkorkor. 10Na edzikamfo no bae no, wosusuu dɛ wobenya kɛse; na hɔn so hɔn mu biara nyaa dakor akatua nkorkor. 11Na hɔn nsa kae no, wohwinhwinii tsiaa asaasewura no 12dɛ, Ekyirfo yi dze, dɔnhwer kor pɛ na wɔyɛɛ edwuma, na ama wɔnye hɛn a adzekyee yi ne berɛ nye ne hyew adzen hɛn yi agye akatua pɛr. 13Na obuae see hɔn mu baako dɛ, Nyɛnko, mennyɛɛ wo bɔn bi: ana menye wo enndzi ano da kor akatua? 14Fa wodze na kɔ; mepɛ dɛ mema ekyidzifo yi dɛ mbrɛ memaa woara. 15Ana minnyi ho kwan dɛ medze mankasa m’adze yɛ dza mepɛ? Me yamu ye ntsi ɔyɛ wo ehi anaa? 16#Mat 19.30; Mar 10.31; Luk 13.30 Mbrɛ ekyidzifo bedzi kan, na Edzikamfo edzi ekyir ara nye no. (Na wɔafrɛ pii, naaso kakraabi na woeyi hɔn.)#20.16: Akyerɛwfo binom mmfa nnsɔw do dɛm.

Jesus Hyɛ no Wu ho Nkɔm a Otsia Ebiasa

(Mark 10.32-34; Luke 18.31-34)

17Na Jesus rofow akɔ Jerusalɛm no, ɔfaa esuafo duebien no nko kɔr nkyɛn na ɔsee hɔn wɔ kwan no mu dɛ, 18Hwɛ, yɛrofow akɔ Jerusalɛm, na wobeyi nyimpa Ba no ahyɛ asɔfompanyin nye kyerɛwfo no nsa, na woebu no fɔ dɛ wonku no, 19na woeyi no ama amanamamfo dɛ wonsi no atwetwe na wɔnka no mpire, na wɔmbɔ no mbeamudua mu; naaso da a otsia ebiasa no obenyan.

James na John hɔn Na N’ebisadze

(Mark 10.35-45)

20Nna Zebedee mba no hɔn na nye ne mba baa ne nkyɛn bɔkotoow no, na ɔserɛɛ no hɔ biribi. 21Na obisaa no dɛ, Ebɛnadze na epɛ? Ɔsee no dɛ, Hyɛ ma me mba beenu yi, baako aatsena w’enyimfa, na baako aatsena w’abankum, wɔ w’ahenman no mu. 22Na Jesus buae see dɛ, Hom nnyim dza hom reserɛ yi: ana hom botum anom kɔɔpow a morobɔnom no? (Anaa enuma a wɔdze rubonuma me no hom botum ma wɔdze enuma hom?) #20.22Akyerɛwfo binom mmfa nnsɔw do dɛ, “Anaa enuma a wɔdze bonuma me no, hom botum ma wɔdze enuma hom?” Wɔsee no dɛ, Yebotum. 23Ɔsee hɔn dɛ, Mo kɔɔpow dze, hom bɔnom, (m’enuma no, wɔdze bonuma hom): naaso m’enyimfa nye m’abankum tsena dze, ɔnnyɛ medze dɛ medze bɛma; na wɔdze bɛma hɔn a m’Egya esiesie ama hɔn.

24Na du no tsee no, wonyaa ebufuw wɔ enuanom beenu no ho. 25#Luk 22.25, 26 Na Jesus frɛɛ hɔn baa ne nkyɛn, na ɔsee dɛ, Hom nyim dɛ amanaman ahemfo no, wodzi hɔn do wura, na hɔn mu akɛse dzi hɔn do tum. 26#Mat 23.11; Mar 9.35; Luk 22.26 Na ɔrennyɛ dɛm wɔ hom mu: na obiara a ɔpɛ dɛ ɔbɛyɛ kɛse wɔ hom mu no, ɔbɛyɛ hom somfo; 27na obiara a ɔpɛ dɛ odzi hom mu kan no, ɔbɛyɛ hom akowaa: 28dɛ mbrɛ nyimpa Ba no so ɔammba dɛ wɔnsom no, na mbom dɛ ɔbɔsomee, ama ɔdze no nkwa aayɛ apondze ama dodowara no.

Jesus Ma Enyifurafo Beenu Hu Adze

(Mark 10.46-52; Luke 18.35-43)

29Na wofi Jeriko rokɔ no, nyimpadodow pii kaa no do. 30Na hwɛ, enyifurafo beenu bi a wɔtse kwan nkyɛn no tsee dɛ Jesus rutwa mu no, wɔtseatseaa mu dɛ, Ewuradze, David ba, hu hɛn mbɔbɔr. 31Na nyimpadodow no braa hɔn dɛ wɔnka hɔn ano nto mu; na mbom wɔtseatseaa mu kɛse see dɛ, Ewuradze, David ba, hu hɛn mbɔbɔr. 32Na Jesus gyinae, na ɔfrɛɛ hɔn, na ɔsee dɛ, Ebɛnadze na hom pɛ dɛ meyɛ ma hom? 33Wobuaa no dɛ, Ewuradze, nkyɛ hɛn enyiwa eebue. 34Na Jesus ne yamu hyehyee no wɔ hɔn ho, na ɔdze ne nsa kaa hɔn enyiwa, na hɔ no ara wohun adze na wɔkaa no do.

Currently Selected:

Matthew 20: MFANBRP

Highlight

Copy