Levitikɔs 19

Krɔnkrɔnyɛ

1Na EWURADZE kasaa kyerɛɛ Moses dɛ, 2Kasa kyerɛ Israelmba mboanofo no nyinara, na se hɔn dɛ, Hom nyɛ krɔnkrɔn: na emi EWURADZE hom Nyankopɔn meyɛ krɔnkrɔn. 3Hom mu nyimpa biara nsuro ne na, nye n’egya, na hom ndzi m’ahomgyenda do: emi nye EWURADZE hom Nyankopɔn. 4Mma hom nndan nnkɔ abosom hɔ, nkyii so mma hom nnyɛ ehonyi a woegu no dɛ nyame mma hom ho: emi nye EWURADZE hom Nyankopɔn. 5Na sɛ hom dze asomdwee afɔr afɔrbɔdze rebrɛ EWURADZE a, hom mfa mbra ma ɔnsɔ enyi mma hom. 6Wondzi no da no ara a hom dze ba no, nye n’adzekyee no: na sɛ bi ka ma okodu da a otsia ebiasa no a, wɔmfa gya nhyew no. 7Na sɛ wodzi no da a otsia ebiasa no a, ɔyɛ ekyiwadze; ɔnnsɔ enyi: 8obiara a odzi no, ɔbɔsoa no mbusu, osiandɛ oegu EWURADZE n’adzekrɔnkrɔn ho fi: na ɔkra no wobotwa no efi ne man mu akyen.

9Na sɛ hom twa hom asaase do ndɔbaa a, mma nntwa wo hanoa dze no korakora, nkyii so mma nndzi wo ndɔbaa ne mpɛpɛw no. 10Na mma nndzi wo wenyin ture mu mpɛpɛw, nkyii so mma nntase wo wenyin ture mu aba a atotɔ famu; gya no hɔ fa ma ohianyi, nye ɔhɔho: emi nye EWURADZE hom Nyankopɔn. 11Mma hom nnwia adze, nkyii so mma hom nndzi nkɔnkɔnsa, na obi nntwa ne nyɛnko nkontompɔ. 12Na mma hom nnka me dzin ho ntam akɔhwi mu, amma eennhura wo Nyankopɔn ne dzin ho: emi nye EWURADZE. 13Mma nndzi wo nyɛnko emim, na mmbu no: mma mma ɔpaanyi n’akatua nnko wo hɔ anadwe nyinara ma adze nnkye. 14Mma nndom otsitsifo, na mmfa fintsidua nnto ofurafo enyim, mbom suro wo Nyankopɔn: emi nye EWURADZE. 15Mma hom nnyɛ atsɛmbu mu dza ɔnntsen: mma nnhwɛ ohianyi enyim, anaa nnsuro otumfo enyim: mbom tsenenee mu na bu wo nyɛnko atsɛn. 16Mma nnkyin sor nye ase dɛ afakɔafabanyi wɔ wo nkorɔfo mu: nkyii so mma nnsoɛr nntsia wo nyɛnko no bɔgyaa: emi nye EWURADZE. 17Mma nntan wo nua wɔ w’akoma mu: ɔka na ka wo nyɛnko enyim, na mma nnsoa bɔn wɔ ɔno ntsi. 18Mma nndzi wer, na mma nnya menasepɔw biara wɔ wo nkorɔfo mba ho, mbom dɔ wo nyɛnko dɛ woho: emi nye EWURADZE. 19Hom ndzi m’ahyɛdze do. Mma mma wo fiembowa nndzi aforafora mmfofow hɔnho: mma mmfa aba horow ebien mmfora mu nndua wo haban mu: nkyii so mma atar a wɔdze atam horow ebien aforafora apam nnka woho. 20Na obiara a ɔnye ɔbaa bi da dze no ho nsu ma no, na sɛ ɔyɛ afonabaa a wɔdze no ama okun bi awar, na pon na wonnyae mmpoon no, nkyii so wɔmmaa no fahodzi a; wɔntsea hɔn; mma wonnku hɔn, osiandɛ ɔnndze noho. 21Na ɔmfa n’asodzi ho afɔr mbra EWURADZE, wɔ ehyiadzibuw no n’abowano, mekyerɛ oguannyin na ɔmfa nyɛ asodzi ho afɔr no. 22Na ɔsɔfo no mfa asodzi ho afɔr oguannyin no mpata mma no wɔ EWURADZE enyim wɔ no bɔn a ɔayɛ no ntsi: na wɔdze no bɔn a ɔayɛ no bɛkyɛ no. 23Na sɛ hom du asaase no do, na wɔtsetsɛw ndua horow biara a wodzi a, ɔno hom mbu n’aba dɛ monomonomyɛdze: mfe ebiasa na ɔnyɛ dɛ monomonomyɛdze mma hom; mma wonndzi. 24Mbom afe a otsia anan no n’aba nyinara nyɛ krɔnkrɔn, mfa mma EWURADZE ayɛyi. 25Na afe a otsia enum no hom ndzi n’aba bi, ama wɔaama hom no ndɔbaa: emi nye EWURADZE hom Nyankopɔn. 26Mma hom nndzi adze biara nye no bɔgya no: nkyii so mma hom nnkyer nkaber, na wɔnnyɛ akɔmfodze. 27Mma hom mmpompon hom tsinhwi ano, nkyii so mma nnsɛɛ w’abɔdwesa ano. 28Mma hom mmbobɔ hom honam ho akam biara mma ewufo, na hom nnkyerɛkyerɛw hom ho nkyerɛkyerɛwee biara so: emi nye EWURADZE. 29Mma nngu wo babaa ho fi nnyɛ no edwaman; bɛyɛ na asaase no adan ndwamanyɛ, na mbusu abɛyɛ asaase no do ma. 30Hom ndzi m’ahomgyeda no, na hom ndzi m’ahotseweebea no nyi: emi nye EWURADZE. 31Mma hom nndan nnkɔ hɔn a wɔyɛ adzebisafo, nye esumamfo so hɔ: mma wɔnnhwehwɛ hɔn ekyir kwan mmfa hɔn nngu homho fi: emi nye EWURADZE hom Nyankopɔn. 32Fa enyidzi ma tsigon no, nyew, na dzi akɔdaa nyi, na suro wo Nyankopɔn: emi nye EWURADZE. 33Na sɛ ɔhɔho bi bɔsoɛ hom asaase do a, mma hom nnyɛ no bɔn. 34Ɔhɔho a ɔabɔsoɛ hom no wɔmma ɔnyɛ dɛ hom mu kuromnyi bi, na dɔ no dɛ woho; osiandɛ hom yɛɛ ahɔho wɔ Egypt asaase do: emi nye EWURADZE hom Nyankopɔn. 35Mma hom mmbu atsɛnkyew wɔ adzesusu mu, adzeker mu, anaa adzehyɛ mu. 36Nsɛn tsenn, abrambo tsenn, efa tsenn, nye hin tsenn, na hom mmfa nsusu: emi nye EWURADZE hom Nyankopɔn a miyii hom fii Egypt asaase do no. 37Na hom nhyɛ m’ahyɛdze nyinara, nye me ntsɛmbu nyinara nsew, na wondzi do: emi nye EWURADZE.

Currently Selected:

Levitikɔs 19: MFANBRP

Highlight

Copy