Levitikɔs 13

Honam Enyi Nsaayarba

1Na EWURADZE kasaa kyerɛɛ Moses nye Aaron dɛ, 2Sɛ nyimpa bi nya no honam wer mu biribi soaa, anaa ntwintwamee, anaa ntokowa ntokowa, anaa odzidzi no honam wer mu yɛ kwata ntsetsewee a, ɔno wɔmfa no mbra ɔsɔfo Aaron, anaa ne mbabanyin asɔfo no mu kor: 3na ɔsɔfo no nhwɛ honam wer no mu: na sɛ nhwi a ɔwɔ ntsetsewee no mu adan fitaa na ntsetsewee no enyi atotɔ mu asen no honam wer no a, ɔyɛ kwata ntsetsewee; na ɔsɔfo no nhwɛ no, na ɔnka dɛ no ho nntsew. 4Na sɛ ntokowa ntokowa no yɛ fitaa wɔ no honam wer no mu, na n’enyi nntotɔɔ mu nnsen wer no, na no nhwi no nndaan fitaa a, ɔno ɔsɔfo no ntow ɔyarfo no mu nda esuon: 5na da a otsia esuon no ɔsɔfo no nhwɛ no: na ɔhwɛ na sɛ ntsetsewee no esianka wɔ n’enyi do, na ntsetsewee no nntserɛwee wɔ wer no mu a, ɔno asɔfo no ntow no mu nda esuon bio: 6na da a otsia esuon no ɔsɔfo no nhwɛ no bio: na, hwɛ, sɛ ntsetsewee no enyi edum, na ntsetsewee no nntserɛwee wɔ wer no mu a, ɔno ɔsɔfo no nka dɛ no ho tsew: ɔyɛ ntwintwamee: na ɔnhor ne ntar, na no ho ntsew. 7Mbom ɔdze noho akɛkyerɛ ɔsɔfo no wɔ n’ahotsewee ho ekyir no, na sɛ ntwintwamee no tserɛw wɔ wer no mu a, ɔmfa no ho nkɛkyerɛ ɔsɔfo no bio: 8na sɛ ɔsɔfo no hwɛ na sɛ ntwintwamee no atserɛw wɔ wer no mu a, ɔno ɔsɔfo no nka dɛ no ho nntsew: ɔyɛ kwata.

9Sɛ kwata ntsetsewee wɔ nyimpa bi ho a, ɔno wɔmfa no mbra ɔsɔfo no; 10na ɔsɔfo no nhwɛ, na, hwɛ, sɛ biribi fitaa soaa bi wɔ wer no mu, na ɔadan nhwi no fitaa, na honam momon rupuw wɔ soaa no mu a, 11ɔyɛ kwata dadaw a ɔwɔ no honam wer no mu, na ɔsɔfo no nka dɛ no ho nntsew: mma ɔnntow no mu: na no ho nntsew. 12Na sɛ kwata no epue efi wer no mu, na kwata no akata owuyarfo no no wer nyinara ho fi n’etsifi keka n’ananadze dɛ mbrɛ ɔda edzi ma ɔsɔfo no ara a; 13ɔno ɔsɔfo no nhwɛ: na, hwɛ, sɛ kwata no akata no honam nyinara do a, ɔnka dɛ owuyarfo no no ho tsew: ne nyinara adan fitaa: no ho tsew. 14Mbom aber biara a honam momon ada edzi wɔ no ho no, no ho nntsew. 15Na ɔsɔfo no nhwɛ honam momon no, na ɔnka dɛ no ho nntsew: honam momon no ho nntsew: ɔyɛ kwata. 16Anaa sɛ honam momon no dan fitaa bio a, ɔno ɔmbra ɔsɔfo no hɔ, 17na ɔsɔfo no nhwɛ no: na, hwɛ, sɛ ntsetsewee no dan fitaa a, ɔno ɔsɔfo no nka dɛ ɔyarfo no no ho tsew: na no ho atsew.

18Na sɛ pɔmpɔ bi bɔ wɔ honam no wer no mu, na ɔsa, 19na soaa fitaa bi bɔsoa anaa ntokowa ntokowa fitaa, ɔberhoamu, ba pɔmpɔ no ananmu a, ɔno wɔmfa nkɛkyerɛ asɔfo no; 20na ɔsɔfo no nhwɛ, na, hwɛ, sɛ n’enyi atotɔ mu asen wer no; na no nhwi no adan fitaa a, ɔno ɔsɔfo no nka dɛ no ho nntsew: ɔyɛ kwata ntsetsewee, oepue wɔ pɔmpɔ no mu. 21Mbom sɛ ɔsɔfo no hwɛ, na sɛ, nhwi fitaa bi nnyi mu, na ɔnntotɔ mu nnsen wer no, na n’enyi dum a, ɔno ɔsɔfo no ntow no mu nda esuon: 22na sɛ ɔtserɛw wɔ wer no mu a, ɔno ɔsɔfo no nka dɛ no ho nntsew: ɔyɛ ntsetsewee. 23Mbom sɛ ntokowa ntokowa no sianka n’ananmu, na ɔanntserɛw a, ɔyɛ pɔmpɔ no itua; na ɔsɔfo no nka dɛ no ho tsew.

24Anaa sɛ gya hyew ano tua bi ba honam no wer no mu, na ɔhyew ano tua no do rupuw yɛ ntokowa ntokowa, ɔberhoamu, anaa fitaa a; 25ɔno ɔsɔfo no nhwɛ: na, hwɛ, sɛ nhwi a ɔwɔ ntokowa ntokowa no do adan fitaa, na n’enyi atotɔ mu asen wer no a; ɔyɛ kwata, oepue wɔ ɔhyew ano tua no mu: na ɔsɔfo no nka dɛ no ho nntsew: ɔyɛ kwata ntsetsewee. 26Mbom sɛ ɔsɔfo no hwɛ, na sɛ nhwi fitaa bi nnyi ntokowa ntokowa no mu, na ɔnntotɔɔ mu nnseen wer no, na n’enyi dum a: ɔno ɔsɔfo no ntow no mu nda esuon: 27na da a otsia esuon no ɔsɔfo no nhwɛ no: sɛ ɔtserɛw wɔ wer no mu a, ɔno ɔsɔfo no nka dɛ no ho nntsew: ɔyɛ kwata ntsetsewee. 28Na sɛ ntokowa ntokowa no sianka wɔ n’ananmu, na ɔanntserɛw wɔ wer no mu, na n’enyi dum a; ɔyɛ ɔhyew ano tua soaa, na ɔsɔfo no nka dɛ no ho tsew: na ɔyɛ ɔhyew ano tua no itua.

29Na sɛ ɔbanyin anaa ɔbaa bi nya ntsetsewee wɔ n’etsifi anaa n’abɔdwesa mu a, 30ɔno ɔsɔfo no nhwɛ ntsetsewee no: na, hwɛ, sɛ n’enyi atotɔ mu asen wer no, na nhwi memen tseatseaba bi wɔ mu a, ɔno ɔsɔfo no nka dɛ no ho nntsew: ɔyɛ ntutui, ɔyɛ tsir anaa abɔdwesa mu kwata. 31Na sɛ ɔsɔfo no hwɛ ntutui ne ntsetsewee no, na, hwɛ, n’enyi nntotɔ mu nnsen wer no, na nhwi tuntum bi nnyi mu a, ɔno ɔsɔfo no ntow ntutui ɔyarfo no mu nda esuon: 32na da a otsia esuon no ɔsɔfo no nhwɛ ntsetsewee no; na, hwɛ, sɛ ntutui no nntserɛwee, na nhwi memen bi nnyi mu, na ntutui no n’enyim nntotɔ mu nnsen wer no a, 33ɔno wɔntwerɛw nhwi no, mbom ntutui no na mma wɔnntwerɛw; na ɔsɔfo no ntow nyia ɔyar ntutui no mu nda esuon bio: 34na da a otsia esuon no mu ɔsɔfo no nhwɛ ntutui no: na, hwɛ, sɛ ntutui no nntserɛw wer no do, na n’enyi nntotɔ mu nnsen wer no a; ɔno ɔsɔfo no nka dɛ no ho tsew: na ɔnhor ne ntar, na no ho ntsew. 35Mbom n’ahotsewee ekyir no sɛ ntutui no tserɛw wɔ wer no mu a; 36ɔno ɔsɔfo no nhwɛ no; na, hwɛ, sɛ ntutui no atserɛw wɔ wer no mu a, mma ɔsɔfo no nnhwehwɛ nhwi memen no; no ho nntsew. 37Mbom sɛ ntutui no yɛ n’enyiwa do dɛ oesianka, na nhwi tuntum efuw wɔ mu a; ntutui no asa, no ho atsew: na ɔsɔfo no nka dɛ no ho atsew.

38Na sɛ ɔbanyin anaa ɔbaa nya ntokowa ntokowa fitaa wɔ no honam wer mu a; 39ɔno ɔsɔfo no nhwɛ: na, hwɛ, sɛ ntokowa ntokowa a n’enyi dum fitaa na ɔwɔ hɔn honam wer mu a; ɔyɛ ayam na oepue wɔ wer no mu; no ho tsew.

40Na sɛ ɔbanyin bi no nhwi pepa wɔ n’etsifi a, ɔyɛ otsipaa; naaso no ho tsew. 41Na sɛ no nhwi pepa wɔ n’etsifi enyim afamu a, ɔyɛ pampamu tsipaa; na no ho tsew. 42Mbom sɛ ntsetsewee ɔberhoamu bi tow ne tsipaa no mu, anaa ne pampamu paa no mu a; ɔyɛ kwata a orupue ne tsipaa, anaa ne pampamu paa no mu. 43Nkyii ɔsɔfo no nhwɛ no: na sɛ ntsetsewee no soaa no yɛ ɔberhoamu wɔ ne tsipaa no mu, anaa ne pampamu paa no mu, dɛ mbrɛ kwata firii tse wɔ honam wer no mu a; 44ɔyɛ ɔkwatanyi, no ho nntsew: ka ara na ɔsɔfo no nka dɛ no ho nntsew; ne ntsetsewee wɔ n’etsifi.

45Na ɔkwatanyi a ɔyar no wɔ no ho no, nsuansuan ne ntar mu, na ɔmbɔ ne tsinhwi mpɛsɛw, na ɔnkata n’anofamfa sor no, na ɔntsea mu dɛ, Ɔho nntsew o, ɔho nntsew o. 46Nda dodow a yar no wɔ no ho no nyinara no ho renntsew; no ho nntsew: noara nkotoo ntsena; nseraban no ekyir na ɔnyɛ ne tsenabew.

47Atar so a kwata ntsetsewee wɔ mu no, sɛ ɔyɛ kuntu atar o, ndwera atar o; 48sɛ ndwera, anaa kuntu, ne nsa anaa ne mfa mu o; sɛ nwoma, anaa adze biara a wɔdze nwoma ayɛ mu o; 49sɛ ntsetsewee no yɛ ebunebun anaa ɔberber wɔ atar no mu, anaa nwoma no mu, anaa nsa no mu, anaa mfa no mu, anaa nwoma adze biara mu a; ɔyɛ kwata ntsetsewee, na wɔmfa nkɛkyerɛ ɔsɔfo no: 50na ɔsɔfo no nhwɛ ntsetsewee no, na ɔntow ntsetsewee adze no mu nda esuon: 51na da a otsia esuon no ɔnhwɛ ntsetsewee no: sɛ ntsetsewee no atserɛw wɔ atar no mu, anaa nsa no mu, anaa mfa no mu, anaa nwoma no mu, anaa biribiara a wɔdze nwoma ayɛ no mu a; ntsetsewee no yɛ kwata a ɔwewe; no ho nntsew. 52Na ɔnhyew atar no, sɛ nsa no o, mfa no o, wɔ kuntu mu, anaa ndwera mu, anaa nwoma adze biara a ntsetsewee no wɔ mu no: na ɔyɛ kwata a ɔwewe; wɔnhyew no wɔ gya mu. 53Na sɛ ɔsɔfo no hwɛ, na, hwɛ, ntsetsewee no nntserɛw wɔ atar no mu, wɔ nsa no mu, anaa mfa no mu, anaa nwoma adze biara mu a; 54ɔno ɔsɔfo no nhyɛ ma wɔnhor adze no a ntsetsewee no wɔ mu no, na ɔntow no mu nda esuon bio: 55na ɔahor ntsetsewee no ekyir no, ɔsɔfo no nhwɛ: na sɛ ntsetsewee no nnsakyeer n’enyi, na ntsetsewee no nntserɛwee a, no ho nntsew; dza atow mu no wɔ mu o, ekyir o hyew no wɔ ogya mu: osiandɛ ɔyɛ nwewee. 56Na sɛ ɔsɔfo no hwɛ, na, hwɛ, ntsetsewee no no hor ekyir no n’enyi edum a, ɔno ɔntsew mfi atar no ho, anaa nwoma no ho, anaa nsa no ho, anaa mfa no ho: 57Na sɛ ɔda ho pue wɔ atar no mu, anaa nsa no mu, anaa mfa no mu, anaa nwoma adze biara no mu a, na orupue: fa gya hyew dza ntsetsewee no wɔ mu no. 58Na atar no, anaa nsa no, anaa mfa no, anaa nwoma adze biara a ebɔhor no, sɛ ntsetsewee no fi mu a, ɔno wɔnhor bio, na no ho atsew. 59Iyi nye mbra a ɔwɔ hɔ ma kwata ntsetsewee wɔ kuntu anaa ndwera atar ho, wɔ nsa anaa mfa, anaa nwoma adze biara mu, ma wɔdze aaka dɛ no ho tsew, anaa wɔdze aaka dɛ no ho nntsew.

Currently Selected:

Levitikɔs 13: MFANBRP

Highlight

Copy