Eksodɔs 16

Maana Na Nkokɔhwerew

1Na wotui fii Elim, na Israel mboanofo no nyinara baa Sin sar a ɔda Elim nye Sinai ntamu no do, nna wofii Egypt asaase do no, no bosoom a otsia ebien no mu da a otsia duenum nye no. 2Na Israelmba mboanofo man mu nyinara hwinhwiin Moses nye Aaron ho wɔ sar no do: 3na Israelmba no see hɔn dɛ, Mbom nkyɛ EWURADZE mma yenwuwu ne nsaano wɔ Egypt asaase do, aber a yɛtsetse nam nkutu ho no, aber a yedzi edziban mee no; osiandɛ hom dze hɛn efir edzi aba sar yi do, dɛ hom dze akɔmfun rubokuku mboanofo man mu yi nyinara. 4#Joh 6.31 Nna EWURADZE see Moses dɛ, Hwɛ, mebɛma edziban efi sor atɔ ama hom; na ɔman no befir edzi akɛtase dza ɔbɔso hɔn ano da kor wɔ ne da mu, ma maasɔ hɔn mahwɛ kyerɛ dɛ wobedzi me mbra do anaa wonnkedzi do. 5Na ɔbɛba dɛ da a otsia esia no, wobesiesie dza wɔdze ba no, na ɔbɛyɛ dza wɔtase no daa no no mbɔho ebien. 6Na Moses nye Aaron see Israelmba no nyinara dɛ, Ewimbir nna hom bohu dɛ EWURADZE eyi hom efi Egypt asaase do: 7na anapa nna hom bohu EWURADZE n’enyimnyam; osiandɛ ɔtse hom ehwinhwin a hom hwinhwin EWURADZE ho no: na hɛn dze, ebɛnadze nye hɛn, na hom hwinhwin hɛn ho? 8Na Moses see dɛ, Iyi bɛba, EWURADZE bɛma hom nam ewimbir ma woeedzi, na edziban anapa ma wɔaamee, osiandɛ EWURADZE tse hom ehwinhwin a hom dze hwinhwin no ho: na ebɛnadze nye hɛn? Nnyɛ hɛn ho na hom hwinhwin, mbom EWURADZE ho a. 9Na Moses see Aaron dɛ, Se Israelmba mboanofo no nyinara dɛ, Hom ntwe mpin EWURADZE enyim: na ɔatse hom ehwinhwin no. 10Na ɔbaa dɛ Aaron rekasa kyerɛ Israelmba mboanofo nyinara no, wɔdandaan hɔn enyi kɔr sar no do, na hwɛ, EWURADZE enyimnyam puei wɔ mununkum no mu. 11Na EWURADZE kaa kyerɛɛ Moses dɛ, 12Matse Israelmba ehwinhwin no: ka kyerɛ hɔn dɛ, Ewimbir hom bedzi nam, na anapa hom edzi edziban amee; na hom ehu dɛ emi nye EWURADZE hom Nyankopɔn. 13Na ɔbaa dɛ ewimbir no Nkokɔhwerɛw bae, na wɔbɛkataa nseraban no do: na anapa no ɔbɔw tɔr nseraban no ho hyiae. 14Na ɔbɔw a ɔtɔree no kɔr sor no, hwɛ, adze bi nkorkorba nketsenketse deda sar no enyi, nketsenketse dɛ famu ɔbɔsu kyenkyenee. 15#1 Kor 10.3 Na aber a Israelmba hunii no, wɔsesee hɔnho nkorkor dɛ, Ebɛnadze nye yi?#16.15 EBƐNADZE NYE YI: Hibriw no ka dɛ: Man hu. Osiandɛ wonnyim adze kor no. Na Moses see hɔn dɛ, Iyi nye edziban a EWURADZE dze ama hom dɛ hom ndzi. 16Iyi nye adze a EWURADZE ahyɛ, Hom ntase bi dɛ mbrɛ nyimpa biara n’edzidzi tse; olonka nkorkor, dɛ mbrɛ hom nyimpa dodow tse, nna hom mfefa, nyimpa biara mfa mma hɔn a wɔwɔ n’asesee mu no. 17Na Israelmba no yɛɛ dɛm, na wɔtasee, binom dze so, binom dze suar. 18#2 Kor 8.15 Na wɔdze olonka susui no, nyia ɔtasee pii no oennya bi ammbor do, na nyia ɔtasee kumaabi no annka no bi: wɔtasee dɛ mbrɛ nyimpa biara n’edzidzi tse. 19Na Moses see hɔn dɛ, Mma obi nngya bi ma adze nnkye do. 20Naaso woenntsie Moses; mbom hɔn mu binom gyaa bi ma adze kyee do, na ɔdɔɔ mbowaba, na ɔbɔnee; na Moses no bo fuuw hɔn. 21Na wɔtasee no anapa anapa, nyimpa biara dɛ mbrɛ n’edzidzi tse: na ewia ano yɛɛ dzen no, ɔnanee. 22Na ɔbaa dɛ, da a otsia esia no wɔtasee edziban no mbɔho, ɔbaako dze yɛ olonka ebien: na mboanofo no mu mpanyimfo nyinara baa bɛkaa kyerɛɛ Moses. 23#Eks 20.8-11 Na ɔsee hɔn dɛ, Iyi nye dza EWURADZE aka no, Ɔkyena yɛ awɔse ahomgye, ahomgyeda krɔnkrɔn ma EWURADZE: hom nto dza hom bɔto, na hom nnoa dza hom bɔnoa; na dza ɔka no nyinara hom mfa nsie ma adze nkye do. 24Na wɔdze siee ma okodur anapa, dɛ mbrɛ Moses hyɛe no: na ɔammbɔn, nkyii so abowaba bi nnyi mu. 25Na Moses see dɛ, Hom ndzi ɔno ndɛ; na ndɛ ɔyɛ ahomgyeda ma EWURADZE: ndɛ hom nnkohu bi wɔ haban mu. 26Nda esia na hom ntase; na da a otsia esuon no dze ɔyɛ ahomgyeda, ɔno mu bi nnkɛba hɔ. 27Na ɔbaa dɛ da a otsia esuon no, ɔman no mu bi fiir edzi dɛ wɔrekɛtase, na woennhu bi. 28Na EWURADZE see Moses dɛ, Hom ropow dɛ wodzi me mbransɛm nye me mbra do ma ekodu dabɛn? 29Hom nhwɛ, osiandɛ EWURADZE ama hom ahomgyeda ntsi, na da a otsia esia no ɔma hom nda ebien edziban: hom mu nyimpa biara ntsena ne tsenabew, mma obiara mmfir edzi mmfi ne tsenabew wɔ da a otsia esuon no mu. 30Nna ɔman no hoom da a otsia esuon no. 31#Nka 11.7, 8 Na Israel fi frɛɛ ne dzin Manna: nna ɔtse dɛ wusa aba, fitaa, na ne dɛw tse dɛ tatar ntrɛtraba a wɔdze ewo ayɛ. 32Na Moses see dɛ, Iyi nye adze a EWURADZE ahyɛ, Wɔmfa bi nhyɛ esusudze olonka ma mfa nsie hom ebusuasantsen; ama woeehu edziban a medze menyɛɛn hom wɔ sar no do, aber a miyii hom fii Egypt asaase do no. 33#Heb 9.4 Na Moses see Aaron dɛ, Fa kutu bi, na fa manna esusudze olonka kor gu mu, na fa si EWURADZE enyim, ma wɔmfa nsie hom ebusuasantsen. 34Dɛ mbrɛ EWURADZE hyɛɛ Moses no, dɛmara so na Aaron dze sii Adasehyɛdze no enyim, ma wɔdze eesie. 35#Jas 5.12 Na Israelmba dzii manna no mfe eduanan, dze kodur dɛ wɔbaa asaase a nyimpa tse do do; wodzii manna no, dze kodur dɛ wɔbaa Keenan asaase no ntoaado. 36Afei esusudze olonka yɛ efa mu ebupɛn du mu kor.

Currently Selected:

Eksodɔs 16: MFANBRP

Highlight

Copy