Eksodɔs 14
14
Mbɛw Po No Ntwae
1Na EWURADZE kaa kyerɛɛ Moses dɛ, 2Ka kyerɛ Israelmba dɛ wɔnsan hɔn ekyir na wɔnkɛkyer nsera wɔ Pi-hahirot a wɔ Migidɔl nye Mbɛw po#14.2 MBƐW PO: Dɛm po yi ara so na wɔfrɛ no Po kɔkɔɔ no. no ntamu na ɔbɛn Baal-zefon no enyim: ne tsentsendo na hom nkyer nsera no wɔ po no ne nkyɛn. 3Na Farao bɛse wɔ Israelmba ho dɛ, Wɔatoto wɔ asaase no do, sar no atow hɔn mu. 4Na mibepirim Farao n’akoma, na obetsiw hom; na mebɛhyɛ m’enyim nyam wɔ Farao nye no dɔm nyinara do; na Egyptfo bohu dɛ emi nye EWURADZE. Na wɔyɛɛ dɛm. 5Na wɔkaa kyerɛɛ Egypthen no dɛ ɔman no eguan kɔ: na Farao nye no nkowaa no hɔn akoma sakyeree wɔ ɔman no ho, na wɔsee dɛ, Ebɛnadze na yɛayɛ yi, dɛ yɛama Israel egyaa hɛn som kɔ yi? 6Na ɔhyehyɛɛ ne tseaseanam, na ɔfaa ne man kaa no ho: 7na ɔfaa ntseaseanam a wɔasan mu eyi ahaesia, na Egypt ntseaseanam nyinara, na hɔn nyinara hɔn do asafohemfo. 8Na EWURADZE piriim Egypthen Farao n’akoma, na otsiiw Israelmba no: na Israelmba no dze ahosɛpɛw kɛse fiir edzi kɔree. 9Na Egyptfo tsiiw hɔn, Farao no mpɔnkɔ nye ne ntseaseanam nyinara, nye no mpɔnkɔdofo, nye no dɔm no, na wɔbɔtoo hɔn dɛ wɔakyer nsera wɔ po no ano, Pi-hahirot nkyɛn, wɔ Baal-zefon enyim. 10Na aber a Farao bɛnee no, Israel memaa hɔn enyi do, na, hwɛ, Egyptfo etu dzi hɔn ekyir reba; na wosuroo dodow; na Israelmba no sui frɛɛ EWURADZE. 11Na wɔsee Moses dɛ, Osiandɛ ndakamona nnyi Egypt ntsi, na eyi hɛn hɔ ma yerubowuwu wɔ sar do yi? Ebɛnadze ntsi na enye hɛn edzi no dɛm yi, dɛ iyii hɛn fii Egypt bae yi? 12Ana nnyɛ yi nye asɛm a yɛkaa kyerɛɛ wo wɔ Egypt no, dɛ, Gyaa hɛn ma yɛnsom Egyptfo no? Osiandɛ nkyɛ obeye ama hɛn dɛ yɛbɔsom Egyptfo mbom sen dɛ yebowuwu wɔ sar do. 13Na Moses see ɔman no dɛ, Mma hom nnsuro, hom ngyina dzinn, na hom nhwɛ EWURADZE no nkwagye a ɔrebɛyɛ akyerɛ hom ndɛ da yi: na Egyptfo a hom ehu hɔn ndɛ da yi, hom nnkohu hɔn bio dabiarada. 14EWURADZE bɔko ama hom, na hom nka hom ano nto mu.
15Na EWURADZE bisaa Moses dɛ, Ebɛnadze ntsi na isu frɛ me yi? Kasa kyerɛ Israelmba, ma wɔnkɔ kan. 16Na ma wo poma no do, na tsen wo nsa wɔ po no do, na paa mu: na Israelmba nnantsew mfa po no ne finimfin wɔ daadze kɛsɛɛ do. 17Na emi, hwɛ, mibepirim Egyptfo akoma, na wobedzi hom ekyir: na mebɛhyɛ m’enyim nyam wɔ Farao do, nye no mpɔnkɔdofo do. 18Na Egyptfo no bohu dɛ emi nye EWURADZE, aber a mahyɛ m’enyim nyam wɔ Farao do, ne ntseaseanam do, nye no mpɔnkɔdofo do no. 19Na Nyankopɔn no bɔfoe a odzi Israel nseraban enyim no, ɔtwee noho na okedzii hɔn ekyir; na mununkum dum no twee fii hɔn enyim, na okegyinaa hɔn ekyir: 20na ɔbaa Egypt nseraban no nye Israel nseraban no ntamu; na ɔyɛɛ mununkum nye sum, naaso ɔmaa kan anadwe: na kor ammba kor nkyɛn anadwe ne nyinara. 21Na Moses tseen ne nsa wɔ po no do; na EWURADZE dze boka mframa dzendzen maa po no kɔr ekyir anadwe no nyinara, na ɔyɛɛ po no asaase kɛsɛɛ, na nsu no mu paae. 22#1 Kor 10.1, 2; Heb 11.29 Na Israelmba no nantsewee faa po no ne finimfin wɔ daadze kɛsɛɛ no do: na nsu no yɛɛ hɔn fadum wɔ hɔn nsa enyimfa, nye hɔn abankum. 23Na Egyptfo no tsiiw hɔn, na wodzii hɔn ekyir kɔr po no ne finimfin, Farao no mpɔnkɔ, ne ntseaseanam, nye no mpɔnkɔdofo nyinara. 24Na ɔbaa dɛ anapa dasu mu no, EWURADZE nam ogya nye mununkum dum no mu hwɛɛ Egyptfo dɔm no, na ɔkaa Egyptfo dɔm no gui. 25Na ohuhuaan hɔn ntseaseanam n’anan hwiir ma no ntwee mu yɛɛ dzen: ma dɛm ntsi Egyptfo no see dɛ, Hom mma yemfi Israel enyim nguan; osiandɛ EWURADZE roko tsia Egyptfo dze ma hɔn.
26Na EWURADZE see Moses dɛ, Tsen wo nsa wɔ po no do, ma nsu no mbra bio wɔ Egyptfo do, hɔn ntseaseanam do, nye hɔn mpɔnkɔdofo do. 27Na Moses tseen ne nsa wɔ po no do, na adze kyee anapa no po no saan n’ekyir peem dɛ mbrɛ ɔtse no ara, na Egyptfo guanee behyiaa no; na EWURADZE toow Egyptfo guu po no ne finimfin. 28Na nsu no saan ekyir, na ɔbɛkataa ntseaseanam, nye mpɔnkɔdofo no, mekyerɛ Farao no dɔm a wodzii hɔn ekyir kɔr po no ne finimfin no nyinara do; hɔn mu kor mpo annka. 29Na Israelmba no dze, wɔnantseew asaase kɛsɛɛ do wɔ po no ne finimfin; na nsu no yɛɛ fadum maa hɔn wɔ hɔn nsa enyimfa, nye hɔn abankum. 30Mbrɛ EWURADZE sii gyee Israel nkwa da no fii Egyptfo nsamu nye no: na Israel hun Egyptfo no dɛ woewuwu gu po no ano. 31Na Israel hun dwuma kɛse a EWURADZE dzii no wɔ Egyptfo do, na ɔman no suroo EWURADZE: na wɔgyee EWURADZE, nye n’akowaa Moses dzii.
Currently Selected:
Eksodɔs 14: MFANBRP
Highlight
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.
