12
خُدا ساڈا پئیو
1ایس لئی جد گواہاں دے اَیڈے وڈّے بدّل سانُوں گھیرا پا لیا اے تے آؤ اسی سارے بھار لاہ کے تے اوس گُناہ نُوں جیہڑا سانُوں شتابی پھسا لَیندا اے۔ ہٹا کے اوس دَوڑ وِچ صبر نال دَوڑیئے جِہدے نال سانُوں واہ پیا اے۔ 2تے اِیمان دے بانی تے کامِل کرن والے یِسُوع نُوں ویکھدے رہیئے۔ جِس اوس خُوشی دے سبّب جیہڑی اوہدے اگّے پئی ہوئی سی بے عِزّتی دی پرواہ نا کِیتی تے صلِیب دا دُکھ جَھل کے خُدا دے تخت دے سَجّے پاسے جا بَیٹھا۔
3تے اوہدے ولّ دھیان کرو۔ جِس اوہدے اپنے نال مَندا کرن والیاں گُنہگاراں دی ایڈی لاگت بازی دا صبر کِیتا۔ پئی تُسی بے دِل ہو کے ہِمّت نا ہارو۔ 4تُساں گُناہ نال اجے اجیہی لڑائی نئیں کِیتی جِہدے وِچ لہو وگایا ہوئے۔ 5تے تُسی اوس نصِیحت نُوں بُھل گئے۔ جیہڑی تُہانوں پُتراں وانگر دِتّی جاندی اے۔ پئی
اَے میرے پُتر خُدا دی جِھڑک دی بے پرواہی نا کر
تے جد اوہ تینُوں ملامت کرے بے دِل نا ہو۔
6کیوں جو جِہنُوں خُداوند پیار کر دا اے۔ اوہنوں جِھڑکدا وی اے
تے جِہنُوں پُتر بناندا اے۔ اوہنوں کولڑے وی مار دا اے۔
7تُسی اپنے سوارن لئی دُکھ جَھلدے ہو۔ خُدا پُتر جان کے تُہاڈے نال سلُوک کر دا اے۔ اوہ کیہڑا پُتر اے جِہنُوں پئیو نئیں جِھڑکدا؟ 8تے جے تُہانوں ایہہ جِھڑک نا دِتّی گئی۔ جیہڑی ساریاں نُوں مِلدی اے۔ تے تُسی حرامدے ہوئے تے پُتر نئیں۔ 9نالے جد ساڈے جِسمانی پئیو سانُوں جِھڑکدے سن تے اسی اوہناں دی عِزّت کر دے ساں تے رُوحاں دے باپ دی ایدوں وَدّھ تابعداری نا کریئے؟ پئی جِیوندے رہئے؟ 10اوہ تے تھوڑے چِر تِیکر اپنی سمجھ نال جِھڑکدے سن پر ایہہ ساڈے فائدے لئی کر دا اے۔ پئی اسی وی اوہدی پاکیزگی وِچ شامل ہو جائیے۔ 11تے ہُن سارِیاں جِھڑکاں خُوشی دا نئیں پر غم دا سبّب معلُوم ہوندیاں نیں پر جیہڑے اوہناں نُوں سَہندے سَہندے پکّے ہوگئے۔ اوہناں نُوں پِچّھوں آرام دے نال راستبازی دا پَھل دیندیاں نیں۔
نصِیحتاں تے خبرداریاں
12تَد ڈِھلّے ہتّھاں تے سُست گوڈیاں نُوں ٹھیک کرو۔ 13تے اپنے ٹُرن لئی سِدّھے راہ بناؤ۔ پئی لنگا بدراہ نا ہو جائے۔ سگوں ولّ کِیتا جائے۔
14سبھناں نال میل رکھن دی کوشش کرو۔ تے اوس پاکیزگی نُوں لَبّھو۔ جِہدے بِناں کوئی خُداوند نُوں نا ویکھے گا۔ 15دھیان نال ویکھدے رہو۔ پئی کوئی بندہ خُدا دے فضل توں خالی نا رہ جائے۔ اینج نا ہوئے۔ پئی کوئی کَوڑی جڑ پُھٹ کے تُہانوں دُکھ دے تے اوہدے سبّب بُہتے لوک پلِیت ہو جان۔ 16متے کوئی زنائی تے عیسَو وانگر بے دین ہوئے جِس اِک ڈنگ دے کھان بدلے اپنا پلیٹھی دا حق ویچ چھڈیا۔ 17کیوں جو تُسی جان دے ہو۔ پئی اودُوں پِچّھوں جدوں اوہ برکت دا وارث ہونا چاہندا سی پر ردّیا گیا۔ ایس لئی پئی بھانویں اوس اتھرُو وگا کے اوہدی بڑی بھال کِیتی تَد وی اوہنوں نِیّت بدلن دا تھاں نا مِلیا۔
18ایس لئی پئی تُسی اوس پہاڑ دے کول نئیں آئے۔ جِہنُوں ہتّھ نئیں سی لا سکدا تے اَگ نال بلدا سی تے اوہدے اُتّے کالی گَھٹ تے ہنیرا تے طوفان۔ 19تے تُرہی دا شور تے کلام کرن والے دی اجیہی اواز سی جِنہاں اوہنوں سُنیا اوہناں تَرلے کِیتے۔ پئی ساڈے نال ہور گلّ نا کِیتی جائے۔ 20کیوں جو اوہ ایس حُکم نُوں جَھل نا سکے۔ پئی جے کوئی جنَور وی ایس پہاڑ نُوں چُھوئے تے پتّھراں نال ماریا جائے۔ 21تے جو کُجھ دسیا اوہ اینج ڈرؤانا سی پئی مُوسیٰ آکھیا پئی مَیں ڈرناں تے کمبناں آں۔ 22سگوں تُسی صِیُّون دے پہاڑ تے جِیوندے خُدا دے شہر یعنی اسمانی یرُوشلِیم دے کول آئے ہو تے لَکّھاں فرِشتیاں۔ 23تے اوہناں پلیٹھی دیاں دی عام جماعت یعنی کلِیسیا جِنہاں دے ناں اسماناں اُتّے لِکھے ہوئے نیں۔ تے ساریاں دے مُنصف خُدا تے کامِل کِیتے ہوئے راستباز لوکاں دِیاں رُوحاں۔ 24تے نَوِیں عہد دے وچولے یِسُوع تے اوس چِھڑکے ہوئے لہو دے کول آئے ہو جیہڑا ہابل دے لہو نالوں چَنگیاں گلّاں کر دا اے۔ 25خبردار اوس آکھن والے توں نا مُکّرو۔ کیوں جو جد اوہ لوک زمین اُتّے ہدایت کرن والے توں مُکّر کے نا بچ سکے۔ تے اسی اسمان اُتّوں ہدایت کرن والے توں مُنھ موڑ کے کِیویں بچاں گے۔ 26اوہدی اواز اوس ویلے تے زمین نُوں ہلا دِتّا سی پر ہُن اوس ایہہ وعدہ کِیتا۔ پئی فیر اِک واری مَیں نِرا زمین ای نئیں سگوں اسمان نُوں وی ہلا دیاں گا۔ 27تے ایہہ گلّ یعنی فیر اِک واری۔ ایس گلّ نُوں ظاہر کر دی اے۔ پئی ہلائِیاں ہویاں شیواں ایس کر کے ٹل جان گِیاں پئی بنائِیاں ہویاں نیں تاں جو جیہڑیاں نئیں ہلائِیاں جاندِیاں قیم رہن۔
28تَد اسی اوہ بادشاہی لے کے جیہڑی ہِلن والی نئیں اوس فضل نُوں نا چھڈئیے۔ جِہدے پاروں اسی ادب تے ڈر نال خُدا دی اوہ بندگی کریئے جیہڑی اوہنوں چنگی لگّے۔ 29کیوں جو ساڈا خُدا ساڑ چھڈن والی اَگ اے۔
