MARKUS 16
16
Hiyap owikmu libag ane
(Mat 28:1-8; Luk 24:1-12; Yoh 20:1-10)
1O sembahyang uruk sambil welatfareg hup atfagma Maria o Magdala hiyap ino men, Yakobus isinga Maria men, Salome men itanowen Yesus ebene are ribik lahuk ulug ahaluwe fanowon onggo paloho wak libag. 2Wak libareg noholug likiyamon te hubet mo yatma waharikim sembahyang ibahon likiyamon ino owik Yesus kilapfag ambeg ino libag. 3Kema laruk lit, ”Owik elma helep humon werehon ari san miyal nisamisi,” il laruk latfag. 4Laruk lit yet harukmen helep humon ino imbiloho ilanma weregma owik husigmu yet hibag.
5Owik husigmu yet hibareg iraham libareg inggik pikit fil ap kabiniyon eke sum yanggowon yaron wan toho heriyegma hibareg yuk libag.
6Yuk libagma ap inowen, ”Nungge fahet yuk lahep. Yesus Nazaret ahun e fam teltuson ino yami rik wahebon an noluk. At te oluk aha, tuma wereg eleg. At emberusa ambeg tuma ha maniyek,” ibag. 7#Mat 26:32; Mrk 14:28”At tam o Galilea lahu. O Galilea umuno lahupteg Yesusen irisi ane roho At weregma hahup. Otsi Petrus men ori winon men weregma lalihipteg unubam ari ehek ulug hiyag isa lalihip,” ibag.
8Hiyag isa lalihip ibagma enekolen inindi pong-pong angge ril folo-folo owik embeselug hirag-hirag libag. Libareg enekolen ap unubam tot hiyag isa fug angge welatfag.
Welatfareg hiyap itano Petrus men otsi winon men enembeg libareg, ”Malaikat yet heheyon inowen ari-ari ehek,” ulug hiyag isibag. Hiyag isibagma Yesus inggareg ebenam atfareg, ”Allahn ap kinangmon mondabi fanowap enebuhuk ulug wene fanowon eleg am fuhon ino o yalimu hubulama hiyag isa laruk lamuhup,” ulug otsi hiyag isibag.#Atogma werehon (ayat 8b) ari Markus inggarehen hahatfag fugmu ap amuwon ekeyen Latin inap enele fam haharoho imbibag.
Maria o Magdala hiyap ino iline Yesus ebenam atfag ane#Ayat 9-20 Markus inggarehen haharoho imbibag fug, ap amuwon ekeyen haharoho imbibag.
(Mat 28:9-10; Yoh 20:11-18)
9Sembahyang ibag sambil likiyamon hubet Yesus oluk atfareg Maria o Magdala hiyap ino iline atam ebenam atfag. Hiyap ino atam siyag angge enebe sabiren undama weregma Yesusen yanggaloho wili fisibag hiyap ino iline tam ebenam atfag. 10Ebenam atfagma ap Yesus min tam welatfag inap itano enehummu siyahen uba yatuk lit weregma enembeg libareg, ”Yesus oluk ahama yet hihi,” ulug hiyag isibag. 11Yesus oluk ahama yet hihireg welahi ibag ane ari hol hibag angge famen ele si ehek peruk latfag.
Yesus otsi piren iniline ebenam atfag ane
(Luk 24:13-35)
12Tot welatfareg Yesus otsi piren o pumbuk eke lul ulug kebunggalma larukmu Yesus ap amuwon hag toho ebenam atfagma yet hibag. 13Yet hibareg suhuloho libareg otsi winon fam, ”Yesus oluk ahama hehe,” ulug hiyag isibagma iren oho enele si ehesa peruk latfag.
Yesus otsi nanggoloben iniline ebenam atfag ane
(Mat 28:16-20; Luk 24:36-49; Yoh 20:19-23; Kis 1:6-8)
14Welatfareg Yesus otsi nanggoloben suburu narukmu Yesus ebenam atfag. Ebenam atfareg, ”Nori, Nonowe oluk ahama yet hehe ehesa angge famen hiren nungge fahet enele si ehesa peruk lit hinindi sohu roho welahep,” ulug per enepfag. 15#Kis 1:8Per enepfareg, ”O munon-manon indit-indit werehon enembeg lahupteg ap munon-manon wene fanowon hiyag isahup. 16We tem peruk lamuhubon ikma pilap enebuhupmu Allahn fanowap enebuhu. Enele si peruk lamuhubon arimano fam Allahn lukuram uhureg siyahap enebuhu. 17We tem peruk lamuhubon arimanowen turuk lamuhubon fahet tu hiyag hisamin: An nunuk uruk lit ap unundama siyag angge werehon yanggaloho wili feseruk lamuhup. Ap enele wal taneg urukon holtuk lamuhup. 18Pisanggowen fato eneptukmu war amuhup fug. Aben narukmu war atuk angge nahup halug war amuhup fug. Ap ouk warukon ininggiken ki isahupmu fano amuhup,” ibag.
Allahn Yesus poholman lisoho wibag ane
(Luk 24:50-53; Kis 1:9-11)
19 #
Kis 1:9-11
Nonowe Yesusen otsi unubam ari hiyag isibagma Allahn Yesus poholman lisoho wibag. Wibagma Allah inggik pikit fil hur atfag.
20Onowe poholma lahibagma Yesus otsi mun ibam man ibam libareg wene fanowon hiyag isaruk latfag. Hiyag isarukmu Yesusen it ler eneptuk lit weregma ap wene holukag ulug ouk warukon hihir eneptuk lit fano ane turuk latfag.
Currently Selected:
MARKUS 16: YLI
Highlight
Copy
Compare
Share
Want to have your highlights saved across all your devices? Sign up or sign in
@ LAI 2018
