ԱՌ ԵՓԵՍԱՑԻՍ ԹՈՒՂԹ Գլուխ Գ
Գլուխ Գ
1 Վասն այսորիկ ես Պաւղոս, կապեալ Յիսուսի Քրիստոսի վասն ձեր հեթանոսաց. 2թերեւս լուեալ իցէ ձեր զտնտեսութիւն շնորհացն Աստուծոյ, որ տուեալ են ինձ ի ձեզ, 3զի ըստ յայտնութեան ցուցաւ ինձ խորհուրդն, որպէս յառաջագոյն գրեցի առ ձեզ սակաւուք. 4առ ի կարող լինելոյ ընթեռնուլ եւ ի միտ առնուլ զիմաստութիւնն զիմ ի խորհրդեանն Քրիստոսի. 5զի այլոց ազգաց ոչ ցուցաւ որդւոց մարդկան, որպէս այժմ յայտնեցաւ սրբոց իւրոց առաքելոց եւ մարգարէից Հոգւովն. 6լինել հեթանոսաց ժառանգակիցս եւ մարմնակիցս, եւ հաղորդս աւետեացն ի Քրիստոս #3։6 Յոմանս պակասէՅիսուս աւետարանաւն, 7որոյ եղէ ես Պաւղոս սպասաւոր ըստ պարգեւաց շնորհացն Աստուծոյ որ տուան ինձ ըստ յաջողութեան զօրութեան նորա, 8(ինձ՝ որ տրուպս եմ ամենայն սրբոց, տուան շնորհքս այս,) ի հեթանոսս աւետարանել զանքնին մեծութիւնն Քրիստոսի, 9եւ լուսաւոր առնել զամենեսին, թէ զինչ է տնտեսութիւն խորհրդոյն որ ծածկեալ էր յամենայն յաւիտեանց առ Աստուծոյ որ զամենայն ինչ արար#3։9 Ոմանք յաւելուն. ի ձեռն Յիսուսի Քրիստոսի. 10զի յայտնեսցի արդ իշխանութեանց եւ պետութեանց որ յերկինս են՝ ի ձեռն եկեղեցւոյ բազմապատիկ իմաստութիւնն Աստուծոյ։ 11Ըստ յառաջադրութեան յաւիտեանցն զոր արար ի ձեռն Տեառն մերոյ Յիսուսի Քրիստոսի. 12որով ունիմք զհամարձակութիւն եւ զնուաճութիւն յուսով ի ձեռն հաւատոց նորա։
13Վասն որոյ աղաչեմ, մի՛ ձանձրանալ ի նեղութեանս #3։13 Յոյնն. իմումմերում որ վասն ձեր է, որ է փառք #3։13 Բազումք. ձերմեր։ 14Վասն այսորիկ դնեմ ծունր առ Հայր Տեառն մերոյ Յիսուսի Քրիստոսի, 15ուստի ամենայն նահապետութիւն յերկինս եւ յերկրի անուանի, 16զի տացէ ձեզ ըստ մեծութեան փառաց իւրոց, հաստատել զօրութեամբ ի ձեռն Հոգւոյն իւրոյ ի ներքին մարդն. 17բնակել Քրիստոսի հաւատովք ի սիրտս ձեր, սիրով արմատացեալք եւ հաստատեալք։ 18Զի կարող լինիջիք հասանել ընդ ամենայն սուրբս, զինչ է լայնութիւն եւ երկայնութիւն եւ բարձրութիւն եւ խորութիւն. 19ճանաչել զառաւելութիւն գիտութեան սիրոյն Քրիստոսի, զի լցջիք ամենայն լրութեամբն Աստուծոյ։ 20Այլ այնմ որ կարողն է առաւել քան զամենայն ինչ առնել յաճախութեամբ քան զոր խնդրեմքն եւ իմանամք, ըստ զօրութեանն որ յաջողեալն է ի մեզ, 21նմա փառք յեկեղեցւոջն #3։21 Ի բազումս պակասէեւ ի Քրիստոս Յիսուս յամենայն ազգս յաւիտենից յաւիտեանս։ Ամէն։
Currently Selected:
ԱՌ ԵՓԵՍԱՑԻՍ ԹՈՒՂԹ Գլուխ Գ: ԳՐԲ1895
Highlight
Share
Copy
Want to have your highlights saved across all your devices? Sign up or sign in
Հայաստանի Աստվածաշնչային Ընկերություն, 2018
Bible Society of Armenia, 2018
