PANGERANGU 30
30
Da patiki-na i Angguru
1Yiada-haka da kareuku patiki-na i Angguru anana i Yaki welingu la Maha:
“Kuonja, ou Ala,
kuonja!
Njàpu-nanyaka na kapàru-nggu!
2Kunduba hama tuna banda;
nda ningu kanandingu-nggu ma-jàngapu.
3Ndedima ku-papekangu pa-manggàna,
nda hawutu-ma papinggu rukuna i Ala.
4Ngga tauya na mahei purunya na awangu?
Na-handàkangu-ka nyuna pawunggu wanya limana na ngilu,
dàngu na-kawuhuku-ya na wai la kalembina,
jàka ndia natunya padira-na na pa-nggubulu awangu?
Nggamu-yaka nu nyuma, dàngu nggamuya na anana?
Jiangu-ma bau pinya!
5I Ala na-patutu-nya na paràndi-naka. Nyuna beri hama temingu-ya la tau mbuu ndàbana da mamai pamaü lai Nyuna. 6Jàkau bonjaya nggàraya na papeka-na Nyuna, napa nahàngga-nggau dàngu na-paloha-nya ba tau kambàliku-kau,” wàna.
Da lii papekangu hawiangu
7“Dou Ala, ku-kamahi-nggau ba ndedipa kumeti, ka muwua-kingganja yiada ba dua batada. 8Ka àmbu jia tikinggu kareuku ma-kambàliku, dàngu àmbu puli-dungga la pamila jàka ndia la pawulu. Wua-nggawa ana ràka nduma-anggu. 9Nadu, jàka kuwulu, nda nggàra kuihi wà-anggau Nyumu raï hi wànggu bianggau. Dàngu jàka kumila, raï hi ku-manganga hi ku-pakajari-ya na tamumu Nyumu,” wàna.
10Àmbu pawauya na haàtu ata la hangga mirina,
napa naràtu-dunggau dàngu hi panjala-kau.
11Ningu tau ma-ràtungu amana
dàngu manda pawilingu inana.
12Ningu tau makaka wikina ili-nanya
hi dira marihaku biayai.
13Ningu tau makaka wikina ba dira hàmuya –
kanjupu hàmu ailulu-ya!
14Ningu tau mahimbu luri wàngu mbana etina;
nda da-paaï dàngu na-kapidihu-ha da tau mila dàngu tau lamanga.
15Na tau ma-palamuji tau madua-ha da anana;
da tamuda pa-kadua-da: “Ndumanggu nyungga!” wàna.
Ninja ba patuda da manda pingu dirada:
16na pangia mameti,
na kawini manda eranya na habola,
na tana màdu na ma-kandànga-nya na urangu,
dàngu na epi na ma-làmbatu la nggi - nggini.
17Na tau ma-paakangu amana jàka ndia inana da mambàda kaweda,#Na hau pa-haleli ndai: inana da mambàda kaweda; Imbarani: nda nabihu parongu inana. ràka-mana jàka ndauhaya la hambeli ka na-nàhiku-ha nggangga da wua matana dàngu ka nanganya mbaku tehiku na metina.
18Ninja ba patuda da malalu haruiha la patama la kanandingu-nggu:
19na mbaku tehiku ma-hawurungu la kiri awangu,
na ularu mabei la pinu watu uturu,
na kapalu mali la padua tehiku,
dàngu da madua da bidi tau da ma-talànga tumbu pa-mbuhangu-da.
20Yiana-yaka na màhina na haàtu kawini na manda tuturu la mini leina: ba nahàla-ka pa-njuraku, ngangu-nanyaka hi na-podahu ngaruna, hàlaka, “Nda nggàra-a pawunda-nggu!” hi wàna.
21Ninja ba patuda da ma-harui la pa-kataku-ha tau pa-nggubulu awangu:
22na haàtu ata na manjadi maràmba,
na haàtu tau nduba na mangala ndàbanja da parinju-na,
23na haàtu tau kawini mapeku pa-mangoma, làti duna ba nda ningua tau mambuha-nya,
na haàtu ata kawini mawàhi-ya na mandapu-na na ràmbuna.
24Yia la pinu tana ninja ba patu batada da banda kudu, tàka dira pinguha, jia-duha:
25Da kahoduku, banda manda kapàru-ha,
tàka da-payemangu pangada la wula wandu.
26Da palànduku, da ma-kapàki-a, banda ma-lamanga-ha,
tàka da-pandoi bia pangia-da la tandula watu.
27Da kabala, banda manda ningu maràmbangu-ha,
tàka hi laku pajuru hàmungu biada-nya.
28Da kumbu laï, banda payàpa wàngu limaha,
tàka ni bianja la uma hanganji.
29Ninja ba patuda da mapalii eti jàka tàngaru-ya na huri panggada, jia-duha:
30Da hinga, banda marihi kapàru la hongada da bandaka mbuu ndàbada dàngu nda ningua pa-mangàdatu-da;
31da bumbu,
da manu wulu da mapangga tanganjiru,
dàngu na haàtu hanganji la hangga rayatu-na.
32Jàka ruku ndubamu hiu pa-kakangu wàngu jangga etimu la pawunda lii ma-akatu, mu-rimangu! 33Nadu, jàka mu-kolukungu huhu, mu-ngalangu minatengga. Jàka mupalu uru tau na luhu na riana. Jàka muwuda ma-karaü, mu-tamangu pahànggangu.
Currently Selected:
PANGERANGU 30: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)