PANGERANGU 28
28
1Na tau akatu na palai jiapa ka nda ningukai mayaulu-ya,
tàka na tau patutungu natoru mbeni hamana na hinga.
2Jàka nanjala na banjaru, dapahi - hilungu da ma-hanggubu-nja;
jàka na-manggàna na liku uru,
na-torungu dàngu na-bunjuku na banjaru.
3Na ma-kuaha ma-kapidihu tau mila,
hamana na ura kawalu ma-paruha ihi woka.
4Nggamu manda pawili-nya na uku, la ngaba tau akatu-ya;
nggamu ma-karadaku-nya na uku ndubaku-nanya tau iraku.
5Na mola nda napi-anya tau akatu,
tàka na tau ma-marubuku-nya i MIRI, na-jàngapu hàmuya.
6Narihi hàmupa na tau mila matànji etina
welingu la tau wulu ma-mbuhangu pa-palapingu.
7Na bidi mini ma-karadaku-nya na uku jiaya na tau manggàna.
Tàka na tau na ma-panggolu dànya na tau hiru hàru na-pamakia-ya na amana.
8Nggamu na mawulu ruku ba nanga matangu banda anguna dàngu na manggari pada - dangu utungu-na,
da pawulu-na da-kanabu la tau mamila-nya eti na tau mamila.
9Jàka ndau tuturu-nya na Ukuna i Ala,
na hamayangu-mbumu nalabu-nya eti i Ala.
10Nggamu ma-pamanda-nya na tau tànji ka nawunda manjala,
nyuna wiki na-kanabu la lambongu kahili.
Na tau ma-yahangu etina
napa pa-kanyuru-ya hi naluri pa-ohangu.
11Na tau wulu na-pàdangu mànu wikina ba manggàna-nanya,
tàka na tau mila ma-paeti natanda-ya nggamuya duna nyuna.
12Jàka nayàpa kuaha na tau hàmu, nambaha eti na tau mbuu ndàbana,
jàka nayàpa kuaha na tau akatu, na rayatu na kawiningu.
13Nggamu ma-winingu njalana nda jia utungu-ana.
Nggamu mapeka-ha dàngu ma-dunjaku-nja da njalana, na-aïya paraïna i MIRI.
14Tembi mànu-yawa i MIRI, napa ka mu-paohangu.
Jàka mulawa-nya Nyuna, napa mu-hanggàmaru.
15Na tau akatu na ma-kuaha-ya na tau manda patoma lurina,
beri hinga ma-kangaüku-ya jàka ndia mbaruangu ma-pa-kalulukungu-ya.
16Na ma-kuaha na ma-kapidihu tau hawiangu, nda ningua kanandingu ma-jàngapu-na;
na maningu kawahangu na mahuda-nya na kaputingu ndau - ndaunguma ba na-pareta.
17Na tau ma-pameti tau napàda-nya ba payaulu-ya lundu metina;
nda haàtu-a ma-ngalangu papàtu-ya nyuna.
18Na tau na maluri dàngu nda nggàra nyurana napa namara.
Na tau na mapingu pànga na lurina napa nanjoru.
19Na tau tungu woka ma-mbangatu paràma na-patoma na nganguna;
na tau na malànja-nya na rehi nda na-patoma-a na lurina.
20Na tau patutungu na-pakanyuru-ya paraïna i MIRI,
tàka na tau na ma-rinjungu parengga wulu, nda namara-a welingu la hukungu.
21Nda nahàmu-a ba he - hekanya na tau;
tàka ningumai nyuna hakimu ma-mbuhangu palii hapapa keha ka ngalangu hawutu ndui.
22Na tau manganga eti na-rinjungu parengga wulu;
nda napàda-anya ba narengga jenginya pamila wàngu.
23Na tau na ma-wuangu lii kanyàngi
la hupu njàpuna parihi pa-malangungu-ya welingu la tau na ma-wotungu anguna.
24Nggamu ma-manganga la inana la amana dàngu hi nakaka-ya ba nda manjala-aya,
hama biana dàngu na tau bohu hawiangu.
25Pangia ngabaya na ngera wiki na-patumbu-ya na pa-lumungu;
nyumu dumu murihi utungu-pa jàka mupawai lai MIRI.
26Nggamu mamonu-nya na papàda eti wikina, nda ningu kanandingu ma-yarahu-na.
Nggamu ma-kikungu papekangu tau manggàna, napa namara.
27Nggamu ma-wuangu la tau mila nda ningua manjaka-nya.
Nggamu ma-kapuda-nya na luri tau mila, napa nanggàna-ya ràtungu.
28Jàka na-katangu kawaha na tau akatu,
na-kawiningu na rayatu;
jàka na-tàlaru na tau akatu,
wàngu hawewa-naka ba na pa-kapipi na tau mamola.
Currently Selected:
PANGERANGU 28: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)