PANGERANGU 12
12
1Na tau na ma-mbuhangu papingu wàngu, na-mbuhangu-ma pa-kataku lii panaungu;
tàka na tau na manda mbuhangu ka panaunya, tau nduba-maya.
2Na tau hàmu nambuha-nya paraïna i MIRI,
tàka na tau na mawuku-ya na ma-akatu napa na-ngalangu hukungu.
3Nda haàtu-a ma-padaingu pa-bunjuku paraï pa-akatu;
tàka na tau matànji duna pa-daingu kapingatu-na nda pakoda-anya.
4Na papaha mahàmu jiaya na pa-hamemu wàna dàngu na pa-ohangu wàna na mini leina,
na papaha mawunda-ya na pamakia wàna na mini leina beri hidu rina ma-pangiwa-ya.
5Na tau tànji na-kanandi-nya jàka nggàraha da mahàmu;
na tau akatu nawuku-ya na kaputingu kabinggilu.
6Na kareuku tau akatu pameti wànguya;
na kareuku tau tànji pamara wànguya.
7Na tau akatu napa na-hanggubalu hi na-tàlaru dàngu nda ningu kananda-na;
tàka na tau hàmu duna napa pa-daingu kapànduku-na lundu la wàla wuana.
8Na tau, pa-wotungu-ya pa-namatu-nya na manggàna-na;
na tau, pa-pawawa-ya pa-namatu-nya na ndubana.
9Narihi hàmupa ka njadi rayatu mangia wawa maningu ngia paràma-na,
welingu ba pahada tau bokulungu tàka hi nda toma bia-nanyai na pangaa-na.
10Na tau hàmu nanamu-ha da bandana;
tàka na tau akatu na-pajàra-ha.
11Na tau raïngu na ma-mbangatu paràma, nadangu na pangaa-na,
tàka na tau na ma-panjàpu-ya na rehi ràmana la manda ningu linguna tau manduba-maya.
12Na tau akatu na-rinjungu pa-ngalangu utuna welingu la tau katadaku;
na tau hàmu beri pingi ai maningu wuangu-ya.
13Na tau akatu nahiru-ya kareuku maànga na patiki-na;
na tau hàmu namara welingu la harui.
14Nimbihu-na na tau na-ngalangu himbalu-na pa-namatu-nya na kareuku dàngu na pawunda-na;
nimbihu-da da-ngalangu tuda wundada.
15Na tau nduba nakaka wikina ba ndedima na-njàrangu,
tàka na tau manggàna na-mbuhangu parongu lii panaungu.
16Jàka nahidu etina na tau nduba, la rehi numa ba na-paloha-nya;
tàka na tau manggàna nda na-kawelangu-a jàka paaka-nya.
17Na tau ma-kareuku wàngu ma-tubangu, pamàndu-nanya na tànji;
na tau ma-kambàliku, patàka-nanya na manda tànji.
18Na kareuku panda pa-nanjarungu na-pamanua eti hama hapanda-ya;
na kareuku manggàna beri tàda ai ma-pamàlaru-ya.
19Na kambàliku papingu memangu-ya la hakambàdiku wua mata,
tàka da kareuku ma-tubangu da-padaingu lundu nu - nuha.
20Na tau na mawuku-ya na ma-akatu, nambuha-nya na manda tànji;
na tau ma-pamukaru-nya na mahàmu napa na-paohangu.
21Na tau na mahàmu nda nanggàna-aya manjurangu;
na tau akatu nanggàna mànuya harui.
22I MIRI na-karaü-nya eti na ma-kambàliku;
tàka nahàmu-nya eti na tau ma-patutungu.
23Na tau manggàna nda na-pawuwa-aya na papingu wàna;
na tau nduba duna na-wewaru-nya na panduba wàna.
24Na mbangatu paràma na-jakaru-nya la panjadi tau maningu kawahangu;
na mayau na-runggatu-ya na tau la panjadi ata.
25Na handuka-nya na luri na-pamuna-nya na ringgitu,
tàka na kareuku mànjaku na-pahàmu eti.
26Na tau hàmu narihi pa-kanyurungu welingu la tau lihi umana;
na tau akatu na-njàrangu ruku akatu-na.
27Ba wàngu pamayau nda pangala-anya na parinju eti;
ba wàngu pa-mbangatu paràma na-ngalangu pawulu wàngu na tau.
28Na tau na makiku-nya na ànda ma-padeningu napa na-paohangu;
na tau na makiku-nya na ànda na ma-akatu, hanggangu-nanya la meti.
@LAI 1995 Indonesian Bible Society (Lembaga Alkitab Indonesia)