PILIPI 1
1
1Dou da angu dedinggu mbuu ndàbami banjaru-na i Ala ma-ngiangu la Pilipi, dàngu mambàda pa-mbulungu dàngu i Karitu Yehu. Hamangui da angu dedi da liku uru dàngu da ma-pambapangu la kabungguru!
Nyungga Paulu anguma i Timutiu ba atana i Karitu Yehu kama, 2ma-monungu ka màla àruki i Ala na Amanda dàngu i Miri Yehu Karitu nawua-nggai kanyuru dàngu peku hàmu.
Na hamayangu-na i Paulu ndumana na kabungguru
3Handàka pangàda - handàka pangàda-nggunggai ku-pamalangu-nya i Ala. 4Dàngu handàka hamaya - handàka hamaya-nggunggai ndumami mbuu ndàbami, dàngu mbaha eti-manggu ba ku-hamayangu. 5Ku-pamalangu-nya i Ala rukuna bai pambapa dàngga la pa-bobaru-ya na Lii Mànangu welingu lai Ala, piti welingu la lodu kawunga-na lundu nàhu. 6I Ala wikima duna na ma-pakiri-nya nu na paràma mahàmu lai nyimi, dàngu kupi hàmu-manya duku ba na-pangala-manya duna lupa na-palundu-nya la lodu mai belina i Karitu Yehu. 7Ràka-mana jàka tuna nu ba ku-pangàda-nggai, nadu ba ni mànunggai nyimi mbuu ndàbami la etinggu. Dàngumbu bai angungga la pangala-nya na pa-namungu-na i Ala na pawua-nangga; nàhu ba ku-ngiangu la uma kapàtangu, hamangui ba la hambeli-ka la papulu angunya dàngu la pa-padàdu-nya na Lii Mànangu. 8Napi-mangga i Ala ba kanjupu rinju-nggunggai wàngu mbuha weli eti weli puhu-nggunggai na ma-pawelingu lai Karitu Yehu wiki.
9Yiana-ya na hamaya-nggunggai ndumami: màla àruki ka na-parukangu na mbuha-minya i Ala dàngu na angumi dàngu ka naingu bonjangu-na na pingumi la ma-padeningu dàngu timbangu ma-pananjarungu. 10Nu ba tuna pingu-minyaka papindi-ya jàka nggàraya na mahàmu halawàla, hi nda ana nggàra nyurami jàka ndia nda ana nggàra pa-panjala wàngukai la lodu mai belina i Karitu. 11Napa nabundu làndangu wàngu pawunda mahàmu langatàka na lurimi da pa-patumbu wikina i Yehu Karitu; hi pabokulu-ya dàngu hi pawo - wotungu-ya napa i Ala.
Luri ndumana i Karitu
12Màta kai pinya wànggu, da matu - tumbuka lai nyungga ba jia pàkuyai na parihi dangu wàna na tau na marongu-ya dàngu na mawaiya na Lii Mànangu. 13Jiaya nuna-duka na papi wànanya mbuu ndàbana na madai la uma hanganji dàngu da tau hawiangu-ka la paraingu yiana ba ruku lumu-nggunya i Karitu hi kiri puhika la uma kapàtangu. 14Tàka na tamanggu la uma kapàtangu jia-yaka na pa-màndungu wàna na etina lai Miri na tau dangu la honga tau Karitu la paraingu yiana, hi hama huka toru mbenida pa-bobaru-ya na lii languna i Ala#na lii languna i Ala; da lawiti ndai da manda pirada: na lii langu nuna. dàngu nda mangàdatu-da.
15Nimanjai nyuna hawiangu lai nyuda da ma-bobaru-ya i Karitu ruku malara etida dàngu ka pahànggangu wàngu ba wàda, na nyuna hawiangu duda matànji-maya na pawuku-da ba da-bobaru-ya i Karitu. 16Ruku mbuha-mada-nyaka i Ala dàngu nyungga hi kiri wunda-danya nuna maa ba dapi-dunya ba mbàda pawai ngaba-nanggaka i Ala la pa-jakaru-nya ba ma-deningu-maya na Lii Mànangu. 17Tàka da tau hawiangu duda, nda nahàmu-a na pawuku-da ba da-bobaru-ya i Karitu; himbu-danya nduma wiki-ma-ada ba da-bobaru-ya. Ka bonja wànya na handuka-na la uma kapàtangu, wàdangga làti pamonu-da.
18Na nyuna, màlawa nyuna! Jiapa ka nggiki hamana-kadu, ka matànji-ya na pawuku-da ba dawunda-ya nuna, ka manjala-yakai, tàka nu hi pa-bobaru-maduya i Karitu; jiaya hi kumbaha eti. Dàngu pa-daingu mbaha eti-manggu duku, 19maa ba pi-manggunya ba pa-pahàla-ka duku napa rukuda da hamayangu-mi dàngu wàngu pa-ndulangu-na na Ngahuna i Yehu Karitu. 20Na parinju halawàla-nggu dàngu na pamonu-manggu ka àmbu jia nda duluku-nggu la wai ngabanggu wànggu. Tàka kumonu-manya, ka nua nainguna, ri - rihi nàhuma, ka kutara uranggu la pa-pabokulu-ya i Karitu wàngu ndewa hamangu-nggu – ka luri-nggunya ka meti-nggunyakai –. 21Nadu nyungga duku jiaya i Karitu-ma na ngia pa-orangu-na na luringgu! Tàka na meti pamàngi wànguya wànggu. 22Na nyuna jàka peku wundanggu paràma marihi palingu, nu ba kuluri la pinu tana, ka nda kupi-anyapa jàka nggiya na papindi-nggu. 23Pa-pandàngi mbeli mbapangu-ka. Ku-rinjungu langatàka-ma duku pa-taluru-nya yia na pinu tana palua pa-ndàdiku lai Karitu, maa ba jiaya nunadu na mahàmu halawàla; 24na nyuna, ndumana na pahàmu wàmi nyimi, narihi hàmupa jàka pa-daingu ndàdiku-nggu la pinu tana yiana. 25Kupi hàmu-manya duku nuna. Tuna nuduka hi kiri pinggunya ba pa-daingu ndàdiku-nggu lai nyimi mbuu ndàbami, ka peku ndula-nggunggai kai parukangu pa-àtalu dàngu kai parukangu pambaha eti la pawaimi lai Miri. 26Jia ba tuna, jàka kubeli napa lai nyimi, nyimi mambàda pa-mbulungu dàngu i Karitu Yehu, pabo - bonjangu-nanyaka na danguna na pa-hamemu wàmingga nyungga.
27Nu ba tuna, na ma-papingi nàhu jiaya jàkai luri pa-namatungu la pa-karuhi-na na Lii Mànangu rukuna i Karitu. Nu ba timi nu, jàka era pa-hàmburu dànggunggai jàka ndiakai napa kurongu ba na-jorutu na kahaungu-mi dàngu ba handàka pa-ringgitungu-mi lumuna na pawuku na ma-mbulungu dàngu na parinju-mi na ma-mbulungu; nu lumuna na pawai na ma-patangangu la Lii Mànangu welingu lai Ala. 28Màtawa kai tara ura mànu, àmbi mangàdatu-nja da papami. Nu ba timinu, jakaru-minya ba jiangu-ma napa dakàku, dàngu ba nyimi napa matalu, ba i Ala wikima na mawua-nggai talu. 29Nadu i Ala nawua-nggainyaka na pa-namungu-na nda mbulungu biana kai pawai lai Karitu, tàka jia-mbuya kai pàdangu mayila lumuna i Karitu. 30Nàhu miangu-ngga la pa-paringgitu dàngga la paringgitungu na pa-ukuru-nda; nu na pambàda itami ba ku-paringgitu-nya àmangu, dàngu ba jia-mayapa nàhu na pa-paringgitu-nggu, hama tuna na pambàda rongumi nàhu.
Currently Selected:
PILIPI 1: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)