DIHA 9
9
Na panduangu wàna ba mbabunya na Paha
1La wulangu hau la ndaungu padàmbu wàna la hambeli dunjaku-danya na Mehiru da tau Ihirailu, i MIRI napanii-nya i Muha la maràda telangu Hinai, napanii i MIRI, 2-3“La tànggalu hakambulu patu la wulangu yiana, piti welingu la tama lodu, lupangu-ma nambabu-nya na Paha na tau Ihirailu pa-namatu-nya na kalaratu na pambàda kawuku,” wàna. 4Ba tuna paràha-nanyaka na banjaru Ihirailu i Muha pambabu-nya na Paha. 5Dambabunya la maràda wara Hinai la malingu tànggalu hakambulu patu nu la wulangu hau. Mbuu ndàbada da-pahàra padeni-manya hama tuna na pareta-na i MIRI lai Muha.
6Na nyuna ningu la hongada nyuda ba mapira-ha da ma-iraku, rukuna ba da-jonggaru mameti, tàka hi nda pekuda la lodu nu pambabu-nya na Paha. Ka lua-danyaka la hanggada i Muha dàngu i Harungu 7hi dapanii, “Nyuma yia ma-iraku ba mbàda jonggaru-maka mameti. Ka nggikina hi lupangu kahika kama nyuma hi nda peku wotuma kameti maraku lai MIRI dàngu da angu dedima?” wàda.
8Nahema i Muha, “Nedingu kàdi lundu ku-ngalangu lii kaloka welingu lai MIRI,” wànanja.
9I MIRI na-paràha-nya i Muha 10papanii-nya na banjaru Ihirailu, “Jàka ningu ma-iraku la hongami jàka ndia la ana umbuku-mi rukuna ba na-jonggaru mameti jàka ndia maningu ngia palua-na la mamarau, tàka lupangu-mai duna nyuna na mbabunya na Paha ndumana i MIRI. 11Na nyuna na mbabu nu lupangu-ma la hili hau wulangu ma-malamiri, nu la rudungu tànggalu hakambulu patu la wulangu padàmbu wàna. Mbabu-nyawa na lodu nuna bai wàngu pangangu mbimbi Paha dàngu roti nda patai wolungu dàngu wai rii ma-paita. 12Àmbu nggàradu pabiimi welingu la pangangu nu lundu la mbaruna haromu, dàngu àmbu jia hapungu-mbu rii kawudu papata welingu la rii banda pahunggu maraku-ngga Nyungga. Mbabu-nyawa nu na Paha pa-namatu-nya na kalaratu-na mbuu ndàbada.
13Na nyuna na tau na manda iraku dàngu nda ningumbu ngia palua-na, tàka hi nda nambabu bianyai na Paha, nda kureki-ayapa ba haàtu ma-welingu la banjaru-nggunya, rukuna ba nda na wotungga kameti maraku la rehi pa-kawuku. Lupangu-ma na tau nuna na-handepa-ya na injana ruku njalana.
14Jàka na-mbuhangu pambabu-nya na Paha na haàtu tau nàmu na ma-ngiangu la hongami, lupangu-ma nambabu-nya pa-namatu-nya mbuu ndàbada da kangguti kalaratu-na. Nuna na uku nanggàna ndàbaya na tau, ka tau Ihirailu-ya ka tau namu-yakai,” wàna.
Na karumangu na ma-handaraku
(Lu. 40:34-38)
15-16La lodu pahada-nya na Maüna i MIRI, puru-nanyaka na karumangu pa-pandàda-nya nu na Maü. La rudungu lundu la mbaru hama epiya ba itaya na karumangu. 17Handàka dita - handàka ditana nu na karumangu, nyànggaru-danyaka maüda da tau Ihirailu hi da-hadangu palaku. Tàka la ngia papuru-na nu na karumangu, lai numbuha da hili pa-hadangu maüda. 18La hupu liina i MIRI da-nyànggaru maüda da banjaru Ihirailu dàngu la hupu liina i MIRI-mbu ba dahili pahada-nja. Ba ngala ninyapa nu na karumangu la dita Maüna i MIRI, pa-engangu-madanya lai nu. 19Jàka namandai na karumangu la ditana nuna na Maü, da-karàdaku-ma la pawàna i MIRI hi nda dalaku welingu lai nu. 20Na nyuna talànga handàka-na ana pira mbua lodu-ana nuna na karumangu pa-padaingu la ditana nuna na Maü. Jiapa ka nda nggi - nggiki-nakai jiaya na hupu liina i MIRI na matàpu-ya na ndàdiku-da la hau pangia hamangui na hadangu-da palaku. 21Talànga handàka-na piti welingu la kalitu lundu mbarua ba na-padaingu nuna na karumangu, tàka jàka ditangu wàna-kika na karumangu la mbaru, laku-madanyai duda nyuda. Pirangu bia ba nadita na karumangu, ka loduya ka rudungu-yakai, laku-madanya. 22Ba ngala ninyapa nu na karumangu la dita Maüna i MIRI, ka dàmbu loduna, hau wulana, hau ndauna, jàka ndia na rihi kai, tuna numai mandaina na pa-engangu-da lai nu. Jàka nadita-ka na karumangu, hina-duka hi dalaku. 23Na-padaingu-da la hau pangia dàngu na lakuda la hili hau pangiai, pa-namatungu-danya la hupu liina i MIRI-ma, na pawua-na la ngaruna i Muha.
Currently Selected:
DIHA 9: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
