DIHA 4
4
Da wai ngera tau Lewi kalibaru Kehàtu
1I MIRI na-paràha-nya i Muha dàngu i Harungu 2pa-paloku-ya na diha tau Lewi la kalibaru Kehàtu pa-namatu-nya na biliku-da nimbihu-da, 3hàla ka-tulihu-ha da tamuda mbuu ndàbada da tau mini da matailu kambulu lundu la malima kambulu-da da ndaungu lurida, da mapàhi paràma la paràma panda hinggilungu la Maüna i MIRI. 4Na paràma-da nyuda jiaya la pa-tanara-ha da kanaingu da mahupu matua.
5I MIRI nawua-nya i Muha yiana na kalaratu: Jàka jia-yaka na rapa nyànggaru ngia pa-pamaüngu, lupangu-ma datama la Maüna i MIRI i Harungu dàngu da anana, ka da papuru-nya na tera dimbaku la hangga Pàti Pa-ràndingu, dàngu ka da-pandàda wànya na Pàti Pa-ràndingu nuna na tera. 6Hàlaka nu lupangu-ma dahili pandàda wànya hawàla manula talunyaru, ka mangu pa-wàlahu-nya hawàla tera kawuru la pinuna, dàngu ka dapahau-nja da ai paduku wànya nuna na Pàti.
7Lupangu-ma da pa-wàlahu-nya hawàla tera kawuru la pinu menja roti payema-nya i MIRI, hàla lupangu-ma datuha la pinu menja da kawinga, da tobu robu pangia dupa, da tobu robu pangia hunggu maraku dàngu kadihi pa-maraku wàngu angguru. Lupangu ningu mànu bàdi roti la pinuna na menja. 8Mbuu ndàbada nuda lupangu-ma da-pandàda wànja tera rara, hàlaka hi dahili wàlahu-nya hawàla manula talunyaru la pinuna, dàngu ka pahaunja da ai paduku wànya na menja.
9Lupangu-ma dapiti hawàla tera kawuru ka pandàda-nya na tandai palita papohu-nja da palita-na, da pa-paili wàngu humbu palita dàngu da pa-pandemangu wàngu, dàngu mbuu ndàbada da kanai mina haitungu. 10Lupangu-ma da-kawuhuku wànya manula talunyaru na tandai palita dàngu mbuu ndàbada da pa-màtu wàna, ka mangu patuha la ngia paduku wàngu.
11Hàlaka nu lupangu-ma da pa-wàlahu-nya hawàla tera kawuru la pinuna na ngia pawotu maraku na-mawelingu la àmahu rara, ka mangu pa-pandàda wànya hawàla manula talunyaru, hàla ka pahaunja da ai paduku wànya na ngia pawotu maraku. 12Mbuu ndàba da kanaingu da pawàngu daa la Rowa Matua dapitiha bàdi ka da-kawuhuku wànja hawàla tera kawuru. Hàla lupangu-na da-pandàda wànya hawàla manula talunyaru, ka mangu patuha la pinu ngia paduku wàngu. 13Lupangu-ma da paili-ya na ngia pawotu maraku welingu la aü, ka mangu pa-wàlahu-nya tera umba la pinuna. 14Tàka la pinuna nunai lupangu ma da-bànjalu-ha mbuu ndàbada da pawàngu ba lumungu la ngia pawotu maraku nuna: da kanai epi, da njàkapu, da huru, dàngu da tobu robu. Hàla nuda mbuu ndàbada, lupangu-ma da-pandàda wànja hawàla manula talunyaru hi pahaunja da ai paduku wànja.
15-20I MIRI napanii-nya i Muha dàngu i Harungu, “Jàka jia-yaka na rapa nyànggaru ngia pa-pamaüngu, i Harungu dàngu da anana lupangu-ma da tama la Maünggu ka da-pandàda-nja mbuu ndàbada da malanja dàngu da pamàtu wàna da maninja lai nu. Ba hàlaka nu hina-duka hi peku maida da tau Kehàtu paduku-ya. Tàka na nyuna nda ukua nyuda pa-tàngaru-ha, palihi-nja jàka ndiakai pa-jonggaru-ha nuda da malanja, ba mbàda pa-pahinggilu-haka ndumanggu Nyungga. Jàka dawunda-ya na matungu nu dameti-ma napa. Jia ba tuna ka àmbu podahu-ha da tau Kehàtu welingu la kabihu Lewi, lupangu-ma i Harungu dàngu da anana ka da patanggu-nja nimbihu-da lai nyuda jàka nggàraya bàdi na pangàndi-da. Nunaya na wai ngera tau Kehàtu ba paleli-nya na Maünggu. I Eliahàru anana i Harungu jiaya na ma-hanobaku-ya pa-tanara-ya nggubulu-na Maünggu, na mina nduma epi, dupa hunggu maraku uhu nggàndumu nduma mangejingu ma-padaingu, mina nduma ba wunda lii dàngu mbuu ndàbada da maninja la Maünggu,” wàna.
Da wai ngera tau Lewi la kalibaru Nggerihongu
21I MIRI na-paràha-nya i Muha 22pa-paloku-ya na diha tau Lewi la kalibaru Nggerihongu pa-namatu-nya na biliku-da nimbihu-da. 23Lupangu-ma na-tulihu-ha i Muha da tamuda mbuu ndàbada da tau mini da matailu kambulu lundu la malima kambulu-da da ndaungu lurida da mapàhi paràma la paràma panda hinggilungu la Maüna i MIRI. 24Pa-wuangu wai ngeraha nyuda ka daduku-ha da malanja yiada: 25Na tera na na Maü dàngu na ndàdana na mangia dalu dàngu na mangia pinu na ma-welingu la manula talunyaru, na tera la pindu Maü, 26da tera dimbaku dàngu da liku nduma talora winggiru-na na Maü dàngu na ngia pawotu maraku, na tera la pindu bokulu talora dàngu mbuu ndàbada da pamàtu wàna da pawàngu ba pakàna-nja nuda mbuu ndàbada-ka. Nyuda ma-hanobaku-ya la pa-tanara-ya mbuu ndàbana na paràma na manggàna-ha nuda ka mbuu ndàbada. 27Lupangu-ma i Muha dàngu i Harungu ka da hamata-ha ka peku pahàra-danja paraï da tau Nggerihongu nu da paràma pawua-danja paraï da i Harungu dàngu da anana, dàngu ka dangàndi-ha mbuu ndàbada da ngàndi da pangàndi-ka. 28Nudaha da wai ngerada da tau Nggerihongu daa la Maü; nuda da wai ngera lupangu-ma pahàra-nja ba dàngu hamata-naha i Itamàru anana i Ratu Harungu.
Da wai ngera tau Lewi la kalibaru Marari
29I MIRI na-paràha-nya i Muha, pa-paloku-ya na diha tau Lewi la kalibaru Marari pa-namatu-nya na biliku-da nimbihu-da. 30Lupangu-ma na-tulihu-ha i Muha da tamuda mbuu ndàbada da tau mini da matailu kambulu lundu la malima kambulu-da da ndaungu lurida da mapàhi paràma la paràma panda hinggilungu la Maüna i MIRI. 31Pa-wuangu wai ngabaha nyuda ka daduku-ha da karangga-na na Maüna i MIRI, da patengangu-na, da kambaniru-na dàngu da latana. 32Dàngumbu da tinjada da oka talora la winggiru-na na Maü, hamangui da lata da kandutuku dàngu da likuna dàngu mbuu ndàbada da pakakahu da pawàngu jàka pahada-nya. Pa-wuangu wai ngeraha nimbihu-da nyuda la pangàndi banda malanja, da pa-panduma-nja. 33Nudaha da wai ngerada da kalibaru Marari; mbuu ndàbada da paràma-da la Maüna i MIRI lupangu palaku-ha ba dàngu hamata-naha i Itamàru anana i Ratu Harungu.
Ba dihaha da tau Lewi
34-48Nunjuya na pareta-na i MIRI, i Muha, i Harungu dàngu ba hapajia-ha da liku uru banjaru da-paloku-ya na dihaha da tailu kalibaru la kabihu Lewi, nu na Kehàtu, na Nggerihongu dàngu na Marari. Ba da paloku-ya nuna na diha dawàngu pa-pandutu - pandutu-nja welingu la hau biliku hi mangupa la hau biliku. Da-tulihu-ha da tamuda mbuu ndàbada da tau mini da matailu kambulu lundu la lima kambulu-da da ndaungu lurida da mapàhi paràma la paràma panda hinggilungu la Maüna i MIRI. Tuna nu na pangala-da:
| Kalibaru | Na danguna na tau |
|---|---|
| Kehàtu | 2.750-ya |
| Nggerihongu | 2.630-ya |
| Marari | 3.200-ya |
| Nggubulu-da: 8.580-ha |
49La pareta-na i MIRI la ngaruna i Muha, nimbihu-na na tau pa-tulihu-ya dàngu maràngga nga - ngaba-mada da pa-wuangu-ha jàka nggàra bàdi pa-tanara-da, dàngu jàka nggàra bàdi paduku-da.
Currently Selected:
DIHA 4: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
