DIHA 36
36
Na kangeha-da da kawini mangoma
1Ba hapajia-ha da ngora biliku la kalibaru Nggiliatu, anana i Makiru nu na umbuku-na i Manahi, anana i Yuhupu, dalua la hanggana i Muha dàngu da liku uru hawiangu. 2Dapanii nyuda, “I MIRI na-paràha-nggai nyimi pa-paberi-nya na tana la tau Ihirailu ba wàngu patunya undi. Na-paràha-mbunggai nyimi la pawua-ya na tana kangeha angu ma-paluhu i Helapehàtu la anana kawini. 3Na nyuna etiwaa-manya bàdi, jàka da-mangoma la tau mini hau kabihu, ka kanabu-danyaka napa da tanada nyuda la tau hau kabihu. Nu ba tuna nu ka manjapitu-duna-nyaka na tana ngabama nyuma, nu na tana pa-panduma-nggama. 4La Ndaungu Pa-belingu, la rehi pabeli-nja la mamangu wunganja, mbuu ndàbada da banda da malanja pambàda danggangu, da tana manguda da anana kawini i Helapehàtu pa-daingu-danyaka napa ba damangunja kabihu leida nyuda, ka tamburuhu-danyaka nuda da tana welingu la kabihu-ma nyuma,” wàda.
5Ka patàka-nanyaka la banjaru Ihirailu i Muha na pareta yiana welingu lai MIRI, “Ma-padeningu-maya na papanii-da da tau da ana umbuku-na i Yuhupu, 6dàngu tuna nuduka hi kiri paniina i MIRI ba pekuda pawàngu etida lai nggamu biaha da-mangoma ningu da pambuha-da da anada kawini i Helapehàtu, mili àru nyuna la ma-pahama kabihu dàngu nyuda. 7Na tana kangeha nimbihu tau Ihirailu pa-daingu pakangu-mana duna napa la kabihu-na. 8Nimbihuna na kawini na ma-hanggaungu tana kangeha la hau kabihu banjaru Ihirailu, lupangu-ma na-mangoma ningu la tau daa la kabihu nuna. Nu ba tuna nu nimbihu-na na tau Ihirailu napa na-kangeha-nya na tana kangeha boku la mangilu-na, 9hi nda na-haleli nu napa na tana kangeha welingu la hau kabihu la hili hau kabihu. Nimbihu-na na kabihu banjaru, pa-daingu mangu-mananya duna napa na tana kangeha wikina,” wàna.
10-11Jia ba tuna, pa-namatu-nya na hupu liina i MIRI lai Muha, da anana kawini i Helapehàtu da malima-da, nu i Màhala, i Tiràhu, i Hòkula, i Miluka dàngu i Nua da mangoma ningu la tambaru paana minida, pa-namatu-nya la mbara amada. 12Nyuda da-mangoma la tau la kali - libaru daa la kabihu banjaru Manahi, anana i Yuhupu. Nu ba tuna nu, da tana kangeha-da nyuda daingu-mada ba manguna na kabihu banjaru-na na ama-daha.
13Jiaha yiada-duka da kalaratu dàngu da pa-lawàdi pawua-na i MIRI la banjaru Ihirailu la ngaruna i Muha, ba la ma-ndidaru Muapu-ya na banjaru Ihirailu la hingi Luku Yorundangu, la lihi paraingu Yeriku.
Currently Selected:
DIHA 36: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)