DIHA 35
35
Da paraingu nduma tau Lewi
1La ma-ndidaru Muapu, la hingi Luku Yorundangu, la lihina na paraingu Yeriku, napanii i MIRI lai Muha, 2“Patàka-nya na banjaru Ihirailu, ba lupangu-ma welingu la tana kangeha na pangala-da napa, dawua-nja da tau Lewi ana nda pira mbua paraingu dàngu da maràda rumba la winggiru-da ka peku ndàdiku ninguda lai nu da tau Lewi. 3Napa mangu tau Lewiha nuda da paraingu ka da-ngiangu ningu. Na maràda rumba la winggiru-da jiaha da nduma bandada la hondu dàngu da bandada hawiangu. 4Na nggàilaru-da da maràda rumba 450 metiru-da welingu la kangeli paraingu hanggangu la nggini bia. 5Ba tuna na tana ngaba tau Lewi na ka-patungu larana, na ma 900 metiru-na na hukutu-na la nimbihu karaha-na, tàka na paraingu-na la padua-ya. 6Lupangu-ma iwuanja da tau Lewi nomu mbua paraingu ngia pamara, ngia pa-handera ninguda da tau mambàda pameti tau dàngu nda wukuda. Hinggilu-da nuda hili wua-mbunjai da tau Lewi patu kambulu dàmbu paraingu hawiangu 7dàngu da maràda rumbada. Ba tuna nggubulu-da patu kambulu walu mbuada da paraingu nduma tau Lewi. 8Na danguda da paraingu tau Lewi la tana ngaba nimbihu kabihu Ihirailu, lupangu-ma itàpuya pa-namatu-nya na bokulu kuduna nuna na tana ngaba,” wàna.
Da paraingu ngia pamara
(Bel. 19:1-13; Yuh. 20:1-9)
9I MIRI na-paràha-nya i Muha 10pa-patàka-nya la banjaru Ihirailu da kareuku yiada, “Bai pala-yaka na Luku Yorundangu dàngu bai tama-nyaka na tana Kanaàngu, 11lupangu-ma kai pa-hinggilu-ha da paraingu ngia pamara, ka dapalai ningu lai nu da tau da mambàda pameti tau dàngu nda wukuda. 12Napa la paraingu nuda namara ningu nuna na tau welingu la kalembi-na na tau pa-pameti-na da ma-mbuhangu patungu hilu kiringu. Nadu, na tau pa-panjala ruku pameti tau nda peku ana la pa-pameti-ya jàka ndedi pareha-ya na palakara-na la rapatu pareta. 13Kawàri-wa nomu mbua paraingu ngia pamara, 14tailu mbua la pahunga loduna na Luku Yorundangu dàngu hili tailui la tana Kanaàngu. 15Nuda da paraingu ba nomuda jiaha da paraingu ngia pamara ndumami nyimi tau Ihirailu dàngu nduma tau tàka na ma-ndàdiku la pahiku-mi, ka lu ndàdiku-ananya jàka ndia ka ndàdiku pangalangu-nanyakai. Nggàmu biaya na mambàda pameti tau dàngu nda wukuna, pekuna papalai la hau paraingu la hongada nuda da paraingu.
16-18Na nyuna jàka ningu haàtu tau ma-pameti tau wàngu madàka bàhi jàka ndia wàngu watu jàka ndia wàngu aikai, njala-mananya na tau nuna ba pameti-nanya taudu; dàngu lupangu huku pameti-ya bàdi. 19Peku-mana pa-pahàra-nya nu na hukungu meti paraï kalembi nditaku-na na tau pa-pameti. Jàka na-jàngapu-ya nu na ma-pameti tau, peku-mana ka na-pameti-ya.
20Jàka ningu haàtu ma-karaüngu eti anguna, hi na-pameti-ya ba nawàngu pa-ndakilu-nya jàka ndia na-patàda-nya ngga - nggàrakai, 21jàka ndia nawàngu pa-nàhaku-nya kawudu limakai, njala-mananya na tau nuna ba pameti-nanya taudu; dàngu lupangu huku pameti-maya bàdi. Peku-mana pa-pahàra-nya nu na hukungu meti paraï kalembi nditaku-na na tau pa-pameti. Jàka na-jàngapu-ya nu na tau na ma-pameti tau, peku-mana ka na pameti-ya.
22Na nyuna ngera hama tuna jàka ningu haàtu ma-pameti tau na pànda karaü-na eti dàngu nda wukuna, ka wàngu pa-ndakilu-nanya jàka ndia ka wàngu pa-patàda-nanya ngga - nggàrakai. 23Jàka ndia ngera hama tuna jàka ningu haàtu, bundu nda ita-nanya napuha hau watu hi kiri metina na haàtu na nda muhuna, dàngu nda nawuku-mbuya ka pahanggàmaruya nuna na tau. 24La palakara da matungu nu lupangu-ma datimba-nya paraï rapatu banjaru na ngerana na tau na ma-pameti tau dàngu na tau na ma-mbuhangu patungu hilu kiringu ruku metina na tau pa-pameti. 25-28Lupangu-ma na rapatu banjaru na-kahiri-ya na tau na ma-pameti tau dàngu nda wukuna welingu la pangàdungu-da da kalembi-na nuna na pa-pameti. Lupangu-ma karia belinya nu na tau la parai ngia pamara, na ngia papalai-na. Lai numaya bàdi na-ndàdiku ningu lundu nameti na tau na manjadi Ratu Bokulu la rehi nu; hina-duka la hambeli-na nu hi peku belina la kotaku wikina. Na nyuna ngera hama tuna jàka na-dunjaku-nya na parai ngia pamara na ngia papalai-na, tàka hi na-jàngapu-ya paraï kalembina na pa-pameti, nu natungu-da hilu kiringu, nda njala pameti tau-aya. 29Da kalaratu yiada pawàngu-maha ndumami nyimi dàngu nduma ana umbuku-mi, la nggini bia indàdiku ningu.
30La palakara pameti tau, na tau papabukungu njala ba mbàda pameti-na tau, hi pekuna pa-panjala-ya dàngu hi ratanya hukungu meti, mbulungu-ana jàka ningu mbuti welingu la tau madua hakahii jàka ndia marihi-kai. Haàtu hakahii nda tuda-ana la panjadi mbuti ba ma-deningu-ya na pa-pabuku-nya. 31Na haàtu tau ma-pameti tau lupangu-ma huku pameti-ya. Nda peku-ana nyuna pahilu wànya àmahu nuna na hukungu. 32Jàka ningu haàtu mapalai la hau parai ngia pamara, àmbi pamàja-dunya ka na-wuangu àmahu ka peku pahia-nya pabeli la umana ba ndedi nameti na Ratu Bokulu. 33Jàkai wundaya nuna, pa-iraku-minya napa na tana ngia pa-ngiangu-mi. Na ruku pameti tau na-pairaku-ya na tana; jia batuna, nda jia ningua ànda hau pawàngu la pa-hawari-ya na tana, hinggilu-na ba wàngu pa-pamolu-nya na tau ma-pameti tau. 34Àmbu jia pa-iraku-diminya na tana ngia pa-ngiangu-mi, nadu ba MIRI-ka Nyungga, dàngu ba ku-ngiangu la honga banjaru Ihirailu,” wàna.
Currently Selected:
DIHA 35: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)