DIHA 32
32
Da kabihu banjaru Ihirailu la pahunga loduna na Luku Yorundangu
(Bel. 3:12-22)
1Da kabihu Rumbingu dàngu Nggàtu kanjupu danguha da bandada. Ba daita-yaka ba dira hàmuya ka kabua ningu banda la tana Yaehiru dàngu la tana Nggiliatu, 2lua-danyaka la hanggana i Muha dàngu i Eliahàru dàngu da liku uru hawiangu la honga banjaru Ihirailu. Dapanii nyuda, 3-4“Na tana la paraingu Ataròtu, Ndimbungu, Yaehiru, Nimura, Hehimbungu, Eliali, Hembàmu, Nembu dàngu Mbiungu da pambàda mandapu tau Ihirailu ruku pa-ndulangu-na i MIRI, kanjupu hàmuya ka kabua ningu banda. Tàka ba dira danguha da bandama nyuma, 5ma-kamahingu ka wua-ningga-manya nyuma na tana yiana ka matuya manguma nyuma. Àmbu paràha-du-nggama pa-lelingu la hapapa Luku Yorundangu,” wàda.
6Nahema i Muha, “Nggàra wàmi? Da angu dedi da angu banjaru-mi lua-danya pa-pabera tàka nyimi ndàdiku lai yiahu wàmi? 7Ka nggikina hi pa-mangàdatu-ya na banjaru Ihirailu la papala-ya na Luku Yorundangu ka tamanya na tana na pawua-nanja i MIRI? 8Da amami mbàda wunda-mbuda-nyaka na matungu nu, ba ku-palewa-ha welingu la Kandihu-Mbarania palua panjada-nya nu na tana. 9Mbàda tàka-madaka la Lolangu Ehikòlu dàngu mbàda ita-mbuda-nyaka nuna na tana. Na nyuna ba dabeli-ka da pa-mangàdatu-ya na banjaru Ihirailu patama-nya nu na tana na pambàda wua-nanja nyuda i MIRI. 10-11Ka mbeni-madua-nanyaka la rehi nu i MIRI hi napanii, ‘Nda da-tuturu-a lai Nyungga da tau yiada. Jia ba tuna ku-harangu, da mambàda dua kambulu-na na ndaungu lurida jàka ndia na marihi-kai, nu la rehi tuu kajia-danya na Mehiru, nda ningua ma-welingu lai nyuda nu matama la tana na pambàda njanji-nggunja i Ambarahàmu, i Ihàku dàngu i Yakupu,’ wàna. 12Mbuu ndàbana na tau nanggàna-ya hukungu nuna, hinggilu na i Kalipu anana i Yapuni, na tau Kenàhu, dàngu i Yuhua anana i Nungu, nadu ba daingu tuturu-da duda nyuda pa-kadua-da lai MIRI. 13I MIRI nambeni-nya na banjaru Ihirailu hi lupa namàta-nja pa-lindingu la maràda telangu patu kambulu ndaungu mandaina hi lupa da meti mbuta nggubulu-da da ana handalaru da mambàda patula ngganggangu lai Nyuna. 14Tàka nàhu, nyimi hili mbuhangu-minyai pahama-nja da amami! Langatàka nyimi yia jiakai tau manjala ma-pawiti-nya na pa-hambumbatu wàna na mbenina i MIRI la banjaru Ihirailu! 15Jàkai tu kajia-ya nyimi i MIRI, napa i MIRI nahili màtanya nggubulu-na yiana na banjaru parihi mandai la maràda telangu tàka nyimi-duka ma-pawiti-nya na pa-tàlaru wàda nyuda!” wàna.
16Tunaka nu lua-danyaka da tau Rumbingu dàngu da tau Nggàtu palihi-nya i Muha hi dapanii, “Hàmukai duna ka ma-pahada pàkunja oka watuda da mbimbima dàngu paraingu maningu tindingu-da da ana da papaha-ma. 17Napa ma-hawaritu ka ndàharungu la pabera angunja da angu dedi angu banjaru-ma. Nyumama duma napa ma-pairu ngàndingu nu la pa-kabungu hi lupa matama ngàndiha la tana na pamangu-da napa. Tàka la manggawa-na nu peku ndàdiku-da yiahu da anama da papaha-ma la paraingu da maningu tindingu-da, ka damara welingu la hada-nanja mangu tanangu lai yiahu. 18Nda jia beli-ama duma la umama napa jàka ndedima ningu tana manguna na pa-pandumangu-ya na tau Ihirailu nggubulu-na. 19Nda jia piti-ama duma ndumama napa jiapa ka ana hakudu-a welingu la tanada nyuda la hapapa Luku Yorundangu, nadu ba mbàda ngalangu-maka duma ndumama lai yiahu, la pahunga loduna na Luku Yorundangu,” wàda.
20Nahema i Muha, “Jàka weli eti weli puhu diminya nu pahawa - waritu la pa-pahànjalungu ndumana i MIRI, 21dàngu mbuu ndàbana na tau lai nyimi na mapeku la pa-pabera, napala-ya na Luku Yorundangu, dàngu la kapipi-nanggai i MIRI bai nàhaku-ya na muhu hi lundu nawàngga-ha paraïna i MIRI, 22hi lupa nanyàku lai Nyuna nuna na tana, peku-manaka bai beli, dàngu mara-minyaka dimi welingu la wai ngerami hanggangu lai MIRI dàngu hanggangu la angu dedimi, dàngu napa i MIRI nawua-nggainya yiana na tana la pahunga lodu ka mangumi nyimiya. 23Na nyuna namuya! Jàka ndai padeni-nya na pa-njanjingu-mi, njala-minya lai MIRI dàngu hi hukunggai napa ruku njalami. 24Màla, iluaka duna pa-pahada-nja da paraingu dàngu da oka mbimbimi, dàngu àmbi marombangu pa-padeni-nya nu na pambàda njanjimi!” wànanja.
25Ka panii-danyaka da tau Nggàtu dàngu da tau Rumbingu, “Umbu, napa ma-pahàra-manya duma na papanii-munggama la hupu liimu. 26Da ana da papaha-ma da hapi dàngu da mbimbima napa da-ndàdiku yiahu, la parai - paraingu Nggiliatu. 27Tàka nyuma duma hawaritu-mamanya palua pa-pakabungu la kapipi-nanggama i MIRI. Napa mapala-ya na Luku Yorundangu hi ma-pabera hama tuna na pambàda paniimu, umbu,” wàda.
28Ka wua-nanyaka yiana na pareta i Muha lai Eliahàru, i Yuhua dàngu da liku uru Ihirailu, 29“Jàka da kikunya na hupu liina i MIRI nyuda da tau Nggàtu dàngu da tau Rumbingu hi dapala-ya na Luku Yorundangu ka pabera, dàngu jàkai ngalangu pawàhi-ya nuna na tana ba da-pandulangu nyuda, iwua bia-njawa nyuda na tana Nggiliatu ka damangu-nya. 30Na nyuna jàka nda dapala-ya na Luku Yorundangu la pa-pabera angunggai nyimi, lupangu la tana Kanaàngu-ka bàdi da ngalangu ningu tana kangeha-da hama tuna nyimi,” wànanja.
31Dahema da tau Nggàtu dàngu da tau Rumbingu, “Umbu, napa ma-pahàra-manya duma jàka nggàraya na papanii-na i MIRI la hupu liina. 32La kapipi-nanggama i MIRI napa mapala la tana Kanaàngu ka ma-ndàharungu pa-pabera, tàka na nyuna màta ka pa-daingu manguma nyumaya yiana na tana la pahunga loduna na Luku Yorundangu,” wàda.
33Ka wua-nanjaka nyuda paraïna i Muha la kabihu Nggàtu dàngu Rumbingu dàngu la beri mandua-na na kabihu Manahi, na nggubulu tana ngabana i Hihungu, na hanganji tau Amori, dàngu na tana ngabana i Onggu, na hanganji Mbahàngu, papohu-nja da paraingu dàngu da tana la winggiru-da. 34Na kabihu Nggàtu da tura beliha da paraingu Ndimbungu, Ataròtu, Arowiru, 35Ataròtu-Hopàngu, Yaehiru, Yòkumbeha, 36Mbetu-Nimura dàngu Mbetu-Haràngu ka paraingu maningu tindingu-ha dàngu ka pangia-da da oka mbimbiha. 37Na kabihu Rumbingu datura beliha da paraingu Hehimbungu, Eliali, Kiriyataïmu, 38Nembu, Mbaàlu-Miungu dàngu Hembàmu. Da paraingu da patura belida da-pahilu-nja da tamuda.
39Na kalibaru Makiru, anana i Manahi danjungu-nya na tana Nggiliatu, hi dawàhi-ya dàngu dawàngga-ha da tau Amori da maninja lai nu. 40Tuna nuduka hi nawua-ya i Muha na tana Nggiliatu la kalibaru Makiru, tàka hi da-padaingu ningu nyuda lai nu. 41I Yairu welingu la kabihu Manahi, nanjungu-nja hi na wàhiha da ndeha ba nda pirada, hi na patamu-nja “Da Ndeha Yairu.” 42I Nomba nahada-nya hi nawàhi-ya na Kenàtu dàngu da kotaku la winggiru-na hi na-patamu-nya Nomba pa-namatu-nya na tamu wikina nyuna.
Currently Selected:
DIHA 32: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)