PARATU 7
7
Na kameti maraku himbalu-na na pa-marombangu
1Yiada-ha da kalaratu rukuna na kameti maraku himbalu runggi. Na kameti maraku nuna kanjupu matua-ya. 2Na banda nduma kameti maraku lupangu rupuya la ngia parupu banda nduma kameti maraku patunu, tàka hi buriya na riana la patu karaha-na na ngia pawotu maraku. 3-4Na ratu lupangu nawotu hàla-maha bàdi la pinu ngia pawotu maraku da mbokana nuna na banda nu: Na kikuna na maningu mbokana, na aparu-na na ma-kamburu-nya na ihi kambuna, da wua kadalu-na mangu mbokangu-da dàngu na hangia na marihi hàmu halawàla welingu la etina. 5Mbuu ndàbada nuda lupangu natunu-maha bàdi la pinu ngia pawotu maraku ka hunggu maraku patunu-ha ndumana i MIRI. Nuna na kameti maraku, kameti maraku himbalu runggiya. 6Nimbihu-da da mini la kuru umada da ratu pekuda panganya na tolu kameti maraku nuna, na nyuna lupangu-ma bàdi danganya la hau pangia pa-panudangu la matungu nu, nadu ba kanjupu matua-ya nuna na kameti maraku.
7Na kameti maraku jàmangu njala dàngu na kameti maraku himbalu runggi nanggàna-ha kalaratu ma-pahama, nu: Na toluna na banda kameti maraku nanduma-nya ratu na mawotu-ya. 8Na manula-na nuna na banda ndumana na ratu-mbuya. 9Nimbihu-da da hunggu maraku mangejingu da patunu la ngia patunu, da pa-manahu la kawalu jàka ndia da pa-handarangu-kai, ndumana na ratu na mawotu-ya. 10Tàka nggubulu-da da hunggu maraku mangejingu da panda manahu, ka pa-pakorungu minaha hamanai da mamàdu, ndumada mbuu ndàbada da ratu wàlana i Harungu-ha, dàngu màta ka da-paberi hamanya hapaangu-da.
Na kameti maraku papeku
11Yiada-haka da kalaratu rukuna na kameti maraku papeku na pawotu lai MIRI. 12Jàka nduma pamalangungu wànguya ba wotuya nuna na kameti maraku, lupangu wotu pa-karia-manya bàdi roti nda patai wolungu nuna na banda. Nuna na roti peku-mana ka natimbi welingu la kanguta pa-uraku patungu mina haitungu, peku-mbuna roti màdu ma-manipa pa-dohangu mina jàka ndia kanguta-kai na parànda wàngu mina haitungu. 13Hinggilu-da nuda lupangu wotumbu bàdi roti patungu tai wolu. 14Welingu nudaka ba pira matangu-da da roti, lupangu-ma wotu hawiangu lai MIRI, dàngu nuda nu nduma na ratuya na mapiti-ya na riana nuna na banda dàngu na maburi-ya la ngia pawotu maraku nduma kameti maraku papeku. 15Na toluna lupangu ngaa-manya bàdi la lodu wotuya nuna na banda, àmbu bilidu hawutu lundu haromu la mbaru.
16Jàka era ningu haàtu mangàndi kameti maraku papeku ka patutu wànya na njanjina, jàka ndiakai ka kameti maraku wàngu eti-nanya, nda nggàra ehia jàka nda pa-pambuta-ya ba nganya la lodu nuna. Nggàraya na marihi, pekuna ka nganya hadangu harii. 17La lodu pa-tailu wàna jàka ninyapa na marihi, na toluna nuna lupangu-ma ka tunu pambuta-ya. 18Tàka jàka ngaa-manyaipa la lodu pa-tailu wàna nuna na tolungu, nda pa-kataku-aya nuna na kameti maraku dàngu nda na-ngalangu wa-anya kanyuru na tau nuna, tàka manda hida biaya. Na tau na manganya, nanjala dàngu lupangu-ma na-handepa-ya na rukuna.
19Na tolungu na panggàna jàka nggàraya na ma-iraku lupangu tunu pambuta-maya bàdi dàngu nda ukua panganya.
Na tolu kameti maraku papeku mbulungu tau manda iraku-a na mapeku la panganya. 20Jàka ningu tau manganya nuna na tolungu ba talànga iraku-na, na tau nuna nda pareki-ayapa ba anggota banjaru-na i MIRI-ya. 21Jàka ningu haàtu manganya nuna na tolu kameti maraku, tàka hi mbàda jonggaru-nai jàka nggàraya na ma-iraku, ka ma-pawelingu la tauya hamanai ka ma-pawelingu la bandaya-kai, nyunambu nda pareki-ayapa ba anggota banjaru-na i MIRI-ya.
22I MIRI nawua-nyaha i Muha da kalaratu yiada 23nduma banjaru Ihirailu. Da mboka hapi, mbimbi jàka ndia kamàmbi-kai nda ukua panganja. 24Da mboka banda mameti wikida jàka ndia pakaü banda bohu-yakai, nda ukua panganja tàka na nyuna peku-mana jàka nggàra ila wàngu la hangia. 25Na tau na mangangu mboka banda paràka pawotu nduma hunggu maraku pangangu lai Ala, nda pahilu reki-ayapa ba anggota banjaru-na i MIRI-ya. 26Jiapa nda la nggiya na tau Ihirailu na-ngiangu ningu, nda hidama la pangangu ria ma-hawurungu jàka ndia ria banda hawiangu-kai. 27Jàka nggamuya na mapangga-ya na kalaratu yiana, nda pahili reki-ayapa ba anggota banjaru-na i MIRI-ya.
28I MIRI nawua-nyaha i Muha da kalaratu yiada 29nduma banjaru Ihirailu. Nggamu mangàndi kameti maraku papeku, lupangu na-pahinggilu bàdi hawiangu nduma kameti maraku pa-panuda-nya i MIRI. 30Nyuna wikima bàdi na mangàndi-ya nuna na kameti maraku pangangu. Na mbokana dàngu na kakauna nuna na banda lupangu wotu-maya bàdi ka hunggu maraku pa-pajolangu-ya ndumana i MIRI. 31Na ratu lupangu natunu-maya bàdi na mbokana la pinu ngia pawotu maraku, tàka na nyuna na kakauna ndumana da ratuya ba hapajia-ha. 32Na winju kawana-na lupangu wua panuda-nya 33na ratu na mahunggu maraku wànya na riana dàngu na mbokana nuna na kameti maraku papeku. 34Da kakauda dàngu da winju kawana-da napiti-ha i MIRI welingu la hunggu maraku pajolangu-na na banjaru Ihirailu hi nawua panuda-nja da ratu. Nuda-haka da pa-ndulangu-na na banjaru Ihirailu la ratu ba hapajia-ha lundu nu - nu. 35Welingu la pangangu da pahunggu maraku-nya i MIRI, jiaha nuda-maka da pawua-na i MIRI lai Harungu dàngu da anana la lodu katua-ha la paratu. 36La lodu nuna i MIRI nawua-nya pareta na banjaru Ihirailu ka màta welingu la hunggu maraku-da jiaha nuda-maka da nduma ratu. Na kalaratu yiana lupangu nanunju-maya bàdi banjaru Ihirailu lundu nu - nu.
37Tuda nuduka da kalaratu rukuda da hunggu maraku patunu, hunggu maraku mangejingu, hunggu maraku jàmangu njala, hunggu maraku himbalu runggi, hunggu maraku la lii katua dàngu hunggu maraku papeku. 38I MIRI nawua-nyaha i Muha la Palindi Hinai nuda da pareta ba jiaya na paràha-nanya na banjaru Ihirailu pawotu hunggu maraku la maràda telangu Hinai.
Currently Selected:
PARATU 7: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
