PARATU 5
5
Nggàra ehingu-ya na pawotu wàngu kameti maraku jàmangu njala?
1Na kameti maraku jàmangu njala jiangu-ma ba wotuya: Jàka ningu haàtu na pakarai pa-ihikungu ka na-hakahii la hangga pangandilangu, tàka hi nda na-wuangui taranga rukuna na pambàda itana jàka ndia na pambàda rongu-nakai hi lupa natanggu-nya la paita-ya na injana.
2Jàka ningu haàtu manjala ba dàngu nda harawuku-na hi kiri iraku-na paraï pa-jonggaru-ya jàka nggàraya na ma-iraku, ngera hama tuna meti banda, tàka hi napàda pa-malamiri-nya nu na pawunda-na.
3Jàka ningu haàtu manjala ba dàngu nda harawuku-na pa-jonggaru jàka nggàraya na ma-iraku welingu la tau, tàka hi napàda pa-malamiri-nya nu na pawunda-na.
4Jàka ningu haàtu manjala ba dàngu nda harawuku-na ba àtalu harangu biana la pawunda-ya jàka nggàra biaya, tàka hi napàda pa-malamiri-nya nu na pawunda-na.
5La ngerada nuda mbuu ndàbada, na tau na manjala lupangu napeka-ma njalana bàdi. 6Tàka nduma palohu-na ruku njalana, lupangu nangàndi-ma bàdi heu bai mbimbi jàka ndia heu bai kamàmbi-kai ndumana i MIRI. Na ratu lupangu-ma nahunggu maraku wànya nuna na kameti maraku ka jàmanya njalana na tau nuna.
7Tàka jàka ningu haàtu na manjala manda màka pa-payemangu mbimbi jàka ndia kamàmbi-kai nduma pa-palohu wàna ruku njalana, lupangu nangàndi dua ngiu mbarama bàdi jàka ndiakai dua ngiu kulundiha kanguraku, na heu nduma kameti maraku jàmangu njala, tàka na heui nduma kameti maraku patunu. 8Lupangu-ma nalua ngàndiha la ratu nuda da ma-hawurungu. Na ratu lupangu-ma na-mangilu pàku bàdi pahunggu maraku wànya na ma-hawurungu pa-pandumangu kameti maraku jàmangu njala. Lupangu-ma na-wiliku-nya na katiku-na nuna na ma-hawurungu, tàka na nyuna àmbu lundu na-tambukalu-du na katiku-na. 9Na riana nuna na ma-hawurungu lupangu na-paiharu-nya la karaha ngia pawotu maraku, tàka na rihina na-pijaru paluhu-ya la lata ngia pawotu maraku nduma kameti maraku jàmangu njala. 10Tunaka nu hinaka na ratu hi nahunggu maraku wànya na ma-hawurungu padua ngiu wàda nduma ka meti maraku patunu nunjuya na kalaratu. Tuna nu na pawàna na ratu ba nahunggu maraku wànya na kameti maraku ndumana na njalana nuna na tau, i MIRI napa najàma-nya na njalana.
11Tàka jàka nda na-duluku na tau njala pa-payemangu dua ngiu mbàra jàka ndiakai kulundiha nduma kameti maraku jàmangu njala, lupangu nangàndi-ma bàdi hau kilu kanguta. Nuna na kanguta àmbu pakoru-dunya mina haitungu jàka ndia kaminyangu, nadu nuna nahunggu maraku ba hunggu maraku jàmangu njalaya, nda hunggu maraku mangejingu-aya. 12Nuna na kanguta lupangu nangàndi-maya bàdi la ratu. Lupangu-ma na ratu napiti haupu welingu la kanguta nuna, tandana ba pawotu ndàba-yaka nggubulu-na lai MIRI. Nuna na kanguta haupu lupangu natunu-maya bàdi la pinu ngia pawotu maraku ba hunggu maraku pangangu-ya. Nunaya na hunggu maraku-na nduma jàmangu njala. 13Tuna nu na pawàna na ratu ba nawotu hunggu maraku nduma njalana nuna na tau, napa i MIRI duna hi najàma-nya na njalana na tau nuna. Na kanguta na marihi, nduma ratuya hama tuna na hunggu maraku uhu nggàndumu.
Na hunggu maraku himbalu runggi
14I MIRI nawua-nya i Muha yiada da kalaratu. 15Jàka era ningu haàtu ba dàngu nda harawuku-na panjala, nu ba nda naeti wànja pa-wuangu-ha da hunggu maraku na papawai ngerangu-ya ndumana i MIRI, lupangu-ma na tau nuna nawotu hunggu maraku himbalu runggi. Nuna na hunggu maraku lupangu mbimbi jàka ndiakai kamàmbi bumbuya na manda ningu nyurangu. Na wilina màta ka padainya hama tuna na wili na pakàli wàngu la Maüna i MIRI. 16Na tau nuna màta ka na-wuangu jàka nggàraya na panda eti wàna, hi tunya bonjana dua kambulu welingu la hangahu. Hàla ka nawua-ya la ratu nuna na banda, tàka na ratu ka nahunggu maraku wànya nduma njalana na tau nuna, i MIRI napa najàma-nya na njalana na tau nuna.
17Jàka era ningu haàtu ba dàngu nda harawuku-na pawunda manjala, nadu ba napangga hangia welingu la pareta-na i MIRI, na tau nuna nanjala, dàngu lupangu-ma na-hambeta-ya na rukuna. 18Nduma hunggu maruku himbalu runggi lupangu nangàndi heu mbimbi jàka ndia kamàmbi bumbukai manda ningu nyurangu. Na wilina màta ka padainya tundunya na wili pakàli wàngu la Maüna i MIRI. Na ratu ka nahunggu maraku wànya nduma njalana na tau nuna, i MIRI duna napa najàma-nya na njalana nyuna. 19Nunaya na kameti maraku himbalu runggi nduma njala na pawunda-na la hanggana i MIRI.
Currently Selected:
PARATU 5: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
