PARATU 24
24
Na huri paloku palita
(Lu. 27:20-21)
1I MIRI na-paràha-nya i Muha 2pawua-njaha da pareta yiada la banjaru Ihirailu: Ngàndiwa mina haitungu manda ningu koruna dàngu marihi hàmu halawàla ndumada da palita daa la Maüna i MIRI, ka peku paketi-nja ka daroka pa-daingu. 3Piti welingu la malingu lundu mbaru lupangu-ma i Harungu na-paloku-ha da palita la ngia paninya i MIRI la hambeli tera dimbaku na ma-pahangindi-nya na Pàti Pa-ràndingu la Rowa Mahupu Matua. Nuna na pareta lupangu-ma ka nunjuya lundu nu - nu. 4Lupangu-ma i Harungu na-paloku-ha da palita la tandai palita àmahu rara ihi mbàngina ka pa-daingu rokada la Maüna i MIRI.
Roti mangejingu
5Piti hakambulu dàmbu kilu kanguta mahàmu halawàla, hàla pandoi hakambulu dàmbu roti kabunggulu, nimbihu-da hau kilu kanguta. 6Bànjalu panunggulu kadua nunggulu-nja, nomu mbua roti la nimbihu nunggulu, la pinu menja na patapu wàngu àmahu rara ihi mbàngina na maninya daa la Maüna i MIRI. 7Tunja kaminyangu manda ningu koruna la nimbihu nunggulu roti ka jia na tanda ba hunggu maraku pangangu ndumana i MIRI-ha nuda da roti. 8La nimbihu lodu Hangahu lupangu-ma ningu roti pa-mangejingu la Maüna i MIRI. Nuna wai ngera-nanya na banjaru Ihirailu lundu nu - nu. 9Da roti nuda ndumana i Harungu-ha dàngu da wàla wuana. Lupangu-ma ka danganja la pangia matua, nadu da roti nuda ba jiaha da ma-kanjupu matua welingu la hunggu maraku pangangu da pawotu lai MIRI da nduma ratu.
Na hukungu-na na maràtu-nya i MIRI dàngu na hukungu pa-himbalungu
10-11La ngia pa-pamaüngu-na na tau Ihirailu ninya na haàtu na tau mini. Na amana tau Mehiru-ya tàka na inana kawini Ihirailu-ya na ma-tamungu Halomitu, anana i Ndibiri kabihu Ndàngu. La hau lodu na tau nuna na-pahàngga dànya na haàtu na tau Ihirailu la ngia pa-pamaüngu. Ba talànga pahànggangu-daka nu, nyuna naràtu-nya i Ala. Jia-duyaka da tau Ihirailu hi dangàndi-ya la hanggana i Muha, 12dàngu hi dapàtu-ya ba da-patia-nya na botangu-na i MIRI jàka nggiki-danya bàdi na tau nuna.
13I MIRI napanii-nya i Muha, 14“Ngàndiya na tau nuna la hambeli ngia pa-pamaüngu. Nimbihu-na na tau na marongu-ya na tau nuna ba na-ràtungu, lupangu-ma na-bànjalu-nya lima na katiku-na na tau nuna la papeka-ya na pa-hakahii-da ba tuba njala-mana nyuna. Hàla nggubulu-na na banjaru lupangu-ma ka da-nàhaku-nya watu lundu nameti. 15Hàlaka nu pakada-nyawa la banjaru Ihirailu: jàka nggamuya na maràtu-nya i MIRI lupangu-ma patanggu-nanya na rukuna 16dàngu pa-hukungu metiya. Nggamu biaya na maràtu-nya i MIRI lupangu-ma nàhaku-nya watu lundu nameti paraïna kabungguru nggubulu-na. Na hukungu yiana nanggàna-ya na tau Ihirailu hamanai na tau nàmu na mambàda engangu la Ihirailu.
17Nggamu biaya na ma-pameti tau hawiangu lupangu-ma pa-hukungu metiya. 18Nggamu biaya na ma-pameti banda haàtu lupangu-ma ka nahilu-ya. Na latana jiaya, ‘na luri pa-himbalu wànya lurimbu.’
19Jàka ningu haàtu ma-pajàra tau hawiangu, jàka wàngu panggiki-nanya hi tuna nu, màta ka tuna numai duna hanggangu lai nyuna. 20Jàka napata rina, pata-mayai duna na rina nyuna. Jàka natuya na anguna hi lupa napoki hapapa na matana, nyunai duna lupanguma ka papoki-ya na hapapa na matana. Jàka na-tàkilu tau hawiangu hi lupa nambàpu na ngànduna, nyunai duna pata-maya na ngànduna. Jiapa nda nggàraya na mamanjurangu na pa-patàka-nanya na anguna, lupanguma ka hama tumanai duna nyuna ba tunya himbalu-na. 21Nggamu na ma-pameti banda, lupangu-ma ka nahilu-ya, tàka jàka nggamu na ma-pameti tau lupangu-ma ka pa-hukungu metiya. 22Na hukungu yiana handauni hàla-mananggai mbuu ndàbami, ka tau Ihirailu-ya dàngu ka tau hangàdangu-ya kai na ma-engangu la hongami nyimi, nadu ba Nyungga MIRI, Alami,” wàna.
23Ba nahàla-ka i Muha papanii tunanya nu na banjaru Ihirailu, ngàndi-danyaka na mambàda ràtunya i Ala la hambeli ngia pa-pamaüngu, hàla hi da-nàhaku-nya watu lundu nameti. Tuna nu na banjaru Ihirailu ba dawànya na pareta pambàda wuana i MIRI lai Muha.
Currently Selected:
PARATU 24: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
