PARATU 2
2
Hunggu maraku mangejingu
1Jàka ningu haàtu mahunggu maraku wàngu mangejingu lai MIRI, nuna na hunggu maraku lupangu kanguta mahàmu halawàla-maya bàdi pa-buringu mina haitungu dàngu patungu kaminyangu la pinuna. 2Lupangu-ma nyuna ka nangàndi-nja da ratu wàlana i Harungu. Na ratu na ma-paloku ka napiti haupu welingu la kanguta nuna maningu mina haitungu hamanai mbuu ndàbada da kaminyangu-na, tunuha la pinu ngia pawotu maraku ka jiaya na tanda ba mbàda hunggu maraku wànjaka mbuu ndàbada lai MIRI. Na wau hiritu-na nuna na hunggu maraku pangangu nahàmu wànya na etina i MIRI. 3Na hunggu maraku mangejingu na marihi, nuda ndumada da ratuya ba hapajia-ha. Nuna na hunggu maraku kanjupu haali-ya ba papiti welingu la pangangu pambàda hunggu marakungu lai MIRI-ya.
4Jàka roti patunu la ngia patunu rotiya na pahunggu maraku wàngu, ba pandoi-ya nuna na roti àmbu ningudu bàdi tai woluna. Nuna na roti pekuna ka natimbi, pandoi wànya kanguta pa-uraku pa-pakorungu mina haitungu, peku-mbuna ka kanguta pa-dohangu mina haitungu-aya.
5Jàka roti pa-handarangu la ngia pa-handarangu-ya na pahunggu maraku wàngu, ba pandoi-ya nuna na roti ka kanguta kangudahu patungu mina haitungu-maya bàdi, tàka na nyuna àmbu wàngudu tai wolu. 6Nuna na roti pahunggu maraku wàngu lupangu bi - bika-maya bàdi, hàla, ka burinya mina haitungu.
7Jàka roti pa-manahu la kawalu-ya na pahunggu maraku wàngu, ba pandoi-ya nuna na roti ka kanguta kangudahu patungu mina haitungu-maya bàdi. 8Na roti pa-pandoi tungu nu lupangu hunggu maraku-manya bàdi lai MIRI, dàngu ka wuanya na ratu hi nangàndi-ya la ngia pawotu maraku. 9Na ratu napiti hawiangu welingu la roti nuna hi natunu-ya la pinu ngia pawotu maraku ka jiaya na tanda ba mbàda hunggu maraku wànyaka mbuu ndàbana lai MIRI. Na wau hiritu-na nahàmu wànya na etina i MIRI. 10Na rihina, nuna ndumada daratu-ya ba hapajia-ha. Nuna na roti kanjupu haali-ya ba papiti welingu la pangangu pambàda hunggu marakungu lai MIRI-ya.
11Na hunggu maraku mangejingu ndumana i MIRI nda ukua ka pakoru-nya manggaluangu jàka ndia tai wolu, nadu da manggaluangu dàngu da tai wolu nda ukua patunu-ha ka maraku wànja lai MIRI. 12Hawiangu welingu la ihi tana pa-kawunga ngalangu la nimbihu ndaungu lupangu-ma ka hunggu maraku-nja lai MIRI, na nyuna nda ukua patunu-ha nuda la pinu ngia pawotu maraku. 13Nimbihu-da da hunggu maraku mangejingu lupangu tunja mehima bàdi. Nadu na mehi ba jiaya na tanda pa-ràndingu-na i Ala dàngu nyimi. Jia ba tuna mbuu ndàbada da hunggu maraku lupangu tunja mehima bàdi. 14Jàka era ngàndimi hunggu maraku uhu nggàndumu pa-kawunga mutimi lai MIRI, ngàndima uhu nggàndumu mabidi pambàda bai pa-kangudahungu jàka ndia pa-handarangu-kai. 15Nuda da uhu nggàndumu lupangu burinja mina haitungu-ma bàdi dàngu ka tunya kaminyangu la pinuda. 16Na ratu lupangu-ma natunu hawiangu welingu la uhu nggàndumu nuda dàngu na mina pa-kariangu mbuu ndàbana na kaminyangu-na, ka jiaya na tanda ba mbàda hunggu maraku wànjaka mbuu ndàbada lai MIRI.
Currently Selected:
PARATU 2: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
