PARATU 18

Na katuda pa-angungu na pa-hiringu

1I MIRI na-paràha-nya i Muha 2pa-patàka-nya la banjaru Ihirailu na pareta yiana, “Nyungga MIRI Alamu. 3Àmbu kiku-dunya na pakàli wàna na tau la Mehiru, na ngia pa-ngiangu-mi àmangu, jàka ndiakai na tau la Kanaàngu, na ngia pangàndi-nggunggai nàhu. 4Nunju-maha da ukunggu dàngu wàmanya jàka nggàra pareta-ya na pawua-nggunggai. Nyungga MIRI Alamu. 5Nunju-maha da kalaratu dàngu da uku da pawua-nggunggai. Jàkai wànya na matuna nu, na-malundungu na lurimi. Nyungga MIRI,” wàna.

6I MIRI na-wuangu-ha da kalaratu yiada, àmbu katuda angunya na haàtu welingu la nua nditaku-mu. 7Àmbu katuda angunya na inamu, na papaha amamu, ba hàkuna na ama-munya. 8Àmbu pawawa-ya na amamu bau katuda angunya na haàtu na papaha-na hawiangu. 9Àmbu katuda angunya na anawini-mu jàka ndiakai na anawini hau ina hau amamu, na angu matua-mu la umamu hamanai na ma-matua la hau pangia. 10Àmbu katuda angunya na umbuku-mu; na matuna nu pa-makia-munya wikimu. 11Àmbu katuda angunya na anawini angu amamu na hau ina jàka ndiakai na angu inamu na hau ama, nadu ba anawini-mbumunya. 12-13Àmbu katuda angunya na mamumu na anawini-na na amamu, dàngu na pa-inangu na anguna kawini na inamu. 14Àmbu katuda angunya na papaha-na na pa-amangu na angu paluhu-na na amamu, nadu ba mandapu ina-munya. 15Àmbu katuda angunya na rii anamu 16jàka ndiakai dàngu na papaha-na na ayamu. 17Àmbu katuda angunya na anana jàka ndiakai na umbuku-na na kawini na pambàda katuda angumu. Talànga wanguna ningu-maka duna panua riangu-mi nyuda dàngu nyumu, na matuya na matuna nu tau ahuya. 18Àmbu kanoma-duya na anguna kawini na papaha-mu, ba dàngu lurina-padua na papaha-mu.

19Àmbu katuda angunya na haàtu kawini na ma-talànga tàka-nanya ariyaa-na, nadu ba ninyapa la rehi iraku-na. 20Àmbu katuda angunya na papaha tau haàtu; na matuna nu jiaya na pa-iraku wàmu. 21Àmbu puli-dunya na haàtu na anamu la patuya hunggu maraku ba lumunya na ndewa Moluku, nadu na matuna nu pawawa-nanya na tamuna i Ala, i MIRI-mu. 22Na tau mini nda uku pa-paangu dàngu anguna pamini; i Ala huda eti-mananya na matuna nu. 23Na mini hamanai na kawini hupu manda hida hàriya la pa-paangungu dàngu banda; na pawunda akatu nuna jiaya na pa-iraku wàmi.

24Àmbu pa-iraku wikimu la pawunda-ya na ma-hamangu, nadu ba tuna nudu na hurida da banjaru da ma-ngiangu la Kanaàngu ba ndedipa nyimi ba da-pairaku wikida. Tuna nuduka hi nawàngga-ha paraïna i MIRI ka peku mandapu-minya na tana nuna. 25-27Nyuda nu mbàda wunda ndàba-dahaka nuda da pa-mayitangu, hi na-iraku wànya na tanada. Jia-duyaka i MIRI hi nahuku-nja hi nda na-pahia-nja nyuda pa-ngiangu lai nu. Tàka nyimi dimi jàmangu ailulu pawunda-ha nuda mbuu ndàbada. Nyimi mbuu ndàbami tau Ihirailu dàngu tau hangàdangu na mangia dànggai nyimi, lupangu-ma kai tundunja da uku dàngu da pareta-na i MIRI, 28ka àmbu nahuku-nggai paraïna Nyuna tàka hi wànggakai welingu la tana nuna hama tuna ba tunanja nu da tau da manda tandaya i MIRI, da ma-ngiangu lai nu ba ndedipa nyimi. 29Mipi-manya jàka nggamu mawunda-ya nuna na pawunda pa-mayitangu nda pareki-ayapa ba anggota banjaru-na i Alaya.

30Hi napanii i MIRI, “Nunjuha da kalaratu da pawua-nggunggai dàngu àmbu kikunya na pawàna na tau na mangia-nya na tana Kanaàngu ba ndedipa nyimi. Àmbu pa-iraku wikimu bai wundaha nuda da matungu nu. Nyungga MIRI Alamu,” wàna.

Currently Selected:

PARATU 18: KAM

Highlight

Copy

Compare