YUHUA 2
2
Ba na-palewa tau malua pa-kapilitu la Yeriku i Yuhua
1Tunaka nu palewa-nanyaka la Kanaàngu tau madua malua pa-kapilitu i Yuhua welingu la kalibaru uma tera la Hitimu. Pa-wuangu pareta-ha nuda da tau madua malua pa-kapilitu, ka da-kanuturu kangunduhu-nya na tana Kanaàngu, wàngu pa-ihikungu-na na paraingu Yeriku. Lua-danyaka nu da tau madua la paraingu nuna, hi datodu lai nu la uma haàtu kawini pahunda, na ma-tamungu Rahàpu. 2Narongu na hanganji paraingu Yeriku ba ningu tau Ihirailu, da mamai la rudungu nu pa-kapilitu-ya na ngabana la Yeriku. 3Ka paràhangu-nanyaka tau na hanganji palua lai Rahàpu hi dapanii-nya, “Da tau da matodu la umamu maidanya pa-kanuturu-ya nggubulu-na na ngabana la Yeriku. Màla, paluha nàmu!” wàdanya.
4-6“Deningu-mana ba ningu tau mamai la umanggu,” wàna ba nahema i Rahàpu, “na nyuna nda kupi-anya jàka nggi welida. Ba ndedi pabita-nya na pindu bokulu paraingu kawai la tama lodu, mbàda laku-daka duda. Tàka nda ku-paàra-anja jàka nggi laku ningu-danya, na nyuna jàkai lu manyamalu payaulu-ha napa itoma-manja duna,” wàna. (Tàka mbàda kawini-nanjaka paraïna i Rahàpu nu da tau madua ma-kapilitu la hindi umana la pitaku rami lai nu.)
7Ka laku-danyaka nu da papalewa hanganji, hi ailulu bitanya na pindu bokulu paraingu ba daluhu-ka nyuda. Da-namatu-ha lundu la papala la Luku Yorundangu nu da tau ma-kapilitu.
8La rudungu nu ba ndedi da katuda nu da tau madua ma-kapilitu welingu la Ihirailu, hei-nanyaka la hindi i Rahàpu, 9hi napanii-nja nyuda, “Kupii-manya ba mbàda wua-nanggai-nyaka nyimi i MIRI na tana yiana. Mbuu ndàbada da tau lai yiahu da-mangàdatu-nggai nyimi. 10Mbàda rongu-mamaka langu lii nggiki hamana ba na-pamàdu-ya na Tehiku Tibuhala i MIRI la hanggami nyimi bai tuu kajia-yaka na Mehiru. Mbàda rongu-mbumaka nggiki hamana bai pameti-ha i Hihungu dàngu i Onggu, da tau madua hanganji Amori la pahunga loduna na Luku Yorundangu. 11Ba marongu-kiyaka na ngerana nuna, kanjupu mangàdatu-kama. Mbuu ndàbada da tau lai nyuma mbàda malaru-naka na kaborangu-da rukumi nyimi. Na MIRI Alami nyimi langatàka Ala Mahupu Mbihaya la awangu tana. 12-13Kumonu-nggai kai mbuhangu pa-harangu wànya na tamuna Nyuna, ba hama hàmu-mana na pawunda-nggu nyungga hanggangu lai nyimi, na pawunda-mi nyimi napa hanggangu la kalembi-nggu nyungga. Pa-njanjingu-wa ba ndai pameti-aha napa da amanggu da inanggu, da ana mininggu, da angunggu kawini dàngu mbutada da ihi umada, tàka na nyuna bai opanja napa. Ba tuna wuangu-wa hau kawuku pakita-nggu nyungga ba pa-monungu-kai!” wànanja.
14Ka panii-danyaka nyuna nu da mini tau madua, “Nàhu ma-panjanjingu, jàka nawua-nggamanya i MIRI na tana yiana, mahàmu maya duma napa na pawunda-ma lai nyimi, mili àru nyuna àmbu ningudu haàtu ngia papanii-mu rukuma nyuma. Màta ka naràtu-nggama i MIRI jàka nda ma-padeni-nya nu na panjanji-ma,” wàda.
15Na umana i Rahàpu pawulu-ya daama la kangeli paraingu, tuna nuduka hi napalii ninja la katonga ba na-duluru wànja liku nu da mini tau madua. 16“Ilakuwa la ngabana la ma-palindingu,” wànanja nyuda i Rahàpu, “ka àmbu dayàpa-kai paraï da tau papalewa-na na hanganji. Kawiningu-wa lai nu tailu mbua lodu mandaina lundu dabeli-ha nyuda, hàlaka nu kai laku pangalangu,” wànanja.
17Nu da tau madua ma-kapilitu dapanii-nya i Rahàpu, “Tu biana duna, ma-padeni-manya duma napa na pa-njanjingu pakarai-mu-nggama. 18Tuna yiaka bàdi na-pawunda-mu. Jàka mahada-nya napa na tanamu, uhondu-yaka bàdi yiana na liku rara la katonga yiana na ngia pa-duluru-mu-nggama. Màtawa kau pauhi-nja la umamu yiana da ama da inamu, da ana minimu, da angumu kawini dàngu mbutada da nua nituna na amamu. 19Jàka naluhu-ya welingu la uma yiana na haàtu la hongada nyuda hi nameti ba pameti-ya, nu ba nameti panjala wiki-mananya duna; nda matanggu-anya nuna duma nyuma. Na nyuna jàka ningu haàtu majàra la uma yiana, nyumaka duma matanggunya. 20Na nyuna jàka jia ningu bia haàtu ngia papanii-munya na rukuma nyuma, nda napaka-angga-mapa duma pa-njanjingu pakarai-mu-nggama,” wàdanya. 21Na-patunju-ya nuna i Rahàpu hi napuli-nja palaku. Tunaka nu hondu-nanyaka na liku rara la katonga-na.
22Ka laku-danyaka la ma-palindingu da mini tau madua da ma-kapilitu hi da-kawiningu lai nu. Dahimbu-ha la nggi - nggini la nggubulu ngabana lai nu paraï da papalewa hanganji tailu mbua lodu mandaina, tàka nda da-jàngapu-aha nyuda. Ba dira-daka beli-danyaka nuda da papalewa la Yeriku. 23Hàla puru-danyaka welingu la ma-palindingu nu da tau madua ma-kapilitu welingu la Ihirailu hi dapala-ya na luku, tunaka nu beli-danyaka lai Yuhua. Dapeka ndàbaha lai nyuna da paera-da. 24Tunaka nu panii-danyaka, “Langatàka-ma ba nawua-ndanya nggubulu-na nuna na tana i MIRI; mbuu ndàbana na tau la nu da-mangàdatu-nda nyuta,” wàda.
Currently Selected:
YUHUA 2: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)