YERIMIA 51
51
Na hukungu hauna na Mbambilu
1Napanii i MIRI, “Nyungga napa ku-paràhangu ngilu paruha#ngilu paruha; jàka ndia: na patikingu la pa-pamànji. na matungu hanggangu la Mbambilu dàngu la mamandapunya. 2Napa ku-palewa tau hangàdangu ma-palàjaru-ya la Mbambilu hama tuna ngilu na majiliru kalàmba uhu. Nu la lodu ura pàda nuna nyuda da-làndahu-nya nuna na tana welingu la nggi - nggini dàngu hi da-kanjeku pabulu-ya. 3Àmbi pahia-nja da tanatara-na la pa-katutu-nja da ana panana jàka ndia la pa-bakulu eti wànja da paki pabera-da. Da ana bidi minida àmbi pulidu-nja paluri. Pa-làjaru-ya nggubulu-na na tanatara-na! 4Napa da-manua mandàkangu dàngu hi dayàmihu nàhu la ànda - ànda paraingu-da. 5Nyungga, MIRI, Ala Mahupu-mbiha, Ala matua Ihirailu, nda ku-dunjaku-anya na Ihirailu dàngu Yahunda, jiapa-kadu ka datuu manjala lai Nyungga. 6Pamara-wa wikimi! Palaiwa welingu la Mbambilu, nda jia-yaka napa mimeti pakariangu-du nyuda ruku njalada! Ba jia-yaka nàhu na rehi tungunggu hilu akatu-na na Mbambilu, dàngu pahuku-nya pa-jàngapu-nya na paruku-na. 7Na Mbambilu beri kaba wai angguru àmahu raraya la limanggu hi kiri maüku hàlana na nggubulu pinu tana. Da ba - banjaru da-unungu-ka na angguru la kaba nuna, hi lupa da-katoba nyuda. 8Hi jia kanabu dàngu mbera biana na Mbambilu. Hiinyawa nyuna, dàngu himbunya muru ka tunja da manua - manua-na, napa hi peku màlaru-na. 9Da tau hangàdangu da ma-ngiangu lai nu dapanii dàngga anguda, ‘Mbàda pa-mukarungu-mandaka làti pandula-ya na Mbambilu, tàka ta-endapu-ka! Rihingu hàmu ka ta-dunjaku-nya na tana yiana ka tamangu pabeli la tana wikinda. I MIRI huku-nanyaka na Mbambilu wàngu ma-mbàringu, dàngu hi na-pakabu ailulu-ya,’ wàda,” wàna.
10Na banjaru-na i MIRI dapanii, “I MIRI na-pajiliku-nyaka ba la ngaba ma-padeningu-ta nyuta. Màlawa ka talaku la Yeruhali dàngu ka tawàlahu-ya lai nu jàka nggàraya na pambàda wundana i MIRI Alanda,” wàda.
11I MIRI mbàda runda-nanjaka da hanganji Mendia, nadu ka palàjaru-ya la Mbambilu ba wàna Nyuna. Nunaya na pawàna Nyuna ba na-himbalu-ya na paruku-da da tau da ma-nyungguru-ya na umana.
Ba hapajia-ha da parawira pamba ma-panàhaku da wuangu pareta, “Padàka-ha da ana pana! Halili-ha da temingu! 12Wuangu-wa tanda la pa-làndahu-nja da kangeli-na na Mbambilu. Pa-kapingatu-ha da madai. Tàngarunja pangia-da da ma-manggangu. Rimangu ka tàka hàbakungu!” wàda.
I MIRI mbàda pahàra-nanyaka na pambàda pakaka-na hangganja da tau Mbambilu. 13Na tana nuna lalu mbana wuluya dàngu dadangu da lukuna; na nyuna na rapa lurina njàpu-nanyaka; tàka-nanyaka na hupu njàpu lurina. 14I MIRI Mahupu-mbiha na-harangu-ka parongu-na na wikina Nyuna, ba pa-ngàndingu-nanya tau napa mahama dangu kabala la pa-kaluluku-nya na Mbambilu hi dapayaa aungu paraï patalu.
Na ludu wotungu lai Ala
15I MIRI na-padika-nya na tana wàngu mbihana,
wàngu manggàna-na ba na-unggulu-ya na pinu tana,
dàngu na-wàlahu-ya na awangu wàngu eti diha kanandingu-na.
16Nawàngu pa-wuangu pareta-a,
kanduu-ma-ananya na wai la hanggubu awangu.#wai la hanggubu awangu; tàngaru-ya la De. 1:6-8.
Welingu la hupu - hupu tana na-patàka-nya na karumangu,
natuya na kabilaku na ma-tapanjiru daa la urangu,
dàngu na-pangàndi-nya na ngilu welingu la ngia pa-pahàmu-nanya.
17Ba ita hàla-yaka nuna pàdangu-nanyaka wikina na tau,
ba nduba-nanya dàngu ba nda nggàra pa-jàngapu-na la kanandingu-na.
Da matuku àmahu kamakihu makia-danyaka,
nadu da kahala hada marapu pa-pandoi-da ba kamàla-maaha dàngu nda ningu lurida.
18Da marapu nda da-pawilingu-a,
ràka-mana ka paaka-nja dàngu ka pawawa-ha.
Jàka jia-yaka na rehina,
nyuda napa mau-ma-adanya.
19Na Alana i Yakupu nda hama tuada da marapu;
Nyuna ma-padika-nya mbuu ndàba-naka.
Na tamuna, i MIRI Mahupu-mbihaya;
Nyuna mambàda pindiya na Ihirailu hi natuya banjaru-na.
Na Mbambilu beri paluya
20Napanii i MIRI, “Mbambilu, nyumu beri palukau, pambeni wàngu ba ku-pabera. Nyumu jiakau pa-làndahu wànggunja da banjaru dàngu da pa-hanganji. 21Nyumu jiakau pa-pamija wànggunja da njara dàngu da ma-kaliti-ha, hamanai da kareta dàngu da maheinja. 22Nyumu jiakau pa-pameti wànggunja da mini da kawini, ma-kaweda bidi tau, anakaria bidi mini. 23Nyumu jiakau pa-patàlaru wànggunja da ma-pawangu hamanai da papawa-na, da maraïngu dàngu da hapi lukuda, da ma-kuaha dàngu da parawira jangga pànggatu,” wàna.
Na hukungu-na na Mbambilu
24Napanii i MIRI, “Hakahii wiki-nyawa nàhu jàka nggiki-nggunja na Mbambilu dàngu da ma-mandapu-nya ba ku-himbalu-ha da akatu pawunda-da hanggangu la Yeruhali.
25Ha Mbambilu, hama palindi-kau nyumu ma-pamija-ya na nggubulu pinu tana. Tàka Nyungga, MIRI, napa ku-ndubaku-kau. Napa kuyila-kau nyumu dàngu ku-kunggulu-nggau hi kumàta-nggau pa-mutungu hi lupa aükau. 26Nda hilu hau-apa watu welingu la kanàndamu na mapeku pawulu wànya ba hili pa-hadangu. Nyumu napa dedi-munyaka maràda telangu lundu nu - nu. Nyungga, MIRI, mambàda panii,” wàna.
27“Ha hanganji weli diangu!#weli diangu; tàngaru-ya la 50:3. Wuangu-wa tanda ka làndahungu! Palingu-ha da taropitu ka peku ronguda da banjaru! Awahu-ya na banjaru la pa-pabera lawanya na Mbambilu! Paràha-nya na pa-hanganji Araràtu, Mini dàngu Àhakenahu ka datungu. Wotu haàtu liku uru ma-pairungu la patungu. Awahu-ha da njara hama dangu kabàba kabala. 28Hawaritu-ha da banjaru la pa-pabera lawanya na Mbambilu. Paaunja da hanganji Mendia pa-kariangu da ma-kuaha dàngu da ma-pangora-na, hamanai da tanatara welingu la mbuu ndàbada da tana pa-kuaha-da. 29Na pinu tana na-nggàduku dàngu na-yoyangu nadu Nyungga ba talànga pahàra-nggunya na pa-pakaka-nggu la patuya na Mbambilu pangia mambila na panda ngia tau. 30Da tanatara Mbambilu pànjangu-danyaka pa-pabera dàngu ngiangu-danyaka la tindi - tindingu. Na-mbulangu-ka na toru mbenida nyuda dàngu nda nggiki-madapa. Da pindu bokulu pa-tumburu-haka, dàngu da uma patunu-haka. 31Da tau papalewa dapalai pandutu - pandutungu la papeka-nya na hanganji Mbambilu, nu na paraingu ba pa-làndahu-yaka welingu la hau kabihu - hau kabihu-na na paraingu. 32Na ngia papala na mandapu-nyaka muhu, dàngu da tindingu ngia pa-pajàrungu patunu-haka. Da tanatara Mbambilu nda dapingu-apa tubada. 33Nda nahili mandai-apa ba pakàku-ha nyuda dàngu kalija - lijaku-danjaka paraï muhu hama tuna na uhu nggàndumu la ngia pa-parina. Nyungga, MIRI Mahupu-mbiha, Ala Ihirailu, mambàda panii,” wàna.
34Na Yeruhali na-pakabu-yaka dàngu nangaa pambuta-yaka paraïna hanganji Mbambilu; nyuna na-pambuta-ya na ihi paraingu hama tuna tau ma-kanjàku pambuta-ya na ihi boti. Hama tuna banda ma-bàkulu nda ngerina, ba na-kawàluku-nya na Yeruhali dàngu ba na-paihi-nya na kambuna wàngu mbuu ndàbada da mahàmu welingu la paraingu nuna, tàka da marihi hi nawàru-nja.
35Ha ma-mandapu-nya na Hiungu, pekawa, “Màla àru ka na kambitaku-ya mbana eti na Mbambilu hama tuna na pawunda-na lai nyuta!” ka wàmi. Ha ma-mandapu-nya na Yeruhali, pekawa, “Màla àruki ka na-kambitaku-ya mayila na Mbambilu hama tuna na pa-kambitaku wànanda nyuta!” ka wàmi.
I MIRI napa nandula-ya na Ihirailu
36Jia-duyaka hi napanii i MIRI la ma-mandapu-nya na Yeruhali, “Napa Nyungga ka ku-patara-nya na palakara-mu dàngu ka ku-palimba-nja da pawunda-da da muhumu lai nyumu. Napa ku-pamihi-ha da matawai dàngu da luku la Mbambilu. 37Na tana nuna napa nanjadi-ya pabundu kanànda, ngia pa-kapàndi-da da ahu rumba. Na tau na mangita-ya napa na-mangginggitu, dàngu nda haàtu-mbupa ma-mbuhangu pa-ndàdiku lai nu. 38Na tau Mbambilu na-kangaü hama tuna hinga, dàngu da-kangàriku hama tuna ana hinga. 39Ba talànga hei-naka na patikingu-da pangangu, napa Nyungga ku-payema-nja pangangu nyuda, dàngu hi ku-pamaüku-ha hi dawingu katiku-da hi lupa da-katuda dàngu nda dahilu hadangu-apa. 40Napa kungàndi-ha nyuda ka hambàli-ha hama tuna ana mbimbi, kamàmbi, dàngu mbimbi bumbu. Nyungga, MIRI, mambàda panii,” wàna.
Na urana na Mbambilu
41Napanii i MIRI, “Na Mbambilu na pa-wotungu la nggubulu pinu tana pa-wàhiya-ka! Kanjupu pa-mangginggitungu-ya na tana nuna la ba - banjaru. 42Na wai tehiku na-mbokaru-ka la Mbambilu; da ngalingu-na dawàngu pakanduu ba da-làndahu-nya nuna na tana. 43Da paraingu-na nanjadi-ha pangia pa-mangginggitungu, hama tuna na maràda telangu na mamàdu marokutu. Nda ningu tau mabihu pa-ndàdiku jàka ndia pali ningu lai nu. 44Na Mbelu na marapu tana Mbambilu, napa kuhuku-nya. Napa ku-pawiti-nya ka na-pabeli-nja jàka nggàraha da pambàda wàhina. Nda dahili marubuku-anyapa paraï da banjaru.
Da kangeli-na na Mbambilu datanyungguruka. 45Jia ba tuna nu palaiwa welingu lai nu, ha banjaru Ihirailu! Pamara-wa wikimu welingu la hàngganggu na mambinu lembaru. 46Àmbi mangàdatu jàka ndia àmbi nggidiku ruku kareuku lindingu na parongu-mi. Nimbihu ndaungu ni - ningu-ma parongu kareuku lindingu manda pahama – kareuku rukuna na mbana eti la tana wiki dàngu kareuku rukuda da hanganji da ma-pamuhungu dua wikida.
47Miwai-yawa, ba natàka na rehina napa nahuku-nggunja da marapu-na na Mbambilu. Nggubulu-na nuna na tana pa-pawawa-ya napa, tàka mbuu ndàbana na ma-mandapu-nya pa-pameti-ya. 48Mbuu ndàbada da maninja la awangu dàngu la pinu tana napa da-paoingu paraï pa-hawola ba jiaya na kanabu-na na Mbambilu la limana na banjaru weli diangu, na mamai pa-pakabu-ya. 49Nadangu na tau la nggubulu pinu tana da pa-pameti rukuna na Mbambilu, tàka nàhu napa na-hanggubalu na Mbambilu lumuda da tau Ihirailu da pa-pameti. Nyungga, MIRI, mambàda panii,” wàna.
Na lii languna i MIRI nduma tau Ihirailu la Mbambilu
50Napanii i MIRI la tau Ihirailu na maninya la Mbambilu, “Mara-minyaka nyimi welingu la ma-pameti-kai. Jia ba tuna, lakuwa nàhu! Àmbi patiangu-dupa! Jiapa-kai kai marau welingu la uma, namuka Nyungga, MIRI-mi, dàngu na Yeruhali. 51Mipanii nyimi, ‘Pa-pawawa-kama nyuma dàngu pa-pamakia-kama; hi lupa ma-kamakihu wànya ba na-mandapu-njaka tau hangàdangu da rowa matua daa la Umana i Miri,’ wàmi. 52Màla, eti wànyawa yiana na paniinggu. Napa nàmunya na rehina ba kuhuku-nja da marapu-na na Mbambilu. Parongu-ya napa na ma-kanjaïku la nggubulu-na nuna na tana paraï ruku manua mandàkangu. 53Jiapa-kai ka namàka pahei la awangu na Mbambilu dàngu ka na-pahadangu pa-pajàrungu wàna na panda peku toma, daingu-mana ba ku-paràhangu tau la pa-paruha-ya. Nyungga, MIRI, mambàda panii,” wàna.
Nuana na kabuna na Mbambilu
54Napanii i MIRI, “Patingingu! La Mbambilu parongu-ya na kanjaïku dàngu na tau mahii hawina paraï rukuna na kabu na manjadi la tana nuna. 55Nyungga ku-pakabu-ya na Mbambilu dàngu ku-papànja-nja da talia lingu mambabu. Hama tuna tungu ngalingu makanduu-ya ba nàmunya na muhu; tàka da tanatara-na da-làndahungu ba dàngu pa-oingu-da hama tuna na pakàli wàngu ba pabera. 56Maidanya pa-paruha-ya na Mbambilu nyuda, payàpa-ha da panjuri-na dàngu la papata-ha da madàkada. Nyunggama ba MIRI-ka mahuku-nya na ma-akatu, tàka na Mbambilu napa ku-pahimbalu-nya hama tudana na paraïna. 57Napa ku-pa-maüku-ha ba hapajia-ha da mapawai ngaba la pareta Mbambilu – ba hapajia-ha da ma-kaminaku manggàna, da liku uru dàngu da tanatara. Nda jia hili hadangu-adapa nyuda, katuda-danya lundu nu - numa. Mbàda panii-ngguka Nyungga; Nyunggama na Hanganji, Nyungga MIRI Mahupu-mbiha. 58Napa ku-pamija-ha da kangeli kapingatu-na na Mbambilu hi lupa da pahama ndidaru dàngu na tana. Da pindu bokulu da maja - jangga napa kutunu pambuta-ha. Na njili dàngu na jàrada da banjaru parahumangu-ma-a, nadu da paràma-da nyuda napa nahàla-ha epi. Nyungga, MIRI Mahupu-mbiha, mambàda panii,” wàna.
Na lii languna i Yerimia pa-patàka-nya la Mbambilu
59Na ma-karaha-ya i Hanganji Hendikia jiaya i Haraya anana i Neria umbuku-na i Màhahiya. La ndaungu papatu wàna na pareta-na i Hendikia hanganji Yahunda, i Haraya natundu-nya i Hendikia la Mbambilu. Ka wua-nggunyaka hangia waingera-na. 60Mbuu ndàbada da ura pàda napa na ma-handauni-ya na Mbambilu dàngu da hawiangu-ka na manggàna-ya nuna na tana mbàda tulihu-nggunjaka la hau mbuku pa-kulurungu. 61Hàla hi kupanii-nya i Haraya, “Jàka mutàka la Mbambilu, tàngaru-maya ka pekuna mbuu ndàbada da pa-tulihu la mbuku yiana kau dihanja da tau lai nu. 62Hàla kau hamayangu tumu yia, ‘MIRI, mbàda panii-muka Nyumu ba pakabu-munya napa yiana na paraingu hi lupa da-molungu ailulu, ka tauya ka banda-yakai, tàka na pangia yina hi hama tuna maràda telangu-ya lundu nu - nu,’ wàmu. 63Nu, bau hàlaka padiha-nja na ihina na mbuku yiana la tau nuda, hondunya watu yiana na mbuku, hàla kau kawuka-nya la padua Luku Epuràtu, 64kau panii, ‘Tuna nuka napa na manggàna-ya na Mbambilu. Na tana yiana napa na-tandaningu dàngu nda nahilu kawudaku-apa rukuna na ura pàda pa-pahandauni-nanya paraïna i MIRI,’ ” wàna.
Da papanii-naka i Yerimia lundu-daka lai yia.
Currently Selected:
YERIMIA 51: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
