YERIMIA 48
48
Na ngerana na tana Muapu
1Yiana-yaka na papanii-na i MIRI Mahupu-mbiha, Ala Ihirailu na ngerana na Muapu, “Ura dedi-ana-nyaka na ma-mandapu la Nembu, na paraingu-da ba tanyungguru-nanyaka! Na Kiriyataïmu pawàhi-yaka, na tindingu-na na ma-kapingatu pa-pakabu-yaka, lupa da-makia da ma-mandapu-nya, 2molungu-nanyaka na pa-hamemu wàna na Muapu. Na muhu mbàda wàhi-nanyaka na Hehimbungu dàngu lai nu da pakaka-nya la pa-pamolu-nya nggubulu-na na banjaru Muapu. Pa-pànjangu-haka napa da talia nggoru la paraingu Màtumingu, nadu ba làndahu-nanya napa paraï tanatara. 3Ronguya! Na kaladaku-na na ma-mandapu-nya na Horunaïmu, ‘Tàlaru-yaka! Làjaru-yaka!’ wàda.
4Na Muapu nambuta-ka! Na kaladaku-da da anakeda parongu-maha lundu tàka la Huawàru. 5Ronguwa talia nggoru mahii la ànda kandekalu la Luhitu, dàngu talia nggoru ma-padudurungu la ànda pa-kamburungu la Horunaïmu. 6‘Parenggangu! Pamara-ya na lurimu! Palaiwa hama tuna kalandai matàmba la maràda telangu!’ wàda.
7Muapu! Nyumu mumonu-nya na kapàrumu dàngu na wulumu. Tàka nàhu nyumu wiki napa pa-pakàku-kau. Na Kamuhu na marapu-mu, papohu-nja ba hapajia-ha da ratu dàngu ba hapajia-ha da mapawai ngaba na pa-palaüngu-ha napa la ngia pa-wàrungu. 8Mbuu ndàbada da paraingu napa dakabu, nda ana haua ma-hinggilu. Lolangu dàngu maràda linjaku napa dambuta ndàba. Nyungga, MIRI, mambàda panii. 9Tunyawa watu tanda retina na Muapu, ba nda pira-mandai-anapa ba pambuta ailulu-ya nuna na tana. Da paraingu-na napa da tanyungguru dàngu nda haàtu-mbupa napa ma-ngiangu lai nu,” wàna.
10Pa-ràtungu-ya na tau na manda pahàra weli etinya na wai ngerana welingu lai MIRI. Pa-ràtungu-ya nyuna na manda butuhu-ya na hapanda-na la pa-pameti.
Da paraingu la Muapu pa-pakabu-ha
11Napanii i MIRI, “Piti weli àmangu na Muapu naluri mànjaku. Ndedi pa-handàkangu ba palaünya la ngia pa-wàrungu. Nyuna beri wai angguru na pa-pahiangu la pa-tandapu, dàngu ndedi pa-handàkangu paburi-ya la pangia angguru hau. Na angguru-na jiapa-maya na hiritu-na dàngu na hàmuna jàka ununya.
12Na nyuna, napa natàka na rehina ba ku-paràhangu paburi-ya na Muapu hama tuna angguru, tàka da kanaingu-na pakatàndakungu-ha dàngu hi beraha. 13Na Muapu napa nahala eti hanggangu lai Kamuhu, na marapu-da, hama tuna na tau Ihirailu ba nahala eti hanggangu la Mbetilu, na pamonu-da. 14Nggiki hamana hi datoru mbeni da mini Muapu papanii, ‘Ma-kaborangu, panjuri mbeni hanggangu-kama pambàda kamangu la pabera,’ hi kiri wàda? 15Na Muapu dàngu da paraingu-na mbàda pakabu-haka, tàka da bidi minida da marihi hàmu pa-pametiha-ka. Nyungga mambàda panii. Nyungga Hanganji, MIRI Mahupu-mbiha. 16Na ura pàda ndumana na Muapu mbàda la ngaru pindu-yaka, nda nahilu mandai-apa ba nakabu.
17Ha nyimi nanggara - nanggara malihi-nya la Muapu mapinya na wuwana, hawina-wa lumuna nyuna! Pekawa, ‘Na Muapu nda nahilu kuaha-apa, na bokulu-na dàngu na kapingatu-na na-molungu-ka!’ wàmi. 18Ha ma-mandapu-nya na Ndimbungu, puruwa welingu la pangia-mu na pawiri; mandapu-wa la tana la pinu kumburu tana. Nadu na ma-paruha-ya na Muapu na tanamu mbàda ninyaka, dàngu napa na-pakabu-ha mbuu ndàbada da tindingu-mu. 19Nyimi ma-ngiangu la Arowiru, ndolaku-wa la hingi ànda dàngu kai panauya! Paàra-nja nyuda da mawala wikida dàngu da ma-tambutuhu, ‘Nggàra-yaka na matumbu?’ ka wàminja. 20Nyuda napa dahema-kai, ‘Na Muapu na-kanabu-ka dàngu pa-pawawa-yaka, jia ba tuna hiinyawa. Pakada-nya la hingi - hingi-naka na Luku Àrunongu ba mbàda kabu-naka na Muapu’ ” wàna.
21“Na hukungu pa-panabu-yaka la parai - paraingu la ngaba maràda dita: la Holungu, Yahàhu, Mapàatu, 22Ndimbungu, Nembu, Mbetu-Ndibulataïmu, 23Kiriyataïmu, Mbetu-Nggamulu, Mbetu-Miungu, 24Kariutu, dàngu Mbòhura. Mbuu ndàbada da paraingu la Muapu, mamarau dàngu ma-mareni, pa-hukungu-haka. 25Na kapingatu-na na Muapu papata-yaka, dàngu na kuaha-na pa-palàjaru-yaka. Nyungga, MIRI, mambàda panii,” wàna.
Na Muapu ba pawawa-ya
26Napanii i MIRI, “Pa-maüku-yawa na Muapu, nadu ba na-pajangga wikina hanggangga Nyungga. Napa nyuna naki - kilungu wikina la mutana, dàngu hi nariki-nya tau. 27Ka nda nariki-nya àmangu na Ihirailu paraïna Muapu tàka hi jia mànuya na papanii wàda ba hama tuna patàka hàbaku pa-pohungu ma-manganga-ha?
28Nyimi ma-mandapu-nya na Muapu, dunjaku-nja da paraingu-mi dàngu ngiangu-wa la palindi watu, hama tuna na kulundiha na matuu hibuna la karaha ngambangu. 29Nyimi lalu ngambakai! Mbàda rongu-mangguka Nyungga bai tika pa-ngànjangu, jangga etimi, hangonjaru, dàngu bai hangànjaru nyimi! 30Nyungga, MIRI, kupi-manya na hangànjaru-mi. Na paniimi ma-kakòlulu-maaya, dàngu na pawunda-mi nda ningu linguna. 31Jia ba tuna, napa Nyungga kuhii jilungu ndumami nyimi mbuu ndàbami dàngu ndumada da tau la Kiru-Herihu, na parai puhu pareta-mi. 32Tàka napa kurihi hii-nyapa na tau na ma-mandapu-nya la Hipuma welingu la ma-mandapu-nya na Yaehiru. Na paraingu Hipuma hama tuna na angguru ba da-làmbatu da laina lundu la hapapa Tehiku Meti, toma la Yaehiru. Tàka nàhu da wua ai wanduna dàngu da wua angguru-na mbàda pamànji-haka. 33Na payaa aungu hawola-na namàda-ka welingu la tana Muapu na ma-kamboka. Napa ku-papànja-nya pa-lulungu na wai angguru welingu la ngia papohu-ya; nda ningu-apa tau ma-pandoi angguru dàngu ma-kayaka mbaha eti.
34Na tau Hehimbungu dàngu Eliali hii-danyaka, tàka na hiida parongu-maya tàka la Yahàhu, dàngu narongu-mbuya tau welingu la Huawàru lundu la Horunaïmu dàngu Ekulàtu Helihia. Hi dahii nyuda nadu na wai ana luku Luku Nimirimu ba namihi-mbuka. 35Napa Nyungga kuhànda-ya na tau Muapu ka na-pànjangu patunu kameti maraku la ngia pakàli ngàndida kameti maraku dàngu ka da-pànjangu pawotu kameti maraku la marapu - marapu-da. Nyungga, MIRI, mambàda panii.
36Mbuu ndàbada da pawulu-na na Kiru-Herihu dàngu nggubulu-na na Muapu mbàda màda-daka. Na mila na etinggu ba kuita-ha da hadada nyuda; hama tuna na tau na mapini wàngu wiliku handuka-ka Nyungga la taleli. 37Nyuda mbuu ndàbada da-kikiru-haka da lunggi la katiku-da dàngu da ruu njerida, da-pamanua-ha da limada dàngu da-kalambungu hinggi karungu tanda hawina-da. 38La pinu mbuu ndàbada da toku ndidu uma dàngu hu lua la talora - talora nggailaru mbulungu mahii-a parongu. Nadu ba kubera-duyaka na Muapu hama tuna na mbàlu na panda mbuhangu. 39Na Muapu luju làjaru-nanyaka. Kanjupu makia-yaka na Muapu! Nahii ba mbàda pawawa-yaka dàngu jia-ma-ayaka na pariki wàda da ba - banjaru la winggiru-na. Nyungga, MIRI, mambàda panii,” wàna.
Nda ningu ànda luhuna na Muapu
40Napanii i MIRI, “Hama tuna na mbaku tehiku ba na-wàlahu-ya na kàpana jàka na tewa tuna numbu napa na hau banjaru ba namai patewa-ya na Muapu. 41Da paraingu-na dàngu da tindingu-na napa pawàhi-ha tàka da tanatara-na napa da-mangàdatu hama tuna na kawini na matiki pa-paana. 42Na Muapu napa nakabu dàngu nda tuna-apa ba hau banjaru-ya, nadu nyuda ba da-ngànjangu hanggangga Nyungga. 43Napa nyuda na-hanobaku-ha ma-kabularu, lambongu dàngu hiru. 44Da tau da mapalai welingu la tau kabularu napa da-kanabu la lambongu, tàka da maluhu welingu la lambongu napa dakàna la hiru. Nuna mbuu ndàbana napa nanjadi la rehi pambàda kawuku-nggu la pa-pakabu-ya na Muapu. 45Da tau da ma-haleli la pa-hinggilu da manda nggikina wàda ndokupa dalua pahimbu ngia pa-handera-da la Hehimbungu, tàka ba tuna na paraingu nuna talànga mutungu-na dàngu na uma hanganji-na i Hanganji Hihungu-mbu halàru-nanyapa-dua epi. Na ngaba padira dàngu na ma-palindingu la Muapu mbàda kehi-naka la epi, nu na tanada da tau da ma-mbuhangu pa-pabera. 46Hanggàmaru-nanyaka na Muapu! Na ma-mandapu-nya nu na malumu-nya na Marapu Kamuhu ba tàlaru-nanyaka, tàka da anada pa-palaüngu-ha ba tanawangu-ha. 47Na nyuna la malamiri, napa ku-palànyapu beliya na hadana na tana Muapu. Nyungga, MIRI, mambàda panii!” wàna.
Nuna-duyaka napa na pawunda-nanya na Muapu paraïna i MIRI.
Currently Selected:
YERIMIA 48: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
