YERIMIA 44
44
Na lii pa-patàkangu welingu lai MIRI nduma tau Ihirailu la Mehiru
1I MIRI napanii dàngga nyungga rukuda da tau Ihirailu mbuu ndàbada da ma-ndàdiku la Mehiru, nu la paraingu Mikundulu, Tàhapanihu, Mepihu dàngu la ngaba mbara luru. 2Yiana-yaka na lii pa-patàkangu welingu lai i MIRI Mahupu-mbiha, Ala Ihirailu lai nyuda, “Nyimi wiki mbàda hakahii-minyaka na pa-tàlaru wàngu na pa-panggàna-nggunya na Yeruhali dàngu mbuu ndàbada da paraingu hawiangu la Yahunda. Lundu nàhumbu da paraingu nuda jiapa-maya na kabuda dàngu nda ningu mangia-nja. 3Nu hi tuna nu rukuna ba nanjala na ma-mandapu-nya, hi kiri hàngganggu. Dawotu kameti maraku dàngu dalumu-nja da marapu, làti ndedi da-handàkangu-ma nyuda wiki palumu-nja hama-mbunai nyimi dàngu da boku la mangilu-mi. 4Nua naingu-mana Nyungga ba ku-palewa-nggainja da atanggu da wunangu, da mahiri-nja nyuda pawunda ma-akatu na pakaraü-nggu eti. 5Tàka nyimi ndai bihu parongu dàngu ndai bihu paeti wànja. Ndai bihuma pa-pànjangu pawunda ma-akatu, nu la pawotu kameti maraku la marapu - marapu. 6Kirina nuna-duka hi ku-hanubuku-nya na hàngganggu dàngu na karaü etinggu la parai - paraingu Yahunda dàngu la ànda - ànda la Yeruhali. Mbuu ndàbada kutunu-ha hi lupa kanànda-kia-haka dàngu hi nabulu hama tuna nàhu na paita.
7Nàhu Nyungga, MIRI Mahupu-mbiha, Ala Ihirailu, ku-paàra-nggai nggikina nyimi hi miwunda-ya na maparuu-nya na hanggàmaru nda najaru la wikimi nyimi. Ka patalàru hàlaya na tau wàmika nu – mini, kawini, anakeda dàngu anarara – hi lupa nda haàtu ndoku welingu la banjaru-mi pa-mànjabii? 8Nggikina nyimi hi miwunda-ya na hangia - hangia na pa-karaü wàna na etinggu? Mimai nyimi pa-ndàdiku yiahu la Mehiru, na tana tau hangàdangu, tàka nyimi hi mi-hamaya dàngu hi miwotu-nja kameti maraku da marapu-na na tana nuna! Ka mbuhangu-minyaka nu pa-palàjaru-ya na wikimi ka na-pawawa-kai paraï mbuu ndàba banjaru la pinu tana tàka hi jiaya na pa-ràtungu wàngu? 9Mbàda maromba-minjaka mbuu ndàbada da ma-akatu da pawunda la tana Yahunda dàngu la ànda - ànda la Yeruhali paraï da boku la mangilu-mi, paraï da hanganji Yahunda dàngu da papaha-da, hamangui nyimi dàngu da papaha-mi? 10Tàka lupa la lodu nàhu nyimi ndai pa-wawangu-ma wikimi. Ndai maraku-mangga Nyungga dàngu ndai luri tundunja da uku da pawua-nggunggai nyimi dàngu da boku la mangilu-mi.
11Jia-duyaka nu, Nyungga, MIRI Mahupu-mbiha, Ala Ihirailu, napa kulawa-nggai dàngu ku-pakabu hàlaya na Yahunda nggubulu-na. 12Dàngu jàka ningu tau Yahunda marihi, ma-rinjungu palaku la Mehiru pa-ngiangu lai nàhu, napa da-tàlaru ndàba. Nyuda mbuu ndàbada, ma-matua, anakeda, napa dameti la Mehiru la pabera jàka ndia la rimbangu. Napa na-mangginggitu na tau na maita-ha nyuda dàngu napa pa-pawawa-ha. Na tamuda jia-yaka napa na pa-ràtungu wàngu. 13Hama tuna ba kuhuku-nya la Yeruhali, tuna numbu napa ba kuhuku-nja nyuda da ma-ngiangu la Mehiru. Napa nyuda dameti la pabera, la rimbangu jàka ndia la panyaki pa-nggàbalungu. 14Welingu la tau Yahunda da marihi, da mambàda laku la Mehiru la pa-ngiangu lai nu, nda haàtu-mbu napa mamara jàka ndia maluri. Nda ningumbu haàtu napa mabeli la Yahunda, jiapa-kai ka lalu rinjungu-aha. Langatàka, nda ningu-apa mabeli, hinggilu-da ba mapira-aha da mawàngu pa-hinggilu-a,” wàna.
15Hàla mai-danyaka ba dira danguya na tau lai nyungga, nu mbuu ndàbada da tau mini da mapinja da papaha-da ba dangàndi-nja kameti maraku da marapu, dàngu mbuu ndàbada da kawini da ma-talànga ndolaku lai nu, jia-mbuha da tau Ihirailu da ma-tandapu la Pàturu la Mehiru mbara luru. Da panii lai nyungga, 16“Nda mabihu-a duma nyuma parongu-ya jàka nggàraya na papanii-mu lai nyuma la tamuna i MIRI. 17Mbuu ndàbada da pambàda ràndima, napa mawunda-maha duma. Daingu-mama duma napa ba mangàndi-nya kameti maraku na Hanganji kawini Awangu, dàngu ba maburi-nya wai angguru maraku lai nyuna hama tuna na pakàli wàda la parai - paraingu Yahunda dàngu la ànda - ànda la Yeruhali paraï da boku la mangilu-ma, paraï da hanganji-hanganji dàngu da mapawai ngaba la pareta lai nyuma, hamanai nyuma wiki. La rehi nuna nyuma najàmu-nggama pangangu, ma-mbokaru, nda nggàra ndoku ma-handuka-nggama. 18Tàka ba ma-jiaka-ka pangàndi kameti maraku la Hanganji kawini Awangu, dàngu ba nda mahili buri-apa wai angguru maraku lai nyuna, ka njaka ndàbana-nggamaka; da anguma meti-danyaka la pabera dàngu la rimbangu,” wàda.
19Tunaka nu hi dapanii da kawini, “Da-patunju-ma duma da mini leima hi ma-pandoi roti mahama hadanya na Hanganji kawini Awangu dàngu hi matunu-nya kameti hamanai hi ma-maraku-nya angguru nu na marapu-ma,” wàda.
20La mbuu ndàbada da mini dàngu da kawini da mahema tuda nu, kupanii, 21“Bai kakaya nda napinja i MIRI jàka ndia na-maromba-njaka da kameti maraku da pawotu la parai - paraingu Yahunda dàngu la ànda - ànda la Yeruhali paraï da boku la mangilu-mi, paraï da hanganji - hanganji dàngu da mapawai ngabami, hamanai na rayatu la tana yiana dàngu paraïmi nyimi? 22-23I MIRI nda nahilu noru-anyapa ba naita-kai bai ngàndinja kameti maraku da marapu hawiangu. Nuna na pawunda-mi ma-akatu-ya dàngu maànga-ya. Mbàda njala-mika nyimi lai MIRI dàngu ndai manundu la pareta - pareta-na. Jia-duyaka nu nàhu-maaka na tanami ba nakabu hi lupa nda pahilu ngia-anyapa, dàngu na tamuna patu-yaka pa-ràtungu wàngu. Na tau na maita-ya na-mangginggitu wànya,” wànggu.
24-25Hàlaka hi kupanii-nja nyuda mbuu ndàbada, ri - rihi ba hapajia-ha da kawini, ba tuna yia na paniina i MIRI Mahupu-mbiha la tau Yahunda da ma-ngiangu la Mehiru, “Nyimi dàngu da pa-pahami mbàda harangu-mika la Hanganji kawini Awangu bai tununya kameti maraku napa dàngu bai wotunya wai angguru nyuna. Nuna na paràndi-mi mi-patutu-manyaka. Hamudu nu! Wunda biaya jàka nggàraya nu na paràndi-mi! 26Tàka nàhu ronguya jàka nggàra wànggunggai nyimi, ha tau Ihirailu la Mehiru: Nyungga, MIRI, harangu-nggunyaka wànya na tamunggu na ma-mangunju, nu nyimi nda kupahia-anggai-pa pawànya na tamunggu bai tu hau pa-ràndingu. Nyimi nda uku-apa, ‘Nyungga ku-harangu lumuna i Ala na maluri!’ àmbi wàmidupa. 27Napa Nyungga kuhimbu-nggai wihuna ka peku hanggàmaru-mi dàngu àmbu peku ngudu hàmumi, hi lupa mimeti hàla, la pabera jàka ndia la panyaki pa-nggàbalungu. 28Ana tau mapira-aha napa da ma-malundungu dàngu da mabeli la Yahunda welingu la Mehiru. Ka ita-danyaka napa paraï mbuu ndàba tau Yahunda da maninja la Mehiru jàka jia na paniida nyuda, hi na paniinggu Nyungga na ma-hàrangu. 29Napa Nyungga ku-patàka-nggainya na hanggàmaru la pa-ngiangu yiana ka mbutiya lai nyimi na hukungu na pa-kawuku-nggu ndumami nyimi ba nanjadi langatàka-ma. 30I Hòpura hanganji Mehiru napa kupuli-nya la muhu - muhuna na ma-mbuhangu pa-pameti-ya, hama tumana ba kupuli-nya i Hendikia hanganji Yahunda lai Nembukatunehàru hanganji Mbambilu, na muhuna na ma-mbuhangu pa-pameti-ya,” wàna.
Currently Selected:
YERIMIA 44: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
