YERIMIA 42
42
Na rayatu dakarai-ya i Yerimia la pa-hamaya-nja ndumada
1Hàlaka nu mbuu ndàbana na tau, ma-matua anakeda, pa-kariangu da parawira - parawira, papohu-nja i Yuhanàngu anana i Kariahu dàngu i Aharia anana i Hohaya damai 2lai nyungga, hi dapanii, “Ama, hama tuna na paita wikimu ama, nyuma yia àmangu madangu, nàhu hawutu-ki-amaka. Makamahi-nggau ama, kau hamaya-nggama ndumama lai MIRI Ala na palumu-mu. Hamaya àru-nggama ndumama nyuma yia manii - i-nggamapa, 3ka na-paita-nggama i MIRI Ala jàka la nggini-kama bàdi malaku ningu dàngu jàka nggàraya bàdi na pawunda-ma,” wàda.
4Kuhema nyungga, “Hàmudu jàka tuna nu. Ku-kataku-maya duku na pakarai-mi. Napa ku-hamayangu lai MIRI, Alanda, jiapa nda nggàra wàna na hemana, napa ku-patàka-nggainya mbuu ndàbana; nda ana haumbu duku napa pawini-nggunggai,” wànggu.
5-6Nyuda dapanii-ngga, “Makarai-kau ama kau hamayangu lai MIRI Alanda, nadu nyuma ba karadaku lai Nyuna wàmaka, ka peku hàmu belina na hadama. Jia-duya, nahàmu ka nda nahàmu-kai na pa-patàkangu welingu lai MIRI, matundu-manya duma. Màta bia i MIRI ka hakahii ma-patutungu dàngu paràka pawaiya hanggangu lai nyuma, jàka era nda patundu-manya mbuu ndàbana na pareta-na i MIRI lai nyuma la ngarumu nyumu,” wàda.
Na hemana i MIRI ba na-hamayangu i Yerimia
7Palàngangu hakambulu lodu i MIRI napanii-ngga nyungga. 8Ka paau-nggunyaka i Yuhanàngu hamanai da parawira-na dàngu mbuu ndàbana na tau hawiangu da mamai karia-nya nyuna. 9Nyungga kupanii-nja nyuda, “Nyimi mikarai-ka nyungga la pa-patàka-nya na pa-kamahi-mi lai MIRI, Ala Ihirailu. Ba tuna napanii i MIRI, 10‘Jàka mi-mbuhangu nyimi pa-padaingu la tana yiana, napa kudanda-nggai nyimi, nda kupuha-akai; napa ku-pahada-nggai nda ku-panjoru-akai. Lalu hawina-ka ba ku-patàka-nyaka na hanggàmaru lai nyimi. 11Àmbi hilu mangàdatu-nya na hanganji Mbambilu. Nimangga duku Nyungga la padua-mi la pa-pahàla-kai nyimi welingu la kuaha-na. 12Nadu Nyungga ba kumila-nggai eti, napa kujuju-ya na etina na hanganji Mbambilu ka namila-nggai eti, dàngu ka napuli-nggai pabeli. Nyungga, MIRI, mambàda panii,’ ” wàna.
13-15Tàka nyimi mani-kinggai-pa la Yahunda àmbi patidungu-du lai MIRI Alami dàngu àmbi paniidu, “Nda mabihu-a duma pa-ndàdiku la tana yiana. Laku la Mehiru wàma duma dàngu ka ma-engangu ningu lai nu wàma. Lai nu nda mahili ràngga-ayapa na pabera, nda pahili rongu-apa lingu taropitu ma-paaungu pa-pahànjalungu, dàngu nda mahili pàda-anyapa na rimbangu,” àmbi wàmidu. Jàka pa-tongguru-maminja da etimi la palaku la Mehiru, dàngu pa-ndàdiku lai nu, yiana-yaka na lii pa-patàkangu welingu lai MIRI Mahupu-mbiha, Ala Ihirailu lai nyimi: 16“Na pabera dàngu na rimbangu na pa-mangàdatu-mi napa nakeha-manggai lundu la Mehiru dàngu nyimi napa mimeti la tana nuna. 17Mbuu ndàbana na tau na ma-patidungu la palaku la Mehiru dàngu pa-ndàdiku lai nu, napa dameti la pabera, jàka ndia dameti ruku rimbangu jàka ndia panyaki pa-nggàbalungu. Nda haàtu-mbu napa mamara welingu la pa-tàlaru wàngu na-papatàka-nggu lai nyuda; mbuu ndàbada napa dameti hàla.
18Hama tuna Nyungga, MIRI Ala Ihirailu ba ku-huburu-nya na hàngganggu dàngu na karaü etinggu la ma-mandapu-nya na Yeruhali, tuna numbu napa ba ku-huburu-nya na karaü etinggu lai nyimi malaku la Mehiru. Na tau napa na-mangginggitu ba naita-kai; napa da-pawawa-kai nyimi, dàngu na tamumi napa jia-yaka na pa-ràtungu wàngu. Ndai hili ita-ayapa nyimi yiana na tana na lukumi,” wàna.
19Hàla hilu panii-nggunyaka, “I MIRI mbàda wuangu-naka pareta, nyimi mani-nggaipa la Yahunda, ka àmbi lakudu la Mehiru. Jia-duyaka nu hi ku-panamu hahanggai nàhu 20ba mbàda wunda-miki hau njala bokulu nyimi. Mikarai-ka ka ku-hamayangu lai MIRI Alanda ndumami nyimi, dàngu mi-paràndingu-ka la pawànya mbuu ndàbana na papanii-na i MIRI. 21Nàhu nyungga ku-patàka-nggainyaka na pa-patàkangu welingu lai MIRI lai nyimi, tàka nyimi ndai bihu patundu-nya nu na lii pa-patàkangu. 22Jia-duya nu, namu-maya: la tana na-parinju-mi palaku ningu pa-engangu, napa mimeti la pabera, jàka ndia ruku rimbangu jàka ndia la panyaki pa-nggàbalungu,” wàna.
Currently Selected:
YERIMIA 42: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
