YERIMIA 19
19
Na kadihi na mambera
1I MIRI na-palewa-ka palua pakei kadihi, dàngu pawànda-ha da manda pirada da liku uru banjaru dàngu da manda pirada da ratu makawe - weda, 2la palua kariangu la Lolangu Hinumu ba lii ningu la Pindu Bokulu Kambera làja. Lai nu napa ku-pakada-nya na liina Nyuna na pa-patàka-nangga. 3Lupangu-ma ka tuna yia ba kupanii, “Ha maràmba Yahunda dàngu ma-mandapu-nya na Yeruhali! Patingi-nya jàka nggàraya na papanii ba wànggu Nyungga, i MIRI Mahupu-mbiha, Ala Ihirailu ka kupanii-nja wànggunggai. Napa Nyungga ku-patàka-nya na ura pàda na ma-bokulu la pa-ngiangu yiana hi lupa na-katàtaku wàngu na tau na marongu-ya. 4Nu hi tunggu nu nadu na banjaru yiana ba na-dunjaku-dunggaka. Nyuda da-pairaku-ya na pa-ngiangu yiana, ba dawotu-nja kameti maraku da marapu panda tandada nyuda, da boku la mangilu-da dàngu da hanganji Yahunda. Nyuda da-paihi-mbunyaka na pa-ngiangu yiana wàngu wai ria tau manda njala. 5Da-pahadangu ngia pawotu maraku ndumana na Mbaàlu la pawotu-ha da anada ka kameti maraku patunu-ha, tàka làti Nyungga nda ku-handàkangu-ma duku pa-paràha-nja pa-paloku-ya na matuna nu, dàngu nda handàkangu-ma duku patumbu na matuna nu daa la etinggu. 6Jia ba tuna, napa natàka na rehina na pa-ngiangu yiana ba nda Topitu jàka ndia Lolangu Hinumu nda wàda-anyapa, tàka Lolangu ngia pa-hambàli wàdanya-ka. 7La pa-ngiangu yiana napa Nyungga ku-pabeta-nya mbuu ndàbana na pa-pakaka-na na tau Yahunda dàngu na ma-mandapu-nya na Yeruhali. Napa kupuli-nja nyuda ka na-pakàku-ha paraï muhu - muhuda dàngu hi pameti-ha la ngia pa-pahànjalu. Da metida napa kumàta-nja ka nanganja ma-hawurungu dàngu banda bohu. 8Napa ku-pa-handauni-nya ura pàda na paraingu yiana, hi lupa nimbihu-na na tau na mali ningu lai nu, napa da-katàtaku dàngu da mangginggitu. 9Na muhu napa na-nggupulu-ya na paraingu, dàngu hi daduruhungu pa-pameti-ya na ma-mandapu-nya. Na panggupulu-da mambana mbangatu-ya, hi lupa na tau daa la kuru paraingu da-pangangu dàngga anguda, malai da ana wiki-mbuda,” wàna.
10Tunaka nu i MIRI na-paràha-ngga pabera-ya nuna na kadihi la hanggada da tau matundu-ngga. 11Kupanii-manjaka bàdi nyuda ba tuna yia na paniina i MIRI, “Napa ku-pakabu-ya yiana na banjaru dàngu na paraingu hi lupa hama tuna na kadihi na mambera ba nda nahili peku-apa pa-pahàmu beliya. Na tau napa natani-nja da metida la Topitu, nadu ba nda hilu ningupa pangia hau ngia pa-taningu. 12Na paraingu yiana dàngu na ma-mandapu-nya napa kutuya hama tuna na Topitu. 13Mbuu ndàbada da uma la Yeruhali dàngu mbuu ndàbada da uma hanganji - hanganji Yahunda napa da-iraku hama tuna na Topitu; nadu la pinu toku ndiduda da uma#toku ndiduda da uma; Da toku ndidu uma la tana Palatina da-ndidaru. nuda ba datunu ni-dunjaka dupa ndumada da marapu awangu, dàngu ba da-maraku-nja angguru ndumada da marapu hawiangu,” wàna.
14Hàla dunjaku-nggunyaka la Topitu, na ngia pa-paràhangu-ka, pa-patàka-nya na lii langu pa-patàkangu welingu lai MIRI. Hi kulua la talora Umana i Miri hi ku-ndolaku lai nu, hàla hi kupeka-nja da tau mbuu ndàbada, 15ba tuna yia na paniina i MIRI Mahupu-mbiha, Ala Ihirailu, “Rukuna ba mi-malihu katiku-mi dàngu ba ndai patingingu, patàka-nggunyaka napa mbuu ndàba na pa-hanggàmaru wàngu da pambàda pa-kakanggu ka nanggàna-ya yiana na paraingu dàngu mbuu ndàbada da ndeha la winggiru-na,” wàna.
Currently Selected:
YERIMIA 19: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
