YAHAYA 3
3
Na pariu raüngu la Yeruhali
1Langatàka, i MIRI Mahupu-mbiha napa na-pitiha welingu la Yeruhali dàngu la Yahunda mbuu ndàbada da paràka paluri wàna na mangia-nya lai nu, jia-mbuha da pangangu dàngu da pa-unungu. Hamanai mbuu ndàbana na tau na pamonu-da: 2nu da ma-kaborangu, da panjuri, da hakimu, da wunangu, da ma-manyura, da ma-panaungu, 3da parawira, da mini la ngora la panggolu dàngu da ma-pangora la lii pareta, da tau mapingu pa-kabeli mata dàngu da ma-manyura. 4Napa i MIRI nawotu-ha da bidi tau la paliku urunya na rayatu, dàngu napa nyuda àtalu eti biada ba da-pareta. 5Napa na-maràngga pa-kapidihu na tau. Da bidi tau nda da-wàrihu-ha da ma-kaweda, tàka na tau kudu nda na-wàrihu tau bokulu.
6Napa natàka na rehina na tau ba napindi-ya na haàtu nua kalembi-na dàngu hi dapanii dànya, “Nyumu-makia-ka nu maningu ana paki ma-hàmungu; jia matàwa nu ka liku urukau lai nyuma la rapa handuka tungu yia,” wàdanya.
7Tàka napa nahema, “Nyungga nda tau manyura-aka! Nyunggai duku nda ningua pangangu dàngu papaki. Àmbi paràha-dungga la paliku urunya na banjaru!” wàna.
8Langatàka, na Yeruhali na hanggubalu-ka! Na Yahunda na-tanyungguru-ka! Nadu mbuu ndàbada da kareuku-da dàngu da paruku-da ba dalawa-nya i MIRI dàngu da-ndubaku-ya na kawaha-na. 9La nggàduku-da nyuda ba da-ngànjangu na lohangu na akatu-da. Nda la ma-kawiningu-a ba datu manjala hama tuna àmangu da tau Hondumu. Ura pàku-adanya-ka! Daparuu-nya na hanggàmaru la nduma wikida.
10Napanii i MIRI, “Patàka-nja da tau da ma-manundu lai Nyungga, napa nyuda ba mànjaku dàngu ba mànangu-danyaka. Nyuda napa ba pàda-danyaka na hàmuna na paraï ruku njilida. 11Tàka ura pàku-ananya-ka na tau akatu! Hama tuna ba tudanya nu na tau, tu-manaika duda na pahunggu-da nyuda.
12Na banjaru-nggu napa na-roduku-nya paraï tau mangaa matangu dàngu na-pareta-yaka paraï tau ma-lamuji tau hawiangu.
Na banjaru-nggu napa na-panjàra-nya paraï liku uruda hi lupa nda dahili pingupa ànda ngia palida làti,” wàna.
I MIRI na-patanda-nya ngera na banjaru-na
13I MIRI mbàda ehingu-manaka la pa-kukutu-nya dàngu la pa-patanda-nya ngerana na banjaru-na.#Da pa-haleli ndai da manda pirada:na banjaru-na;Imbarani: banja - banjaru. 14I MIRI na-kukutungu hama tuna hakimu-ya hangganja da ngara liku uru la banjaru-na. Yiana-yaka na pa-panjala wànanja nyuda paraïna i MIRI: “Nyimi-maka maramba-nja da ihi woka angguru; da umami dambinu wànguka malanja pa-rambangu welingu la tau mila. 15Ka nggikina nyimi hi mi-roduku-nya na banjaru-nggu dàngu hi mi-lamuji-ya na tau mila? Nyungga, MIRI Mahupu-jangga dàngu Mahupu-kawaha mambàda panii,” wàna.
Na papaniii hahangu-ha da kawini Yeruhali
16I MIRI napanii, “Kanjupu ngànjangu-ha da kawini Yeruhali! Da wenju ba itaha dàngu da pa-kamàdikungu mata ba dalaku ngànjangu. Na panggada dapandoi - ndoiya dàngu ba da-patanjàngu-nja da kara àmahu la wihida. 17Na nyuna Nyungga napa kuhuku-nja; napa da-pakara pa-mbutangu da katiku-da hi lupa da-kamulungu wànya,” wàna.
18Napa natàka na rehina i MIRI ba napiti hàlaha welingu la kawini - kawini Yeruhali mbuu ndàbada da ngga - nggàra-da da-pahamemu wàda: da ngaü katiku, da kara wihi, da ngaü la nggoru, 19da kara lima, da tamalingu, 20tubuku, da muru la pungu dàngu la bànggi, 21tawuru dàngu da pula la uru, 22da ngaü remida da ma-manandangu, da laü, da kalembi liu, da kàpu àmahu, 23kalembi manipa, paki linangu, nggili nggoru dàngu tamalingu mamalai.
24Nàhu nyuda datungu-pa mbii kati, tàka napa nyuda dawau nda hàmu. Da boru bànggida nàhu da ma-malijangu tàka napa pa-pahilungu-haka hombalu halata. Da katiku-da da maningu lunggi manandangu, napa da-kamulungu-ka. Da pakida da ma-manandangu napa pa-pahilungu-haka paki katàri. Nàhu da-manandangu, napa daka-mbànga ba pa-dambaku-nja hàpu.
25Da mini, hamanai da ma-kapàru-mbu, napa dameti la pabera. 26La pindu boku - pindu bokulu paraingu na tau napa na-hawina dàngu na-padudurungu, tàka nuna na paraingu wikimbu hama tu-maana na kawini pa-kalulu na ma-uhuku la tana.
Currently Selected:
YAHAYA 3: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)