HOHIA 4

I MIRI na-panjala-ya na Ihirailu

1Ningu pa-palakara wàngu welingu lai MIRI hanggangu la mangia-nya yiana na tana. Oi Ihirailu, patingi-nya jàka nggàraya na papanii-na, “Nda ningua tuturu jàka ndia nda ningu-a mbuhangu la tana yiana, tàka na mangia-nya nda da-pajia-aya ba Alaka Nyungga. 2Da-harangu, tàka nda da-pahàra-nya;#Da-harangu ... pahàra-nya; jàka ndia: Da-ràtungu tau wànya na tamuna i MIRI. da-kambàliku, da-pameti tau, da-manganga, dàngu da-njuraku. Na akatu na-bonjangu, dàngu na pameti tau na-pandutu - pandutungu. 3Jia ba tuna napa namàdu yiana na tana, dàngu mbuu ndàbana na maluri lai nu napa dameti. Mbuu ndàba da ngara banda la lumbu awangu, la mara dàngu la tehiku napa da-tàlaru,” wàna.

I MIRI na-panjala-ha da ratu

4Napanii i MIRI, “Ha dimi ratu ba hapajia-kai, àmbu ningudu ma-panjala-ya jàka ndia mambeni-nya na banjaru-nggu, nadu ba nyimi pa-panjala-nggu! 5Lodu rudungu bai wunda manjala, hamangui ba hapajia-ha da wunangu. Jia ba tuna napa ku-patàlaru-ya na Ihirailu, na inami. 6Nyimi, hapajia-kai ratu, ndai wàrihu-aka Nyungga, hi nda na-wàrihu-mbuka banjaru-nggu hi lupa da hanggàmaru. Itebuku-ha da papekangu-nggu. Ba tuna, napa Nyungga ku-tebuku-mbukai nyimi, tàka da anami nda kupajia-aha ba ràtu-ngguha.

7Hama huka bonjangu-mi padangu, hama huka njala-mbumi lai Nyungga, ha dimi ratu! Jia ba tuna napa ku-panjilu-nya na ngerami: Napa nda patembi-akaipa, tàka pa-pawawa-kai. 8Hi wulu nyimi rukuda danjala-na na banjaru-nggu, tuna nuduka hi irinjungu ka da-nutakungu panjala. 9Napa nyimi imayila hama tuna na rayatu! Napa kuhuku-nggai nyimi tuda limbada da pawunda-mi. 10Napa ingangu la kameti maraku pawotu, tàka pa-daingu manjuu biami. Napa ilumunja da marapu woru tàka pa-daingu biana ba nda na-bonjangu danguna na tau, nadu ba mbàda dunjaku-minggaka Nyungga la pa-lumungu marapu - marapu,” wàna.

I MIRI nahuku-nya na ma-lumungu marapu

11Napanii i MIRI, “Ha dimi banjaru-nggu, da angguru da mamandai hamangui da mabidi da-pamuna-nya na màkami pa-kanandi pa-hàmungu. 12Ikarai ka na-paita-nggai ngerangu na ha-kadipu ai! Na hapungu tokungu napeka-nggainya jàka nggàraya na parinju-mi la papinya! Hama tuna haàtu kawini ma-pahunda-kai; mbàda dunjaku-minggika Nyungga, tàka hii pa-jàmangu wikimi la marapu - marapu. 13La ngia palumu - ngia pa-lumungu la pi - pinu tandula dàngu palindi iwotu kameti maraku, dàngu itunu dupa la lumbuda da ai bokulu ma-marumbingu lai nu ba na-pamaü-du.

Tàka nggàra-yaka na wundami? Da ana karia-mi danjadi kawini pahunda dàngu da rii anami danjadi kawini njuraku! 14Na nyuna nda kuhuku-anja napa rukuna na pawunda nuna, nadu nyimi wiki bai luadu la kawini pahunda da maràma la uma - uma marapu,#kawini pahunda ... uma - uma marapu; Da kawini nuda daràma la uma - uma marapu tau Kanaàngu, na ngia palumu-nya na marapu woru. Pa-namatu-nya na pakata unduda nyuda, jàka da-katuda angunja da kawini pahunda napa dadangu da ihi woka dàngu daworu da bandada. dàngu anguda nyuda iwotu kameti maraku la marapu. Na-padeningu langatàka-ma na lawiti yiana: ‘Na banjaru na manda pinya na rukuna i Ala napa na-hadànjalu,’ ba wàna.

15Ha dimi tau Ihirailu, ndai tuturu-a nyimi lai Nyungga! Màla àruki ka àmbu nawunda njala ma-hamangu na Yahunda! Àmbu na-lumungu la Ngginggalu jàka ndia la Mbetilu.#Mbetilu; La hilu Imbarani na tamu yiana, “Umana i MIRI,” wàna. La lawiti Imbarani-na na ndalaru yiana, “Mbetu-Awingu,” wànanya ba nalaa-nya na Mbetilu. Àmbu na-harangu lai nu wànya na tamuna i MIRI maluri. 16Nyimi dimi, ha tau Ihirailu, kanjupu tongguru etikai! Nggiki hama pawa-nggunggai nyimi, hama tuna mbimbi la maràda rumba?” wàna.

17Mbàda iru-ngàndi-nanyaka marapu na banjaru Ihirailu. Jia ba tuna nu màta bia-njawa nyuda. 18Jàka da-maüku-ka ba daunu padangu angguru, pahunda mbàha eti-danyaka. Darihi mbuhangu ka pawawa-ha welingu ba tembiha. 19Jia ba tuna napa da-molungu hama tuna pa-hapuputu ngilu. Napa da-makia rukuda da kameti maraku pawotu-da la marapu - marapu.

Currently Selected:

HOHIA 4: KAM

Highlight

Copy

Compare