HOHIA 2
2
1Jia ba tuna papulu dànguwa dàngu dua wikimi wàngu tamu, “Banjaru-na i Ala” dàngu tamu, “Pa-aïna i MIRI.”
I Nggomiru na manda tuturu ninu maüna na Ihirailu-nya
2Napanii i MIRI, “Ha dimi ananggu, na inami nda papaha-anggu-nyapa, tàka Nyungga nda lei-ana-nggapa. Jia ba tuna palakara wànyawa nyuna ka àmbu nahili njuraku dàngu ka àmbu nahili pahunda. 3Jàka pa-daingu pahunda-na napa ku-kalàba-ha da pakina ka na-kalulu hama tuna la lodu habola-nya. Napa ku-panjadi-ya hama tuna na tana màdu katukuru, napa nyuna na meti kandanga. 4Nyimi, anana, nda jia namu-anggunggai; dedimi la ruku pahunda. 5Na inami kawini pahunda manda pingu pa-makia-ya. Napanii, ‘Napa kulua la yo - yoranggu duku da mawua-ngga pangangu pa-ngunungu, tera ma-mamitu dàngu tera linangu, mina haitungu dàngu angguru,’ wàna.
6Jia ba tuna, napa kuoka wànya rii madàka, napa kubita wànya kangeli na àndana. 7Napa nayaulu-ha da yorana, tàka nda jia toma-ananja. Napa nahimbu-ha tàka nda jia jàngapu-ananja. Hàla hi napanii, ‘Napa kubeli la lei wunganggu; narihi hàmupa àmangu na ngeranggu weli nàhu,’ wàna.
8Ndedima napeka na inami ba Nyungga mawua-nya uhu nggàndumu, angguru, mina haitungu dàngu mbuu ndàba àmahu rara, àmahu bara papaki-na palumu wànya na Mbaàlu. 9Jia ba tuna, napa la rehi muti kukei beliha da pawua-ngguya, nu da uhu nggàndumu dàngu da angguru dàngu da tera mamitu dàngu da tera lianangu ka natuu pakina ba wànggu làti. 10Napa ku-pakalulu-ya la hangga mbuu ndàbada da yorana. Nda ana haàtu-ma welingu lai nyuda ma-ngalangu pa-pahàla-ya welingu la kuaha-nggu. 11Napa ku-papànja-nja mbuu ndàba da mbabuna, da mbabu nimbihu ndaungu hamangui da mbabu nimbihu wulangu dàngu da lodu Hangahu, na kababa-na mbuu ndàba da mbabu la huri lumungu-na. 12Napa ku-patàlaru-ha da pingi angguru dàngu da pingi kapilitu, da wunda lumungu-nggunja da yoranggu ba wàna nyuna. Napa ku-pambeli-ha omangu da woka angguru dàngu da woka kapilitu-na, napa na-paruha-ha banda bohu. 13Napa kuhuku-nya rukuda da lodu patunu wàna dupa la Mbaàlu, dàngu da pawotu wàna ngaü dàngu ba nayaulu-ha da yorana, hàla hi na-maromba halawàla-ngga Nyungga. Nyungga yia, MIRI mambàda panii,” wàna.
I MIRI nambuha-nya na banjaru-na
14Napanii i MIRI, “Jia ba tuna napa kungàndi-ya la maràda telangu; napa lai nu ku-pamanda wànya kareuku pa-mbuhangu. 15Napa ku-pabeli-nya lai nyuna da woka angguru-na, dàngu napa ku-panjadi-ya pindu monungu na Lolangu Handuka. Napa nayema-ka Nyungga lai nu hama tuna ba bidi kawini-yapa, ba hina naluhu welingu la Mehiru. 16Hi napanii ba lei-nangga Nyungga, ba nda jia-ayapa na Mbaàlu#Mbaàlu: Yiana tamu marapu Kanaàngu-ya jàka hilunya, “Miri”, wàna; na ihi hauna na lawiti kareuku yiana “lei”, wàna.-na. 17Nda ku-pahia-anyapa nyuna ka natiki-ya na tamuna na Mbaàlu, hi lupa na-maromba-nya tau na tamu nuna.
18Napa la rehi nu kutura pa-njanjingu dàngu mbuu ndàba da ngara bandaka ka àmbu da-kuhiku-ya na banjaru-nggu. Napa ku-papànja-nja mbuu ndàba da pabera dàngu kupahinggilu-ha da pa-pabera wàngu welingu la tanana na banjaru-nggu hi kuwuda-ya na paluri mambiru, wàda.
19Oi Ihirailu, napa nyumu kutukau papaha-nggu,
màndungu-mananya ba papaha-nggunggau lundu nu - nu.
Napa kunamu-kau dàngu kumbuha mànunggau nyumu;
napa kuwàngu pa-deningu dàngu tuturu-nggu.
20Nunjuya na njanjinggu, napa ku-pauma dànggau nyumu.
Napa upekaka ba MIRI wiki-mungga Nyungga.
21-22La rehi nu jàka na-hamayangu na banjaru-nggu na Ihirailu,#Ihirailu: La lawiti Imbarani-na, na Ihirailu ba wàna la ndalaru yiana Yihireyilu, wànanya (tàngaru-ya la 1:4, 11).
napa ku-tanaü-ha.
Welingu la awangu ku-papurungu urangu hi na-wuangu ihina
na tana uhu nggàndumu, angguru dàngu mina haitungu.
23Ku-pawiti-nya napa ka naluri mambiru na banjaru-nggu
dàngu ka da-padaingu la tanada.
Napa lai nyuda
‘Da Pànda Mbuhangu’ ba wànda làti, ku-paloha-nya ba kumbuha-nja nyuda,
tàka lai nyuda ‘Na Nda Banjaru-nggu’ ba wànggu làti,
‘Nyimi Banjaru-nggunggai’ wànggunja napa.
Tuna yia napa na hemada,
‘Nyumu jiakau Alama,’ ” wàda.
Currently Selected:
HOHIA 2: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
